Lauga - “Na ou iloa oe i lalo o le mati”

Tusia Rev. Petaia Setu ,

915 Hits

Rev. Petaia Setu

Rev. Petaia Setu

“O fea o iai le Atua?” O le fesili masani lea o loo a’oa’oina ai fanau a le Ekalesia. O le tali – O loo i mea uma lava le AtuaO lona uiga, o le Atua auai. E le gata ina iai i mea uma lava, ae na te silafia mea uma lava. Fai mai Natanielu, “Na ’e iloa a’u i fea?” Tali Iesu, Na ou iloa oe i lalo o le mati”

Autu: Faailoa lou tagata moni.

O le silafaga a le Atua, e manino i mea uma lava. Poo lalo o le mati, poo luga i le lagi, poo fea lava, e le lilo. Auā fai mai Tavita, “O loo iai lava oe le Atua” (Sal.139:7-8). E le aoga la ona ati o so tatou ’olo! E le tatau foi ona tatou pepelo. O gafea tatou te lilo ai? E le i faia e le Atua se faafoliga poo se faalilolilo. E le manaomia foi la e le Atua ni o tatou tagata lilo.

O le tagata moni, o le tagata lava na faia e le Atua i ona foliga pa’ia. Na faia i le finagalo alofa o le Atua, i le amiotonu a le Atua, i le ma le faamoemoe lelei o le Atua. O le uiga pa’ia lea o le Atua e le gata ina tatou te molimauina atu i tagata, ae tatou te saili atu ai foi i le Atua i aso uma lava.

O Natanielu, o le Pesesaita i Kalilaia. Na faailoa iai e Filipo le Mesia, o le atalii o Iosefa, o le Nasareta. I le manatu o Natanielu, se a se mea lelei e tupu mai le faatauvaa? O le loto lea na iloa e Iesu i lalo o le mati. E le ’alu’alua. E le o se ’a’amu poo se vaai maualalo. E le o fai mai Natanielu – E leai; a o le, E mafai ea? Sa’o le loto; tatau le manatu. Auā o tatou, e vave tele ona tatou faia se faaiuga. O a tatou faaiuga e le gata ina faale tagata, ae latalata mai lava. Fai mai Iesu – Na ou iloa oe a o le i valaau atu Filipo ia te oe. E mamao lava le silafaga ati a le Atua i o tatou tagata taitoatasi. O la Paulo i le ekalesia i Kolose, e ulumatua Iesu i mea uma lava na faia. Ioe, a o le i fanau mai mauga, o le vanimonimo, ma le sami, ua iai Iesu. A o le i lalafi Atamu ma Eva, ua iai Iesu. A o le i faatafai solo atu oe ma a’u i o tatou tagata lilo, ua leva ona iai Iesu i lalo o lou mati. Ua faapea le upu a le isi a’oa’o sa i le Kolisi, ‘A ua ku i le negative, negative loa’ Talofa e, na te’a ai lava; ma ua negative atu ai lava ma lona olaga. Samoa e, e te le malo i sou tagata lilo. O le Atua, o le AO. E te ta’alo i le pouliuli, ae aumai e le Atua i luma i le malamalama (II Sam12:12). Tatou te le maua i le lalolagi nei so tatou lafitaga. Na iai Iesu ae tatou te le i iai i le manava. O mai i luma. O mai i luma. Fai mai Filipo, Sau e vaai (f.46) Sau e vaai i foliga na faia ai oe! E mamā. E pa’ia. E faamaoni. E alofa. Samoa, e le i faaluafesasi le loto o Natanielu. Ae faapefea oe? E te mā iā ai? E te popole i ou tulaga faale malo/ faale ekalesia? Tatou te mumusu i tu’ua’ina lo tatou poto ma faatasina o tatou faailoga ae mea ane, o loo ua silafia oe ma a’u e Ieova? “Na ou iloa oe a o le i valaauina oe.” E mulia’i ona tatou faatafai, a o le Atua na te nainai. Mai o tatou tumua’i e o’o i matiutiuvae o loo saili ai e le Atua lana tagata na fai. O fea lou tagata moni? Samoa,  ’aua le kami. O Iesu e faasasa’o lava. “Faauta, o le Isaraelu moni, e leai sona pepelo.” O le uiga lea o le igoa o Natanielu – “Ua aumaia e le Atua” E le o se Natanielu faafoliga. E le o se ati pa poo se tautuua’i solo. O le loto moni lea sa i lalo o le mati. O le Natanielu mamā lea ua sau sa’o ia Iesu. O lona tagata moni lea ua taulagi e le Mesia (f.47). O le tagata moni ua aumaia e le Atua na te ta’utino le moni, Rapi e, o oe lava o le Alo o le Atua. O oe lava o le Tupu” Oka, se manaia o lagona tuu sa’o! Fai mautinoa. Fai mamā.

