O LA’U TALA FO’I

242 Hits

1. Matauina foi i Tala Fou- fai mai o lea ua fai feutanaiga a le Malo ma Saina pe mafai ona latou faatupeina se fale e ta’u o le Maota Tutotonu o le Malo- e 15 fogafale. O lea la fuafuaga ua uma ona faamaonia e le Palemia i le faagasologa o le latou talanoaga ma nusipepa i vaiaso ta’itasi.

O le nofoaga la o lea fale fou o le Malo ua fuafuaina-o le mea tonu lava lea sa i ai le Flea Maketi lea na faatama’ia e le afi talu ai nei.  

O lea la feutanaiga-fai mai le Palemia ua uma ona faailoa atu e le Amapasa o Saina talu ai nei-ua talia e Saina lea fuafuaga a le Malo. E tusa ai ma le faaaliga a le Palemia-e matua talafeagai le faatinoina o lea fuafuaga i le nofoaga sa i ai le Flea Maketi talu ai.

O le faamoemoe la o le Malo i le matau au i ai-ia tasi se nofoaga mo matagaluega uma ma faalapotopotoga a le Malo-ina ia faigofie ai mo tagata o le atunuu-ona maua matagaluega uma i se nofoaga e tasi. 

E aliali mai la i lenei fuafuaga a le Malo- o le galuega lea ua ave i ai le faamuamua! O le fesili la- o le a la le mea a fai i nofoaga o matagaluega ma faalapotopotoga a le Malo o loo i ai nei-pe afai o le a faatasitasi uma i le nofoaga e tasi? 

O lona lua- a faapefea tupe a le atunuu na alu ai i le faiga o fale mo ia matagaluega ma faalapotopotoga?  Aisea ua le mafai ai ona faaaoga mo lea faamoemoe le Fale o le Malo o loo i le Eleele Fou i Matagialalua? 

A le o lena foi- aisea e le faaaoga ai le Fale Tuai o le Malo i le Eleele Fou ma le maota o Tuiatua mo matagaluega uma-ona faigofie lava lea i le atunuu-pe afai e lua nofoaga e maua uma i ai matagaluega ma faalapotopotoga a le Malo?

Afai la ua talia e Saina lea fuafuaga-o le a la le ta’u o lea fesoasoani a Saina? O se foa’i faa-meaalofa poo se faaunegatupe? Afai o se faaunegatupe-o ai e totogiina?  O le fesili taua lava-o a ni tuutuuga ua fai ma Saina?

O lona uiga- e i ai se mea e faamau a’i pe afai o se faaunegatupe? E faamau i ni fanua o le Malo poo ni fanua faale-aganiuu?  O le itu la e ofo ai i lenei fuafuaga-o le vave ona maua le faiga e faatino ai-ae a tuu ane i le mativa masaesae o le atunuu I le taimi nei-e le o faamuamuaina e le faiga-malo!

O le mea lea- afai la o se isi foi lea faaunegatupe-o le atunuu foi e totogiina; afai foi o i ai ni aiaiga tau meatotino e faamau a’i-o ni meatotino a le Malo o loo faamau ai ia faaunegatupe-e tatau lava ona faamanino mai i le atunuu-o le pogai- e le o ni eleele o le HRPP a’o eleele o le atunuu; afai foi o faamau i eleele faale-aganuu- e le o ni eleele fo’i o le HRPP-a’o eleele o Samoa atoa!

Ia manatua lelei-ua uma ona faatau atu Tusi Folau Samoa i Saina! Ia manatua foi- afai sa totogi e tagata o le atunuu ia sa faaaogaina le Flea Maketi ni lisi mo le faaaogaina o lea nofoaga, o le fesili-o ai le matagaluega poo le faalapotopotoga na totogi i ai? O fea la ua ave i ai na tupe? O le a la sou taofi?

 

2. Mataauina foi i Tala Fou le faiga a se pagota i se tasi o aiga i Vaiusu. O le mau a lea aiga-o taimi uma lava e tatala mai ai i tua lenei pagota-e tatau lava ona i ai ni mea tutupu i lo latou nuuu e pei o le faatupu vevesi ma le inu ‘ava! O le fesili la-afai o le faamoemoe o nei mea o parola ia alu ai le pagota i lona aiga ina ia toe maua ai se suiga o le olaga-ae le o faaaogaina ma le tatau e nei pagota.

