E manuia pe ā onosa’i

Tusia Vatapuia Maiava ma Ilia L Likou ,

144 Hits

Fa’ai’u Nikolao.

Fa’ai’u Nikolao.

O le aso ananafi na afea ai e le Fofoga o Samoa le tinā i a Fa’ai’u Nikolao, 26 le matua o le soifua o Nu’u Fou.

O Fa’ai’u ua to’atolu o la alo ma le tamā o le aiga.

Na ia fa’ailoa i le fatalatalanoaga ma le Fofoga o Samoa i le aso ananafi e fa’apea , o lo’o solosolo lelei lava le tausiga o le aiga i aso uma e ui ina i ai fo’i aso ua le sologa lelei ai le tele o fa’atinoga i totonu o le aiga.

“Ia o lea e sekueli lava mea uma i lenei vaega o le atunu’u  o lo’o aumau ai i le taimi lenei, e ui lava ina i ai fo’i aso e i ai fa’afitauli.

“Ia o fa’afitauli masani lava e pei o le lava o le fa’asoa i le tele o vaega.

“Ae o le fa’amoemoe lava i le Atua e fesoasoani mai o lo’o mafaia ai lava le tele o vaega.

I le fesiligia ai o Fa’ai’u i le tulaga tau i le tupe fa’asoasoa i le tausiga o le aiga, na ia ioe o lo’o tele lava le fesoasoani o nisi o le aiga o lo’o galulue mo le aga’i i luma .

“Ia o lo’u to’alua ma le tinā e pei o la’ua o lo’o galulue i le taimi lenei ma o lo’o lelei le fa’asoa.

“E pei o le tulaga masani lava e pei ona i ai le soifuaga o lo’o o tatou ola ma soifua ai, o aso ua i ai tupe ia o aso ua leai.

“O lo’u iloa i ai , o lo’o ua faigata nei aso, ae leai se mea e pito sili ona mafanafana i le loto, pe a talitonu e le tu’ulafoa’ina i tatou e le Atua i taimi uma.

“I lo’u manatu ia a fa’amoemoe i le Atua, ia e faigofie lava mea uma ma le sologa lelei ai o lenei olaga.

“Ua polepole vave le tele o taimi ae o le mea taua o le maua lava o le lototele ma le onosa’i i le tele o fa’afitauli e lutia ai le ola.

“O lo’o sologa lelei lava o matou  vaifale ma nai aiga tuaoi e leai ni tagata fa’asoesa pe fa’apisapisa fo’i i le tele o taimi.

“Ia  o le mea masani fo’i lava o le a le tele o mea fai, e faigiofie lava mea uma, po o le a le loloto lava le sau o le lalolagi ma fa’afefefe mai.

“Ia o le tumau lava i le Ali’i ma o le fa’amoemoe sili lea mo i tatou, ua le’o toe faigofie nei aso, ae o le tumau lava i le fa’atuatua o le a solosolo lelei ai vaega uma.

“Ia o le tele lava o suiga o lo’o ua lofia ai le ola ma le soifua ia o le tele fo’i lea o suiga o lo’o ua tatou feagai pea ae o le tu malosi lava ma finau i mea lelei aua le tausiga o fanau ma aiga.

© Samoa Observer 2016

Developed by Samoa Observer in Apia