Molia ita i Nu’umalolo

904 Hits

 (Mai le Tusi RYHANAPOINCIANA SAMOA – Agafili Laau Tuitolovaa)


“TA FIA OLA E, manu ta te oti ta te le i iloa le amio a le matai Samoa”. O le saunoaga tutulu talatala lena a le Afioga a Lagisafua Maa, o se tasi o sui-fa’atu mo le Faiga Palota Aoao mo se Sui Usufono se toatasi o le Palemene, o le Itumalo Faaalalafaga o Manogi Ulupani, i le lima minute e tea ai le fa i le afiafi o le aso Faraile, 22 Fepuari, 1985.

O lea ua potopoto I le Maota le Komiti Faafoe a le Sui Faatu, o Lagisafua fa’atasi ai ma le toatele o matai ua tumu ai le fale ina ua tapunia aloaia le palota i le itula e tolu i le afiafi.

O le Itumalo lenei, e lua falepalota, aua e le gata ina toatele matai palota ae aitaumalele. O le falepalota i Nuutolu ma le falepalota i Nuufa.

Ua nofo ifo le failautusi sa i le falepalota I Nuutolu, si toeaina o Taupega Aokuso. Ua le lilo i le vaai uiga fiafia o Taupega, ua le matagata ai le manuia o Lagisafua i le falepalota lea. Ua ea ae Taupega ona fai atu lea, “Malo tapuai, ae ki faaleotele le tatou leitio”.

O Lagisafua sa aoaoina i aoga a le Ekalesia, ona sosoo ai lea ma le nofo aiga se ia oo ina matai. Ua onosefuluiva tausaga o lona soifua ma ua avea nei o ia ma Alii Matua o le nuu ma o el tofa lava lea i le Itumalo atoa. O ia o se tamalii e tautuaina aua e le gata ina toatele ona alo ae lelei foi lona tamaoaiga, peitai e leai sana mea mautu ua faia. E iai nai ana ovi, e feololo foi ana mea fafaga. 

O Lagisafua foi e le o sona loto na alu ai I le palota, a o le faaoso e tagata. Ua geno atu Lagisafua e lau mai pia, ma meaai. E lei toe faatali le faletua o Tausala I el fai ane loa o faaaloaloga. O uiga ia o le fafine, e muliga ni oli a o ni foli i le laufofoga fiafia. 

O le maota, e mau e taumamafa mau e e inupia ae maise lava le autalavou. Ua fai foi talamalie a mataiua malie ai a latou suaga, ma faalogologo lava I le leitio.

Ua faasolo pea le lauga o faaiuga o palota mai itumalo eseese o le atunuu. Ua faatalitali foi ma le le popole Lagisafua ma lana failautusi aua ua la mautinoa lelei, e luaselau ma le ono matai palota o le itumalo, a o le la numera sa tausi mai lava e lei taitai le palota, e salau onosefuluono. O lona uiga, na o le fasefulu palota o le a faasoa mo le isi toalua o Sui Faatutu o le latou Itumalo.

E o’o mai la I le aso o le palota, ua matua totolo lava I tuli le alii matua I faiga a le selau onogafulu ma le ono. Ua leai se povi, leai se puaa ae toe o le matuamoa saveu. E ui lava la ina toa lelei Lagisafua, ae avea lava lona mafaufau I le po ua mavae, le po lea o le Aso Tofi i le tele o taavale fealamuai i le nuu ae le masani ai. Ua taufaauiga foi i lona mafaufau le tala a lona atalii sa nanunanu ai, e uiga i tamaloloa e toalua ma le atopau uliuli na vaai o talanoa I tuapola ma lona uso moni lava, e tina faatasi ma tama faatasi, o Olotuli Moa pe o le itula e fa i le vaveao. Ua mafaufau Lagisafua I lana usuga i le taeao e momoli le failautusi i le falepalota lona lua I Nuufa, ae foi mai le taavale ae oso ae i luga lana tama autu o Toalei Mati.

O Toalei, o le tuua o le nuu la o Nuufa ma o ia lava sa ave iai le fatutuaga o Lagisafua aua o le uo mamae. Sa tele foi ni faaupuga ma ni folafolaga fasese mafaufau a Toalei, na talitonu ai Lagisafua, a o le mea ua tupu, o Toalei na tofi e vaaia le palota I Nuufa e toalua ma le failautusi, a o lea ua oso mai i luga o le taavale ma le vailima. E foliga mai e lei moe Toalei i le po atoa, pe a fua i lona ona ma le tautalatala, a lea e lei oso le la, pei ua iai se mea ua tupu.

