Ta’uvalea le atunu’u i tagata e leai ni fai’ai

4210 Hits

O AI NEI TAGATA? O FEA E O-MAI AI A’O AI FO’I NI O LATOU MATUA? O le ata lea e le tau-fa’amatalā:  Ata mai le James Semisi Facebook.

O AI NEI TAGATA? O FEA E O-MAI AI A’O AI FO’I NI O LATOU MATUA? O le ata lea e le tau-fa’amatalā: Ata mai le James Semisi Facebook.

Ripotia e Tusitala o le Samoa Observer

Fa’aliliu e Maiava

 

Na fa’aalia le matua le-fiafia o le atunu’u ae maise fo’i Samoa o afifio ma papa’a’o i so’o se tulimanu o le lalolagi, ona o le au-ali’i lea ua iloa nei, o tagata e matua “leai-ni-fai’ai”, ona o taga ma aga na fa’aaliga i luga o mea-pu’eata a le televise i le taimi o le Fusu’aga Tele i Parataiso i le po o le Aso To’ona’i talu ai i le Malae Ta’alo o Faleata.

O le fusu’aga lea na fa’asalalauina-tu’usa’o e le Sky TV i totonu o Niu Sila, Ausetalia ma isi atunu’u o le lalolagi.

A’o aga ma taga a le to’alua lea e fa’aalia i le ata, sa faia a’o fa’agasolo fusu’aga o le po ina ua tu’u-sa’o atu iai le mea-pu’eata i le latou ‘au-tapua’i, ua mafua ai ona matua le-fiafia tagata-Samoa e le gata i totonu lava o le atunu’u nei, ae maise fo’i le mamalu o Samoa o lo’o papaa’ao i atunu’u i fafo, pei ona anoanoa’i ai tala salalau i luga o upega-tafa’iLagi.

Na fa’amatalaina e se tasi i luga o upega-tafa’iLagi, o “matua vale-saupa’u” nei tagata ma fa’apea ai: “Silasila i le fusu’aga o lo’o fa’asalalau-tu’usa’o i tulimanu o le lalolagi e fa’alauiloaina ai taleni a tama-fanau a le atunu’u. O se fa’amoemoe e seāseā ona maua e si o tatou atunu’u laititi, e talimalo ai i ta’aloga iloga fa’apea.

 “A’o lea ua fa’aaoga e le ‘au-ali’i ia e fa’aali mai ai le vaivai tele o le mafaufau ma le fa’avalevale ina tetele. ‘Ailoga o feola ni o latou matua. A’o le a se latou tala e fai i a latou fanau le-a’oa’ia.

“Afai o e i Samoa ae va’aia *** ia e to’alua, se fa’amolemole matua tu’u iai ni moko i gutu. ‘Ou te iloa e tatau lava ona iai se tagata na te silafia le ‘au-alii lea.”

E le’i maua lava se fa’amatalaga i le taimi nei, po’o ga’au nei o ai.

Pau le tala moni, sa nonofo le vaega lea i nofoaga fa’apitoa sa saunia, e maua fua ai le ‘ava-malosi i le po o fusu’aga.

“E ta’u mai lava e foliga ona matua ma aiga,” o le tasi lea tusi mai se tagata Samoa le-fiafia. “Manaia foliga ae matua la’iti tele fai’ai.” 

O le tala a se tasi sa i luga o Tusifoliga o lo’o fa’apea ai: “’Ou te manatu ‘ai o fa’apea o se ata o se telefoni fe’avea’i. Atonu o le le-masani pe a i mea-pu’eata.” 

O aga ma taga a ali’i ia, na avea ma ‘autu o talanoaga ina ua mae’a le fusu’aga mata’ina a Lupesoli’ai. 

O le isi fa’aletonu na va’aia ai se laufali (Samoa) o palauvale fa’aSamoa i se tasi o tama-fusu a’o faia fusu’aga. Na maua lelei fo’i e le mea-pu’eata sia fa’aletonu a’o fa’asalalau-tu’usa’o atu i Samoa ma le lalolagi aoao.

© Samoa Observer 2016

Developed by Samoa Observer in Apia