Asiasi mai le Amepasa o Saina i Vaitele
Ripotia e Lanuola Tusani Tupufia
Fa’aliliu e Maiava
O ananafi na asiasi mai ai le Amepasa o le Malo o Saina i Samoa, o Wang Xuefeng ma lona faletua o Tong Xin, i le Nofoaga ‘Autu o le Samoa Observer i Vaitele.
Sa fa’afeiloa’ia Le Ali’i Amepasa ma le faletua, e le Pulega o le Nusipepa, le Afioga a Savea Sano Malifa, le Faletua o Muliaga Jean fa’apea le Fa’atonu o le Nusipepa, o Mata’afa Keni Lesa ma alo ai loa i se fonotalatala sa fa’atinoina lava i le Ofisa i Vaitele.
I lea fetufaa’iga, na saunoa fiafia ai le Ali’i Amepasa i le so’otaga va-va-lalata a Samoa ma Saina ma ta’ua ai, “o Samoa ma Saina o se uo-mamae i totonu o le Itulagi nei.”
Na saunoa fo’i, e matua aloa’ia lelei e lona atunu’u, le fa’amaoni o Samoa e avea o se uo mamae a Saina.
“O Samoa lava le ulua’i atunu’u o le itulagi ua sainia se maliega aloa’ia o so’otaga va-va-lalata ma Saina, ma o se tulaga e matua fa’atauaina tele e le malo o Saina,” o lana fa’aaliga lea.
“Ua matou aloa’ia lelei fo’i le tulaga o faiga-uo ua talia ai e Samoa lea tulaga i le tele o tausaga ua mavae.”
Na ta’ua e Amepasa Xuefeng, o fesoasoani a Samoa i le tele o vaega ‘ese’ese, o le ‘auala lea e talisapaia ai le lagolago ua tu’uina atu e Samoa mo lo latou atunu’u.
“E le-mafai ona matou fuaina se uo i tulaga tau-tupe,” o lana fa’aaliga lea.
Sauno le Amepasa, i Samoa nei, o lo’o fa’avae lava galuega a Saina i mana’oga o tagata Samoa.
“E tele lava la ina matou talatalanoa i le malo,” o lana fa’aaliga lea. “E fesili lava iai i mea o lo’o ‘ave ia le latou fa’amuamua mo tagata Samoa. O le mafuaga lena ua tele ai falema’i, o falea’oga ma isi galuega i nofoaga ‘ese’ese o lo’o mo’omia e Samoa.”
Ae le’i tu’umuli le ‘aumalaga, na fa’afetaia e le Ali’i Amepasa ma lona faletua le pulega o le Samoa Observer ona o le sao aoga o lo’o fa’atino mo Samoa ma le lalolagi ae maise le fa’afetai fa’apitoa ona o le vaega e fa-laupepa ua fa’aigoa o Saina i le Aso, o lo’o lomia pea i aso ta’itasi.
Na talifuaitau le Afioga a Savea e momoli le fa’afetai i Lana Afioga a le Amepasa ma le faletua, ona o le agalelei o fa’aalia pea e le Malo o Samoa i le tele o tausaga ua mavae.
Na mae’a lea fetufaa’iga, ona alo lea o lana afioga ma le faletua i se asiasiga o le lotoa atoa o le Nusipepa i Vaitele.