‘Fa’aaoga lelei le mafaufau’ – mausali pea le Palemia

698 Hits

Tuilaepa Sa’ilele Malielegaoi.

Tuilaepa Sa’ilele Malielegaoi.

Ripotia e Lanuola Tusani Tupufia

Fa’aliliu e Maiava

 

A e fia avea ma ta’ita’i, ia fai muamua le tautua.

“E le o le avatu o le fa’aaloalo e fa’amatai ai ‘Oe ona e nofonofo ai lea,” o le fa’aaliga lea a Palemia, Tuila’ea Sa’ilele Malielegaoi. 

“E tatau ona fa’aaoga lelei le mafaufau, alu e asiasi i le nu’u ma fai lau monotaga, ma fa’ataunu’u ‘upu o le folafolaga a Le Atua, o le ala i le pule o le tautua muamua.” 

O saunoaga ia a le Palemia e tali ai i lafoga a le Itu Agai fa’apea, latou te ‘ave’esea le vaega lea o le Tulafono o Faiga Palota, pe a malo i le Palota Tele i le vaiaso fou.

O lea lafoga na saunoa iai le Ta’ia’i o le Tautua, o Palusalue Fa’apo II, lea na ta’ua, e tatau ona ‘ave’ese le mana’oga mo monotaga lea ua fa’alavelave i tagata e manana’o e tauva i faiga palota.

Ae matua le-talia e Tuila’epa.

E talitonu le Palemia, po’o ai lava – po’o ‘Oe fo’i o se tupu – e le tatau ona fa’a’ese mai le mana’oga lea.  “E fai pea lau tautua i lou nu’u e ala i lau monotaga,” o lana fa’amalamalamaga lea. “E le o se tautua e fa’amalosia ae tatau lava ona e alu e va’ai le nu’u. “O le ‘ese’esega la, pe a fa’apea o lou nu’u e pei o Sili – e le mo’omia le fai o sau monotaga – e tatau la ona fa’aaoga lelei le maufaufau aua o le fa’aeaea lea (o le avea ma matai), e le’i so’ona avatua ia ‘Oe.  

 “E le’i avatua le fa’aeaea lea e na ona e nofonofo ai. E tatau ona fa’aaoga lelei le mafaufau.” 

O le vaiaso nei, na fa’aleaogaina ai Le Tagaloa Pita – se tasi sa avea muamua ma minisita o le kapeneta, o se sui-tauva mo faiga-palota i le vaiaso fou, ona ua le fa’amalieina le mana’oga lea tau-monotaga. 

Na finau mai Le Tagaloa, o le tu ma le aga-masani a lona nu’u o Sili, e le mo’omia ai le faia o sana monotaga.

Peita’i, sa tautu lava Tuila’epa, o le tautua e tolu tausagal o se mana’oga e fa’amalosia mo so’o se tasi e fia tauva i le palota. 

 “Mo le papa mai Sili lea e fa’apea mai e le mo’omia lona faia o lea mea, o le fa’alavelave lea, ona e leai se mea fa’apena o i le tulafono. Pau le mea o lo’o ta’u mai, a fia avea ‘Oe o se faipule,  e tatau ona fai lau monotaga ia le i lalo ifo o le lima tausaga.” 

Na fa’amanatu fo’i e Tuila’epa, o le tofi o le Faipule, e le o se mea e ta’alo iai se isi.

Na saunoa, e le tatau ona ta’a’alo sui-fa’atu i ola o tagata o lo’o palota mo latou ma fa’amanatu mai fo’i, o le tofiga lea, o se fa’ailoga o le fa’aeaea ma le fa’aaloalo a le itumalo.

 “E le o se tofi mo ‘oe ma lou tama,” o le saunoaga lea a Tuila’epa.

“E le tafao-tafao a o lea te’i ua mana’o e alu… alu loa. E iai mea e tatau ona fai muamua; o le tofi…o le tofi o le nu’u ma le itumalo.”

O ia mea uma e aofia ai le talatalanoa i le sa’o o le aiga.

Na ta’ua e Tuila’epa, a mana’o e tamo’i i faiga-palota, e tatau ona talanoa muamua i le sa’o o le aiga ina ia iloa ai e lau ekalesia ma lou nu’u lou mana’o ma lagolago ai loa ‘Oe.

“Ona ta’u atu fo’i lea ia ‘Oe le mea e tatau ona fai, ia fai lau tautua mo le nu’u ma ‘ave lou alofa i vaiaso ta’itasi ma alu i fono i masina ta’itasi uma,” o le fautuaga lea a le Palemia. 

 “E leai se isi e palota mo ‘Oe pe a e le faia mea ia. Ia e tu’u atoa iai lou fatu ma lou mafaufau. Ona amata mai lava lea i le sa’o o le tou aiga, fa’asolo ane i le tou nu’u … e fa’amanuia uma atu ia ‘Oe. Ae ‘aua le tafao tafao i le taulaga i le mea e leai se tagata e iloa ‘Oe ona fai lea o au fa’asalalauga fa’apea, o le a e alu e lu’i le Palemia.”

© Samoa Observer 2016

Developed by Samoa Observer in Apia