“O se lafoga fa’avalevalea”

451 Hits

Afioga i le Alii Palemia:Tuilaepa Sa'ilele Malielegaoi.

Afioga i le Alii Palemia:Tuilaepa Sa'ilele Malielegaoi.

Ripotia e Lanuola Tusani Tupufia

Fa’aliliu e Maiava

 

Na matua te’ena e le Palemia, Tuila’epa Sa’ilele Malielegaoi ni tu’uaiga fa’apea, o lo’o nono mai e le malo tupe mai fafo, e tau-togitogi ai ‘aitalafu.

“O le matua fa’avalevalea lava o lena lafoga,” o lana fa’aaliga lea.

Na saunoa Tuila’epa ina ua toe tauafia le Palemene ananafi, mo ana toe fonotaga fa’ai’u o lenei paea’iga.

O le Aso Faraile nei, o le a fa’ata’apeina ai e le Ao Mamalu o le Malo, Tui Atua Tupua Tamasese ‘Efi le Palemene o iai nei. 

I taualumaga o le fono ananafi, na toe fa’aaogaina ai e Tuila’epa se saunoaga fa’aMinisita sa faia muamua ma fa’apea ai, ua matua fa’ate’ia o ia ona o se “ta’utinoga na faia pogisa e nisi ma ta’ua ai fa’apea, na faia e le malo ni nonoga-tupe e tau-togitogi ai ana ‘aitalafu.” 

Na ia te’ena fo’i ni lafoga a le Vaega a le Tautua fa’apea, sa le tatau lava ona aofia i le tala o le tupe a le malo, fesoasoani mai fafo. 

“E ta’u mai ai le matua le-malamalama tele i mea nei,” o le saunoaga lea a le Palemia. 

Ae na fa’ailoa e Tuila’epa, o se mea sese tele i le malo, pe a le-aofia ai fesoasoani mai fafo i le tala o le tupe aua o le mafuaga lea na ‘aumai ai, e mo le atina’e o le atunu’u.  

O se fa’ata’ita’i, i le tala o le tupe e 697 miliona tala a le Palemia, na ta’ua ai, o le 102 miliona tala, o fesoasoani mai fafo. Ona totoe ai lea o le 595 miliona; le tupe na ia fa’amautu mai, e mo Samoa.

 “E le’i mo’omia se nonoga-tupe,” o lana saunoaga lea. “Sa lava lava a tatou tupe pei ona fautuaina ai le Kapeneta e le Minisita o Tupe. O le mea lena na fa’amaonia e le Kapeneta.”

Ina ia fa’amaonia e le o malamalama sui o le Tautua Samoa i mea o lo’o talanoa iai, na ta’ua ai e Tuila’epa se manatu sese mo Tupe Le-fa’atatauina, lea e tolu pasene o le tala ‘autu o le tupe mo le tausaga e tasi.

 “Na saunoa Palusalue fa’apea, e tatau ona tatou fa’aaoga le tupe lea mo le mu o le flea maketi i Savalalo,” o le fa’aaliga lea a Tuila’epa. “Ua mae’a ona fa’aaoga ma sa tu’uina atu i Matagaluega ‘ese’ese a le malo.” 

Na ta’u fo’i, o le tupe lea sa fa’aaoga e fa’atupe ai atina’e e le’i aofia i totonu o le tala o le tupe a ua mo’omia vave e le malo.

“O le mea lena sa fa’aaoga iai le tupe lea ma ‘ou te fia fa’ailoa manino atu lena mea aua, e foliga mai i saunoaga a le Ta’ita’i o le Itu Agai, e matua le-malamalama lava.” 

E o’o fo’i i popolega ona o ‘aitalafu a Samoa i atunu’u i fafo, lea ua o’o i le 1.4 piliona tala, na ta’ua e Tuila’epa, e leai se mea e ono popolevale ai. Na fa’amatala au’ili’ili, e le taua le aofa’i o le ‘aitalafu, a’o le malosi o le atunu’u e toe totogi, o le mea taua lea. 

Na toe fa’amanatu fo’i e le Palemia, le tele o tupe fa’aagaga mo fefa’ataua’iga a Samoa i atunu’u i fafo ma o fa’amoemoe e pei o le Fusu’aga i Parataiso i le vaiaso talu ai, e fesoasoani tele e si’isi’i atili ai le tamaoaiga.

“O le mafuaga lena e matua taua tele ai le fusu’aga lea, e fa’alauiloa atu ai Samoa ma una’ia fo’i tagata e asiasi mai i lo tatou atunu’u,” o lana saunoaga lea. 

“E le-mafai le-mafai ona tatou toe fo’i i tua i le mea sa sau ai, a’o le’i tula’i mai le HRPP.  I aso na, sa finau solo tagata i le fia maua o se pusa-elegi ma na i’u ai lava ina maliliu nisi o le tau-tulei.”

A fa’atusatusa i aso nei, na ta’ua e Tuila’epa, ua tau le taumamafa-elegi le atunu’u.

O le taimi lea, na le-lava ai le onosa’i ma fa’auilavei loa le Ta’ita’i  o le Itu Agai, Palusalue Fa’apo II.

Na tula’i Palu ma fa’atu se lafo, e fa’ase’e-‘ese ai le saunoga fa’aMinisita, a ia talanoaga i le taimi o felafolagoa’iga.

Ae na te’ena e Tuila’epa lea lafo.

Na ‘auai le Fofoga Fetalai, La’aulialemalietoa Leuatea Polataivao i le finagalo o le Palemia ma fa’apea ai, o le saunoaga fa’aMinisita, o le tali lea a le malo i tu’aa’iga le-fa’avaea a le Itu Agai na faia i tua atu o le Palemene.

O lo’o fa’aauau pea taualumaga o le Fono.  

© Samoa Observer 2016

Developed by Samoa Observer in Apia