O le fesili la-afai ua o’o atu i Leoleo le faasea a lea aiga ona o lea pagota-o le a le pogai e tatala so’o ai i tua ae le o faaaogaina ma le tatau le avanoa? Afai la e sau i tua ma faaauau pea aga faiga tuai, o lona uiga- e leai se aoaoga o maua ai! Afai o iloa e le Komesina o Falepuipui e le o aoga lea fuafuaga mo lea pagota-aisea e saga faataga mai ai I fafo? Afai la e tumau pea le faatupu faalavelave o lea pagota-e pei o le faamata’u o lea aiga-e le tatau ona toe faataga maia i tua.

E faapefea pe a afaina ai se tasi? Aisea ua le mafai ai e Leoleo ona faatino o latou tiute o le saili o lea pagota ma toe ave i le falepuipui? E mafua ona o le fefefe i le pagota pe ona e aiga ma lea pagota? E leai se mea faapena o le falepuipui ona o le solitulafono-ae parola mai i tua fai le mea e loto i ai? O le a sou taofi? 

 

3. Matauina foi i Tala Fou fuafuaga a le Tautua Samoa Party mo a’oa’oga. O lea la fuafuaga o le faavaeina lea o se Faaputugatupe Tau Aoaoga e mafai ai e tamaiti ona saili fesoasoani i ai mo le totogiina o lana a’oga i le Kolisi ma le Iunivesite. E tusa ai la ma le faaaliga a le Minisita Faaolioli o Tupe a le Tautua Samoa Party o Afualo Dr. Wood Salele- o lea taumafaiga o loo atagia ai le noatia o le Tautua Samoa Party ma lona faatauaina o Aoa’oga mo le fanau.

I le taimi nei- o loo fesoasoani le malo i a’oaoga e ala i le totogiina o pili a’oga mo le Tausaga 1-Tausaga 8; ma i le taimi nei-ua fesoasoani foi i le Tausaga 9-11-mai tupe o fesoasoani a Niu Sila ma Ausetalia. I le taimi nei la-o lea ua totogi e le Malo le Tausaga 1-Tausaga 11, ae totogi e matua le Tausaga 12 ma le Iunivesite.Fai mai la Afualo, afai o oe e te  faatata’otoina faiga faavae- e tatau foi ona noatia ai oe- e te faatinoina lea auaunaga ma le alofa i fanau.

O le finagalo la o Afualo o lenei fuafuaga- e tolu ona vaega-muamua o matua, o lona lua o le atunuu poo le malo ma lona tolu o le tagata e faatinoina po tamaiti a’oga. Afai la o se fuafuaga lelei lenei ae le o faatinoina e le Malo- e tatau la i matua uma lava ona latou lagolagoina-leaga o le mea e manuia ai fanau ma lo latou lumana’i.O le a sou taofi? 

 

4. Matauina foi i Tala Fou o lea foi ua i ai se Vaega e fesoasoani i tagata sa pagota muamua.O lona uiga la- o lea ua faavae se sosaiete poo se faalapotopotoga a tagata sa pagota muamua ma ua matua lagolagoina e le Palemia ma le Minisita o Leoleo ma Falepuipui. Fai mai e sili atu i le 15 tagata sa pagota muamua e afua mai le matua e 40 tausaga i le 75-ia ua ofo atu le latou fesoasoani i le Pulega o Falepuipui e taofi ai le sosola i tua o pagota faatasi ai ma le tagofia o mataupu tau aia tatau a tagata. 

O le sui faavae autu o le Sosaiete a le Gauigana-o ia lea sa pagota muamua o Tofilau Faamanu Isara lea fai mai o le 60 ma le 70 pasene  o e sa pagota muamua ua ofo atu le latou fesoasoani  i le Pulega o Falepuipui. Ia atonu o se mea aoga foi lea- e mafai ai e pagota fou ma le laiti ona faalogo i tama matutua ua fo’i mai ai- e leai se aoga! O le tatalo la- ia tumau pea i aso uma le faamoemoe autu o lea faalapotopotoga-o le tineia lea o soligatulafono ma mea leaga ae toe foi i le Atua-ona matua fou atoatoa lea o mea uma e pei o le taavale fou! O le a sou taofi?

© Samoa Observer 2016

Developed by Samoa Observer in Apia