Toe manatu tasi lava...Nai ‘Upu Laiti e Lua

By Fa’aliliu e Maiava 26 July 2016, 12:00AM

Toe mafaufau tasi lava…Tele aso e le-fetautalatalaa’i se ulugali’i, ona o lo’o tumau pea le le-fiafia o le tasi i le isi talu le misa’aga mulimuli. O le aso lona lima la, na iloa ai e le tamaloa, e iai lona fa’afitauli. Na mana’o e vave fafagu o ia e lona to’alua i le aso e soso’o ai, ona e fia pu’e lana va’alele e alu ai mo sana fonotaga taua fa’apisinisi.

A o le fa’alavelave, e le mana’o e tautala i lona to’alua ona e foliga ai ua faia’ina, tago loa i le pepa ma le peni, tusi ai se fe’au i lona to’alua ae tu’u i luga o le laulau-‘ai. O ‘upu nei o le tusi: “Fa’amolemole, fafagu a’u pe a ta le 5.00 i le taeao.” E ala ane lana susuga, ua te’a le 7.00! Na matua itaita ona ua misi le va’alele, ma ua foufou e e’e atu i lona to’alua ona ua le-fafagua o ia, ae tau atu loa i se pepa i tafatafa o lona moega. O ‘upu nei o lo’o tusia ai: “Nofo i luga! Ua ta le 5.00!”  

Ioe, aisea lava e faigata ai ona tautala i nai ‘upu laiti e lua, “Malie ia”?  O le mea moni, o le to’atele o tatou, e lelei tele i le fa’atalitali se’ia fa’ato’ese mai isi tagata ia tatou ae matua le manana’o lava e fa’ato’ese atu ona o mea sese ma fa’aletonu sa fai i isi tagata. Ae ana vave ona tatou fa’ato’ese ma fa’amalulu atu, atonu e fa’asaoina ai le so’otaga ma mafutaga lelei ma a tatou uo ma aiga ae maise le fa’asaoina ai o le mau taimi, le malosi atoa fo’i ma tupe ma’umau. I se su’esu’ega na faia i Peretania, na maua ai, e 37 pasene le aofa’i o tagata sa molia foma’i ma falema’i i le fa’amasinoga, sa le tatau lava ona o’o i lea tulaga, pe ana fa’ato’ese ma fa’amalulu atu iai foma’i i le amataga.    

Silasila fo’i, e lua lava ituaiga o tagata pe a o’o ina tu’ua’ia i se mea-sese ua fai. Muamua, o tagata e matua le-manana’o lava e tu’ua’ia ona o se mea-fa’aletonu po’o se fa’afitauli fo’i ua tupu. Tagata nei ua masani i le tu’ua’ia o isi tagata ma fa’apea mai, o latou tonu na e tatau ona fa’ato’ese. Lona lua, o tagata e ta’utino, o latou lava ua mafua ai se fa’afitauli ma vave fo’i ona fa’ato’ese atu. A’o nei vaega uma e lua, o le ta’utino ua sese ma le tau-tu’ua’i, e le-manuia.

O le fa’amoemoe ‘autu lava o mea fa’apenei, o le fa’amaoni. Ta’utino a-mea o ‘Oe ua mafua ai se fa’aletonu ua tupu ai le sese ma fe’ese’esea’i ai ma o le a taumafai lava e fa’aleleia ia ‘aua ne’i fa’aluaina sea fa’aletonu. Na fetalai manino lava Iesu Keriso, a tatou tu’utasi uma atu mea ‘uma ia te Ia, o le a fesoasoani mai ina ia tatou iloa ma malamalama i o tatou tagata, ina ia fa’amaoni atoatoa, ma tatou iloa ona fa’ato’ese ona o fa’aletonu ma sese uma ua tatou fai. E fesoasoani Iesu ina ia e fa’amagalo atu i nisi sa fa’aletonu ma sese mai ia ‘Oe, ina ia e sa’oloto ai mai le mamafa o tu’ua’iga ua afaina ai. Toe mafaufau tasi lava… 

By Fa’aliliu e Maiava 26 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>