Fa’atasiga fiafia a le Aiga o Seiuli Polesi Lee

Tusia Fa’aliliu e Maiava ,

136 Hits

Le Fa’atasiga a le Aiga o Lee i le 2016 i Manase

Le Fa’atasiga a le Aiga o Lee i le 2016 i Manase

O le vaiaso talu ai, na potopoto fiafia ai suli o Seiuli Polesi ma Netini Solomon Lee mai ‘Ausetalia, o Niu Sila, Amerika Samoa, le Iunaite Setete o Amerika fa’apea Samoa nei, mo le fa’atasiga fa’aleTausaga a le Aiga i Papauta.

Na fa’aaliga e le Ta’ita’ifono o le Komiti o le Fa’atasiga, o Tuifa’asisina Korina Seiuli Lee, o le fa’amoemoe ‘autu lava o le toe fa’atasia o fanau ma le fa’aauauina pea o le so’otaga va-va-lalata fa’aleAiga.

“O le tama o o matua, e mai afio’aga o Solosolo ma Papauta a’o le ‘olomatua e mai Apia, Faleasi’u ma Papa i Sataua a’o le matou fa’aTama i le taimi nei, o le Faife’au o Seiuli Atipera Lee ma Fetuna Stipera Lee.”  

Na ta’ua e Tuifa’asisina, e le o mafai ona ‘auai uma mai sui o le aiga i lenei tausaga.

“E le ole kuata lea o le aiga nei, talu ai ona e fai lava si to’atele,” o lana fa’aaliga lea.

“O le Aso Gafua na amata ai le fa’atasiga, na amata lava i se ava-fa’aleAganu’u e fa’afeiloa’i ai sui o le aiga mai atunu’u mamao, soso’o ai ma le fa’alauiloaina o sui uma o le aiga ua mafai ona ‘auai i lenei tausaga. O se vaega taua tele o le matou fa’atasiga, o le toe feiloa’i lea ma fa’amasani atili isi sui o le aiga i isi e seasea feva’aia’i, ae maise fo’i, le feiloa’i atu i sui fou o le aiga mai atunu’u mamao, lea fa’atoa o’o mai i Samoa nei. 

 “Sa matou malaga i Savai’i mo aso e lua, se’i ‘ave a matou fanau i Papa i Sataua, le nu’u o le tama-ole-tama o o matou matua ma fa’ailoa iai le nu’u o tua’a ma matua ua tofafa mai tu’ugamau.

“O nisi o a matou fanau mai fafo, e le’i va’ai muamua i se faleo’o ma o le isi lena o mafuaga, o se avanoa se’i tilotilo lelei ma matamata i le olaga fa’aSamoa ma le soifuaga i aso ta’itasi.

“O se avanoa mata’ina tele mo latou, ua latou iloa ai le fa’amanuiaina o latou uma, ona ua mafai ona ola i le tulaga o iai nei e aunoa ma ni fita a’o ni faigata e pei ona sa feagai ma matua ua mavae ae maise o taumafaiga na amataina e o matou matua e o’o mai i le taimi nei.”

© Samoa Observer 2016

Developed by Samoa Observer in Apia