Ua sii i luga le ipu pia a Lagisafua ona miti lea ma tuu i lalo ae faasalalau mai loa i le 2AP:

“O lea ua taunuu mai le iuga o le palota o le Itumalo Faaalalafaga o Manogi Ulupani. Iuga o le palota mai le falepalota i Nuutolu. 

Sui na faatutu mai: Palota na maua

Lagisafua Maa 50

Moemalefoa Naoupu 30

Vaamomole Tovi 45

Palota le aoga 0

“Toe tasi le falepalota o le Itumalo lenei e lei taunuu mai ona maua lea o le faaiuga”.

O le taimi fiafia lea o le maota aua ua malie le tala ua fia faalogo iai taliga. Ua pati le maota o matai. E oo foi i le umukuka, ua feei ma tuliususu.

O le taimi foi lena ua tau fai gugutu lea i lea ma faapea o ia lava sat u malosi aua le alii matua. Ua lele i le ea faaupuga a matai.

“Ua malo tatou”.

“A sau nei ma le iuga o le palota i Nuufa, o lona uiga ua sili mamao”.

Manuia lou tofi lau Afioga i le Alii Faipule”.

“Matou te le faatamala leaga o oe o le tama o le nuu e ave iai le faamuamua”. 

E lei uma lelei le pisa o Matai ae sau loa le iuga o le falepalota i Nuufa, ma e faitauina faapenei:

“Iuga o el palota mai le falepalota i Nuufa mo le Itumalo Faaalalafaga o Manogi Ulupani.

Sui na faatutu mai: Palota na maua

Lagisafua Maa 1

Moemalefoa Naoupu 4

Vaamomole Tovi 20

Palota le aoga 2

 

Aofaiga o le palota: Palota ua maua

Lagisafua Maa 51

Moemalefoa Naoupu 34

Vaamomole Tovi 65

Aofai o palota 152

Palota le aoga ona ua sese ona fai 2

 

O lea ou te faasilasila atu ai, o Vaamomole Tovi ua taua i luga, e faapea ua filifilia”. 

Ua goga le fale atoa. Ua leai se matai e tautala. O Lagisafua, pei e ai e loata ua le nofo lelei. O le ipupia i lona lima ua masaa, se ia oo ina pau ifo ua nuti i le fola o le fale.

O Tausala lona faletua, pei e le talitonu. Ua palasi i lalo ipu meaai sa uu i lona lima ma taape i uga o le mutia le sapasui, vaemoa, povimasima ma ia, ae savali mai i le fale ma tagi. “Auoi makua kou le alolofa. Kiga oga kou iloa ua kau i le ua le gau o si koiiga ae kou omai lava o kupe, kupe, pia pia i aso uma, a o legei ua kou sosola. Lea ua lau mai le palota makua koalaikiki ae po o ai gei mau kagaka ua kumu ai le fale”. 

O matai, ua lagona e le tagata lava ia lona le faamaoni i ana folafolaga ona tu lemu lea ma savali faanounou i le faitotoa pei se tagata ua tumu i le faaaloalo ma faapea ana upu, “Sou sau i i! Tulou tulou!”

Ua nimo le temoni, ma lona manava ua tautau ua tumu i pia, o tupe, o fasi mamoe, ma ia lapopoa, na maua i le auala a Iuta le faalealofa.

Ua liliu ma le mafatia Lagisafua ma faasolo lana vaai i matai. Ua le o nofo mai lona uso o Olotuli Moa, ai ua fafao i totonu o le atopau uliuli a tamaloloa. Ua nimo foi Toalei Mati sa onaona i le pasi i le taeao ma tauvalaau, “Ua tasi ia Lagisafua. Palota mo Lagisafua”. 

Talofa ia Toalei Mati, ua fua i le fua faatautau e le alii matua. Po o le a foi se lelei o sana lauga, a ua pei o le sumepalo tagitagi. E le tio foi se isi, na ona paepae o le ulu, a o le tafe a le vaipapau. Ua le vaaia foi se tino o matai e nonofo i Apia ua uma ona ave o latou pasese e o mai ai i le palota. Po o le a le mea ua tupu? 

© Samoa Observer 2016

Developed by Samoa Observer in Apia