Tele fa'afitauli pe afai e mativa
O fanau o le lumanai lea o aiga, nu’u ma ekalesia. O le faasilisiliga oi latou o le mealofa mai le Atua.
O le tina ia Moamoa Kitiona mai Lotofaga – Uta na maua le avanoa e le Fofoga o Samoa e faatalatalanoaina ai i faafitauli o le olaga.
“Ou te lē manao e ola lau fanau i se olaga matitiva e pei o lou olaga.”
“O au e toalima lau fanau. O i maua uma ma lou toalua e lē faigaluega. Ae o le seleni maua a lo matou aiga o le faatauina lea o koko. A maua le seleni I le aso e na’o le $20 tala pe lalo ifo.”
“Ese ma le faigata o le tilotilo atu i si au fanau e tusa ai ma le faigata o le soifuaga o loo matou ola ai nei.”
“O au le tina e iai le lagona e fia manao e faatino manaoga o le fanau o loo fetagisi mai ai . O loo noa lava i lo latou mafaufau le faigata ma le nofo ai I lenei olaga mativa. Ou te iloa foi e faigata lava ona faamalamalama i le fanau lea itu.”
“E lē na’o le faatinoina o latou manaoga poo mea o loo fetagisi mai ai ae e le’o mafai foi e au le tina ma le tama o le aiga ona tausi le fanau i se fale lelei e soifua ma ola ifo ai.”
Taua e le tina nisi o itu e lagona ai le faanoanoa ae o le alofa faale-tina mo lana fanau.
“E leai ni fala matou te momoe ai ua na o le ta’inamu o loo iai. E tū mamao le matou paipa, a manaomia le suavai ona tuli lea o si ou atalii ua 8 tausaga le matua ma le pakeke e asu mai ai le vai e faaaoga mo le gaseseina o taumafa, fufuluina o ipu ma isi lava feau.”
“Out e talitonu lava au, o le avea ai o au ma tina o se mealofa pitosili lea ona taua ua foai mai au, 29 tausaga e ui o loo omai faatasi lava ma faafitauli o le olaga.”
“E le gafatia foi le faatauina o taga pepa lapisi e tu’u ai lapisi.
O loo faaaoga lava ato ua le toe aoga e faatali ai le taavale lapisi e sau ma ave ese atu ai.”
“Faigata tele le olaga.”