E le’o toe faigofie nei aso

Tusia Aruna Lolani ,

73 Hits

Logo Alosio

Logo Alosio

Aua lava e te fa’avaivai i au galuega fai aua o lo’o iai ia oe le loto malosi e fa’ataunu’uina ai mea uma. 

O le talitonuga lena a Logo Alosio, 48 le matua o lona soifua mai Aele i le fa’atalatalanoaga o ia e le Fofoga o Samoa. 

Na maua atu e le Fofoga o Samoa Logo a’o aga’i e fai lana fa’atau ile aso ananafi. 

O Logo e le’i mauaina e ia mea uma i lona ola tuputupu a’e , na ia fa’ailoa mai le faigata o le olaga sa ia feagai ai i le su’ega o se tupe ma isi lava mea i lona olaga. 

“E leai se mea e faigata pe a tatou talitonu i lou a ia itu tagata. O lona manatu fa’aalia lea.

“E to’atolu la’u fanau ma e faigaluega uma e tausi le matou aiga.

“Ou te talitonu e fai a si na faigata o lo’u olaga a o laiti i latou. Pei o se masani a na, e faigata a le tausiga ole aiga e tusa lava po’o le a lou malosi na e iai. 

“E le toe taugofie le tau ole soifuaga mo tagata uma, ma o se itu lena sa faigata a i lena vaitaimi. 

“Sa ou fesiligia i lo’u mafaufau i na aso,  a’o lea ea le tatou mea o le a fai? E le’o se vaaiga manaia fo’i pea tatou fa’amoemoe i isi tagata e tausi mai ia te oe ma lou aiga. E sili ai le ola a ole tagata ia ma fai galuega e fetaui mo le tagata a ia. 

O lea ou te fa’afetai a a’u i le Atua ina ua tali mai i la’u tatalo ma na ia fa’afaigofie ina ai mea uma mo i matou. 

“I aso la ua te’a, na’o le fa’atoaga e maua ai se matou tupe maua.

“E fa’atau atu a matou meamata i le maketi i isi taimi a’o isi taimi ia e fa’asavali i  totonu ole nu’u. 

“A’o lenei vaitaimi, ua faigofie mea uma aua o lea ua faigaluega uma tamaiti ia ma latou tausi fo’i i mana’oga a le aiga. 

 “Ou te nofo lava i le fale ma fa’atali tupe e maua mai tamaiti. O le tele o taimi ou te fesoasoani ai i feau a le aiga e pei ole faiga o mea’ai, faiga ole tagamea ma isi lava feau i totonu ole fale. 

O le talitonuga o Logo, o le maua o galuega a lana fanau, o lona manuia lea ua maua mai i le galuega a ona lima i aso ua mavae. 

“O lou malamalamaga e maua i lou galuega e fai, o lou manuia lea e foa’i atu i tagata e te alofa ai.

“E te tigaina muamua ona fa’ato’a e maua ai lea ose manuia.

Sa ia fa’aalia le lelei ole olaga ua iai lona aiga ma ua maua fo’i e latou le ola lelei o le vai aemaise le eletise. 

“O se fa’amanuiga tele ua maua mai i lo ta tigaina sa iai. 

“E toe fo’i mai lava ia te oe mea lelei na e fai atu mo isi. O isi tagata e leiloa ina le na mea ma o le tali fo’i lea e te maua ai le manuia. E tatau a ona e fa’amalosi ma e galue pea se’ia taunu’u ma le manuia. 

O le talitonuga fa’aalia a Logo, o lou a ia galuega sa fai ma e fa’amaoni ai e te toe maua lava manuia e tele mai ai fa’atasi ai ma le alofa ma le filemu moni. 

© Samoa Observer 2016

Developed by Samoa Observer in Apia