O le ola faafoliga ma le galue i luma o mata, ua vaoa ai olaga o o tatou tagata. Ua fau lava e le tagata lona tagata lilo ma aumai ai ana fuafuaga lilo. Ua telegese nisi vaega o le atunuu, ae ua saoasaoa tele ai le ekalesia kerisiano! A o le itu e maofa tele ai, ua le o se fausaga lea a le Atua. Samoa e, toe silasila lelei ma faitau manino ma le toto’a i le Mataio 23,  i le faūga o le tagata lilo a le alii o le lalolagi. O le mana’o ua le faamălieina. O le tu’inanau ua to! Ua fanau mai ai le tagata lilo (agasala) e le i faia e le Atua.

E afua ona tatou lalafi solo, ona ua te’ena Iesu i o tatou loto. O le naunautai o Natanielu, ia maua se mea lelei. E lelei mo tagata uma. E fiafia ai tagata uma. E saoloto ma manuia ai tagata uma. E le i lafi i se ata o se niu. Ua sau e vaai. O le vaai mo isi ae le faapito mo ia. O le vaai mo oe ma lau fanau ma lou aiga. O le vaai mo le Ekalesia ma le atunuu atoa.

Samoa e, a o afaina se isi ia te oe, alu ese ma lou tagata lilo. A o e inu i le ola ma le malosi o le isi tagata, e le o lou tagata moni lena na faia ai oe e le Atua. Fai mai isi,  O mea o lea e fai i lalo nei. Ioe, ae le i tuuina e le Atua se tagata lilo i lalo nei. E le mafai ona manuia ma saoloto Samoa pe a e le tu mai i lou tagata moni. E faapefea ona faaolaina tagata lotu pe afai e le o lou tagata moni lena? E le siligia le silafaga a le Atua. E iloa oe e Iesu i mea uma e te iai. Sau loa! Sau e vaai. O le sesē e sa’o ai. Vaai i le liliuina o Saulo ia Paulo (Galu.9:6). O le pagota i luga o le satauro (Lk.23:40-42); o le fafine Samaria (Ioa.4:19,28-29); o Maria le Makatala (Lk.8:1-3); o le leoleo o le falepuipui (Galu.16:29-33). A o afea oe? O afea e te sau sa’o ai i luma i lou tagata moni? O upu o alofaga a le atunuu, E auomala, auomala, auomanū.

Samoa e, o lou valaauina, o le tautinoga o lou tagata moni. Ia paleni lou loto, ma le taulagi a Iesu (f.47). Ia sa’o lou tagata, ma le faamoemoe o le Atua na faia ai oe i le amataga. Manatua upu a toeaiina, ‘E ese lē e faalele ese lē e maitau,’ E te fiu e kami, Na ou iloa lava oe i lalo o le mati.

Samoa e, e sau malama.

Amene

7737063/7783782

© Samoa Observer 2016

Developed by Samoa Observer in Apia