E le’o mea lelei uma e tonu ma sa’o

Tusia Vatapuia Maiava ma Sarafina Sanerivi ,

177 Hits

 Tole’afoa Matuavao Ainea Poasa ma lona faletua ia Pele mai le afioaga o Tulaele.

Tole’afoa Matuavao Ainea Poasa ma lona faletua ia Pele mai le afioaga o Tulaele.

“O mea lelei i le olaga, e le’o mea moni ma sa’o.”

O le finagalo lea o Tole’afoa Matuavao Ainea Poasa, e 69 tausaga mai le afioaga o Tulaele. 

Na fa’ailoa mai e Tole’afoa, so’o se mea lelei lava i lenei olaga, o lo’o iai lava ma le fili e taumafai e fa’aleaga. 

“E le’o mea lelei e tonu ma sa’o,” o lana fa’aaliga lea. 

“E le fa’apea a e faia se mea lelei ona sa’o ai lea ma tonu. Leai!”

O le a le mea moni ma mea tonu?

Na ta’ua e Tole’afoa, o le mea moni o le faia lea o le finagalo o le Atua. 

“O le mea tonu lava lena. O le faia o mea e fiafia ai le Atua. E le o le fa’apea a lelei lou olaga ona tonu ai lea ma sa’o. O le ala tonu a e tatau ona ola ai le tagata o le mulimuli lea i fetalaiga a le Atua. 

“O le alofa lava e pogai mai ai mea tonu ma mea moni e fai. A e alofa i le Atua, e te faia foi lona finagalo ma e tonu foi au mea e fai. A e alofa foi i lou aiga ma ou tuā’oi, e fa’apena foi ona alolofa mai tagata iā te oe. A sa’o lava le mea e fa’amuamua e le tagata ma fa’alagolago i le Ali’i, e fa’atonu mai foi e le Atua o tatou ala.”

Na fesiligia le tamā ia Tole’afoa mo sona finagalo i le tulaga ua iai le soifuaga i Samoa i lenei vaitau, ae na ia fa’ailoa mai, ua tele lava suiga o le olaga i aso nei. 

“Ua amata ona mou atu le olaga fa’asamoa na masani ai le atunu’u.

“O mea uma lava e amata mai i totonu o le aiga. A lelei aiga, e lelei foi nu’u, ekalesia ma le atunu’u. 

A maopoopo ma fealofani e aiga ta’itasi, e fa’apena foi ona maopoopo nu’u ma ekalesia. 

“Mai lava i le amataga, ua uma ona fa’ata’atitia e o tatou tua’a ua lagomau mai ti’asa le itua’iga olaga e tatau ona ola ai le Samoa. O so’o se aiga Samoa lava, o le matai lava le ulu o le aiga, ma o ia e fa’aigoa o le tausi mea a le aiga. O ia e iai le maopoopoga o le aiga. Na te faia fa’aiuga ma fa’atonu le aiga ma le fanau i mea e tatau ona savavali ai. 

“O i latou foi ua tuuina iai le pule e tausi aiga, ma e falologo uma ai foi le aiga i le matai. 

“Ma o le ala lenā na faigofie ai le olaga i aso ua tauna’i aua e tasi lava le leo na fa’alogo uma iai le aiga.”

Ae peita’i, o le manatu o Tole’afoa, ua tele lava le suiga o Samoa i lenei vaitau. 

“Ua telē lava le suiga o le olaga ma aganu’u a Samoa ua iai i lenei vaitau. O Samoa e fa’avae i le Atua. Ae fa’afefea na famai e fa’avae i le Atua pe afai o lo’o iai le fasioti tagata ma le tele o le mau fa’afitauli i totonu o Samoa?”

E le gata i lea, o le manatu o Tole’afoa, ua mafua mai le tele o nei fa’afitauli ona ua fa’asa le sasaina o fanau.  “O le tiute lava ia o le matua o le taulogologo ma fa’amanatu i lana fanau le ala e tatau ona ui ai. O aso la, na tele lava faiaoga na fesoasoani i le a’oa’oina ma le fa’atonutonuina o fanau i la aso. 

“O le salulima, fusipa’u, lālā la’au ia ma isi. O mea na sa fesoasoani i matua e gagau ai loto o fanau ina ia iloa le mea tonu e tatau ona fai. Ma o le ala foi lena ua iu lelei ai le toatele o fanau ona sa fa’aaoga mea na e fa’atonu ai pe a sese. 

“E to’atele i latou fa’apea e a la ona sasa le tamaititi ona ua le alolofa matua, ae leiloa, o le sasa lena o le alofa. Auā e naunau lava matua ina ia iu lelei fanau ma maua ni lumana’i manuia. Ma o le mafua’aga tonu a lena ua tele ai le mau fa’afitauli i lenei vaitau.”

O le tamā iā Tole’afoa, e le gata o ia o le matai o lona aiga; e mautofi foi i lana Ekalesia, ma o Tole’afoa foi e fai ma faiaoga o le faitau tusi ma le tusitusi a fanau o le nu’u ma le ekalesia. 

Na ta’ua e Tole’afoa, e tumu lava lona maota i afiafi uma i fanau e o atu e a’oa’o la latou faitau tusi ma tusitusi. 

“Ou te fiafia lava a’u ia e fesoasoani i fanau laiti. O lo’u naunauta’iga, ia ave nei fanau ma mea faigaluega a le Atua, aemaise ia o latou le taua o le ola auauna i le Atua.  “A fai a la a matou faitauga tusi, ou te tago foi fa’amatalatala iai tala mai le Tusi Pa’ia ae maise o le aganu’u a Samoa.  “O la’u lea fesoasoani i le fanau ina ia manuia.”

Na fa’ailoa mai fo’i e Tole’afoa, o le matai i Samoa, e tatau ona ia fa’asinoina i lona auaiga le ola tautua.  “O le tala lava a si o matou tamā ia te au ina ua ou matai, “Ainea, o lou nofoaga lava o le umukuka.

“O le matai alofa e na te fa’asinoina i lona auaiga le ola tautua, ae le fa’apea e na’o nofonofo ma fa’atalitali e o atu tagata e tautua oe.”

© Samoa Observer 2016

Developed by Samoa Observer in Apia