Ia tinoū

Tusia Ilia L Likou ,

45 Hits

Eteuati Motusaga.

Eteuati Motusaga.

E maua le fa’atalatalanoaga a Eteuati Motusaga ma le Fofoga o Samoa i le aso ananafi o lo’o aga’i atu o ia i le aoga.

O Eteuati  e sau mai Lano Savai’i ma o le taimi lenei olo’o nofo o ia i le tuagane olona tinā i Si’usega.

“Ia o lo’u ia lava olaga atoa o Savai’i ma ina ua uma aoga i le tausaga lea i le Don Bosco i Savai’i e pei o lea le tulaga na mafua ai loa ona o’o mai iinei.”

“O a’u ia e leai lava se manatu e sau e fa’aauau nei aoga, ona o le va’ai alofa i nai o’u matua aemaise ole ausage o si o matou aiga.”

“Ae o si o’u uncle lava na tauanauina a’u fa’atasi ai ma matua ina ia ou sau e su’e se avanoa i’inei mo le fa’aauauina o aoga.”

Na ia taua ‘ia e mo le silafia ai o si o matou aiga e fa’alagolago lava i le popo ma le ma’umaga.

“E pei ona ou fa’ailoa muamua atu, ia e ausage lava, ae e taumafai lava mea uma ina ia i’u manuia aoga o lo’o ua i ai nei.”

“Ia ua o tatou iloa lava lenei vaitau, ua faigata ma taugata lava le tau o le soifuaga ma o se itu e ao lava ona o tatou silasila i ai aua le aga’i atu ai le lumana’i.”

“I a te a’u lava ia ia e leai lava se isi mea o va’avaai ai le  taimi lenei, o le taumafai lava ina ia fa’atino o so’o se taumafaiga ina ia i’u lelei mea uma lava o lo’o taumafai i ai.”

O lona finagalo e leai lava se isi tali e taumafai ai.

“Ia tali lava i se tali e fa’afiafiaina ai le tapuaiga a aiga, i a te a’u lava ia ou te iloa e tele lava se fa’amoemoega o lo’o mana’o ai matua mo a’u.”

“O le taumafai lava ina ia fa’atino o so’o se vaega aua le aga’i atu ai le lumana’i.”

Ae peita’i, e le mafai ona ausia lea tulaga e aunoa ma se seleni.

“Ia e pei o lea lava le tulaga olo’o i ai nei, e faigata lava le tele o taimi ona o tupe lava o lo’o talanoa ai  taimi uma mo lenei fa’amoemoe.”

“O se itu o lo’o avea lava lea ma lu’i i a te a’u lava ia, ina ia taumafai pea aua e le faigofie le tausaili mai o tupe mo le fa’aauauina o la’u aoga.”

© Samoa Observer 2016

Developed by Samoa Observer in Apia