O LA’U TALA FO’I

173 Hits

1. Matauina i Tala Fou e faapea o se tagi mo le Faaiuga e faalauiloa ai ma se Poloaiga e Taofia ai le faigamalo a le Palemia o loo vaaia le Malo- o Tuilaepa Sa’ilele Malielegaoi-ua faaleaogaina e le Faamasinoga Sili!. O lea la faaiuga na tuuina atu e le Tamaitai Faamasino o Elizabeth Aitken-lea na ia faaalia ai e faapea o le tagi na faaulu e le Taitai o le Tautua Samoa Party o Palusalue Faapo II-o se mea tau polokiki.

O lea na ia taliaina ai le talosaga a le Sui Loia Sili o Mauriel Lui e tusa ai ma lana finauga o lea tagi-o le faaaogaina sese lea o taualumaga a le Faamasinoga ma e tatau ona faaleaogaina.

O le tuuina mai la o lea faaiuga-fai mai le Tamaitai Faamasino o Aitken o ia taualumaga na una’ia e polokiki. Ia afai la o lea tagi e tusa ai ma le silasila a le Faamasino- na una’ia e polokiki-e faapefea la faiga ia o loo fai nei tau polokiki-o le molia o le isi sui faatu ona o le leai o ni monotaga? O lea fea e faataua e le Faamasinoga? O polokiki poo aia tatau a tagata? O le faalavelave la i le isi sui faatu-ona o le mafuaga faapea e leai sana monotaga o faia-o lē fea la e faataua e le Tulafono? O le monotaga poo le aia tatau a tagata? O le a sou taofi?

2. Faalogoina i le Televise se faaupuga uiga ese a le Palemia fai mai o tagata Samoa ia o loo nonofo i fafo-Niu Sili poo Ausetalia-o lo latou faasinomaga lena. O lona uiga a o i Niu Sila-o iina lo latou faasinomaga-e faapena foi pe a o i Ausetalia poo se isi lava nuu o le lalolagi…!

O le fesili la i le Palemia-o ai na fai atu ia te oe o Niu Sila ma Ausetalia poo fea lava e nonofo ai tagata Samoa i fafo-o le faasinomaga lena o tagata Samoa ua o i fafo…? O le fesili la-afai la sa nofo muamua le Palemia i fafo mo ni aso se tele e pei ona ia ta’ua-o le a la le pogai ua toe sau ai i Samoa nei-ae o lona faasinomaga fafo? O fea e aumai ai lau pule e te nofo ai ma fai faasinomaga o tagata Samoa o i fafo? 

O le a le mea e le fai ai pea lou faasinomaga i tagata o lou itumalo o nonofo i fafo-ae ‘aua e te fia pule fua ma e faasinosino lima i isi tagata o le atunuu! O le mea lea-poo fea lava e nofo ai le tagata Samoa i fafo- e le o sona faasinomaga lena-o lona faasinomaga o Samoa poo le atunuu na fanau mai ai i le lalolagi nei ma o loo tanu ai lona pute.! E mata’utia lenei fiapule aoao i le atunuu! E manaia pe a faalele pea lau pule i lou nuu moni ma lou itumalo i Lepa-ae ‘aua e te fiapule fua i le atunuu atoa! E le avea foi lou Palemia ma ala e te fiapule ai fua i mea pa’ia e gata i Aiga o Samoa!

O lea e o’o lava i le Tofi o le Ao Mamalu o le Malo o Samoa  o e tautala pea ma e fiapule i ai. O le faamanatu la-a ua e fia Ao loa o le Malo-ona e tago lea e fai! Ae o le faamanatu-vagana lava o oe o se suli faamaonia o Aiga Tetele o Samoa ma ua e umia le suafa tauTama-a-Aiga-ona faatoa mafai lea ona e aafia i le filifiliga- ae le o se tofi mo ni polokiki ma ni Vaega Faa-Upufai! O le a sou taofi? 

3. Matauina foi ma le agaga faate’ia le mataupu a Faumuina Tiatia Liuga ma Le Tagaloa Pita. E ui lava ina ua aumai le faaiuga- ae o le manatu- talu ai o le mea lava lenei o le a fai e le Malo I taimi uma lava o faiga-palota-e le taumate ua tatau nei ona toe silasila toto’a afioaga ma alalafaga ma itumalo uma o Samoa poo le atunuu atoa- i le mataupu lenei tau monotaga e pei ona faaaogaina nei e le Malo I ana faiga faa-polokiki.

O le uiga o se manatu- e tatau i nuu uma ona silasila-pe o le a tonu lava le ituaiga o tautua lea ua faaaoga e le Malo e taofia ai aia tatau a tagata mai le tauva i le faiga-palota. O le uiga o le manatu- pe o le “Tautua Tuavae” pe o le “Tautua Matavela”. E tatau foi la ona faamanino ai pe o ai matai e fai monotaga-ae o ai matai e le faia ni a latou monotaga. E mafua la ona faamanatu atu nei mea-ona afai o le tautua o se mea lea e fai e matai uma-o ai la ia ituaiga o matai?

E faapefea faavae o nuu ma o latou faalupega? E i ai ni matai e le faia ni a latou monotaga-a’o ai? O nisi ia o mea e tatau ona matua fai ia maioio lelei e afioaga ma alalafaga ma itumalo uma o le atunuu-ina ia mafai ai ona taofi le fiapule atu o polokiki leaga i faavae mautu o nuu ua leva ona faataoto! O le a sou taofi?  

© Samoa Observer 2016

Developed by Samoa Observer in Apia