Ia manuia taumafaiga uma

By Sarafina Sanerivi 26 November 2016, 12:00AM

E afea e le Fofoga o Samoa le aiga o le  tamā i a Lohia Levasa, 56 le matua o le soifua o le afio’aga o Uafato Fagaloa i le aso ananafi o lo’o galulue i le taina lea o mea taulima aua se tupe maua.

O se fa’amanuiaga na fa’aalia e Lohia ua leva ona fa’atinoina e ia, faletua ma le fanau i le silia ma le 20 tausaga.

Aepeita’i, o so’o se atina’e lava e i ai lava nisi o vaega e silasila mamao i ai mo le manuia alu i luma o so’o se taumafaiga.

“I a  te a’u lava ia e feololo le seleni o lo’o maua e matou ae sili atu le au vaega lea o lo’o matou fa’atauina atu ai oloa nei.

“Aua  pe a ma le $100 e matou te fa’atau atu ai le mea taulima e tasi e pei o le nifooti, to’oto’o ma isi, ae $200 i le $300 e ave ai e nisi pe a o latou toe fa’atau atu , ia e fai lava sina gau laititi lava o matou.

“O le taimi lenei o lo’o ua manatunatu lava i le malo ina ia silasila i vaega nei aua  se alafua po o se ta’iala fo’i e fa’atino ai fefa’asuia’iga atu o oloa i isi tagata.

 “E pei e manaia se tulafono ina ia fa’amalieina uma ai vaega uma e lua.

 “Aua e ova atu le tau o latou nai lo matou, aua e pei e maitau atu e maua ma le filemu mea uma e le ‘au omai fa’atau atu,  aua na o lava teu i totonu o potu ma aumai i fafo, a’o matou e tauamo mai luga le mauga, e su’e le penisini o auala e fa’atino ai i aso uma.

“Ae i a te a’u lava ia, e pei o lea se fa’anaunauta’iga, aua e tigaina lava fo’i lenei galuega.

E ui i lea itu e pei na fa’ailoa e Lohia, ae o lo’o sologa lelei mea uma.

“O a’u ou te le’o ta meataulima  e kiliva i le maketi ae o nisi o faleoloa e pei ona i Levili ia ma se tasi o faleoloa lea o lo’o ave i ai.

“E pei o nai pisinisi nei o lo’o ua alolofa ma aumai faitoto’a e avatu ai mea taulima ma ou te le so’ona alu lava i se isi faleoloa.

“O si o matou aiga o le tele o tausaga ua tuana’i sa ola muamua i le popo, ia alualu le popo uma ,ia o le ava...ia uma fo’i  le lelei o le ava na vaitaimi ae ina ua pologa i le leaga le fua o le ava ia lena na amata ai loa meataulima.

“Ia masalo pe a ma le 20 tausaga o matou faia le galuega lenei i le aiga , e le gata o i matou ae o lenei vaega o Uafato.

“O le alo o Tuimalatu i Uafato na aumaia le taleni lenei i Uafato i le 30 tausaga talu ma o lea la ua fai lava ma fa’amanuiaga i le to’atele.

“Ia e mo le silafia ai, e ave lava i vaiaso uma meataulima, ma e $900 le tupe e maua le vaiaso, ma o lo’o ua fesoasoani lea i le tele o vaega e fia fa’ataunu’uina i le aiga aemaise o le lumana’i.

By Sarafina Sanerivi 26 November 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>