Fa’alauiloa fua o fa’a’ele’elega a le ‘Aufaifa’ato’aga

By Sarafina Sanerivi 26 July 2016, 12:00AM

O le fa’ai’uga o le vaiaso talu ai, le Aso Fa’apitoa a le Fa’alapotopotoga o Faifa’atoa’ga a Samoa, na fa’alauiloa ai fua o a latou fa’ato’aga ma galuega sa fita ai.

O le Aso Fa’apitoa mo le Maketi sa faia i le nofoaga e fa’afeagai ma le A’oga Tulagalua a Sagata Maria i Savalalo. O masina ta’itasi e fa’atino ai lea fa’amoemoe, e fa’alauiloaina ai ma fa’atauina atu ai fua o fa’ato’aga i le mamalu o le atunu’u.

Na fa’aalia le agaga fiafia o Mere Ravule, se tasi o faifa’atoa’ga, ona o le to’atele o le atunu’u sa asiasi atu e maimoaina ma fa’atau iai fua o fa’ato’aga. 

 “O se avanoa manaia tele mo matou, e ‘aumai iai a matou mea nei e fa’atau atu,” o lana fa’aaliga lea.

So’o se ituaiga fa’ato’aga lava lea o lo’o una’ia e le Asosi lea.

“O lo’o taumafai malosi e toto so’o se la’au ma faia ituaiga fa’ato’aga ‘ese’ese,

“E le o taotasi i fuala’au fai-sua, o fuala’au-taumafa-mata, o meamata e pei o taro, o ‘ulu, ufi ma ta’amu, ae o lo’o ‘aumai fo’i a matou teu ma fugala’au teu-fale ona o le tasi lea vaega taua tele o fa’ato’aga. E fesoasoani tele mo le atina’eina o tupe-maua a faifa’ato’aga ta’ito’atasi.”  

O le isi ‘autu o lenei polokalame, o le una’ia lea o le itupa o tama’ita’i i isi ‘auala e manuia ai aiga.

“O lo’o matou una’ia le sao o tina i fa’ato’aga, aua a talanoa loa i atina’e tau-fa’ato’aga, e tele lana ina aga’i i le itupa o ali’i. A’o le Asosi a Faifa’ato’aga Samoa, o lo’o matou una’ia malosi le ‘auai o tina ma tama’ita’i.” 

O se avanoa lelei fo’i e taga’i ai i le a’oa’oina o tupulaga talavou ina ia manuia i so’o se taumafaiga tau-fa’ato’aga.

“O lo’o matou fesoasoani ai fo’i e atina’eina taleni a tupulaga talavou,” o le fa’aaliga lea a Mere.

“Matou te faia polokalae fa’aleA’oa’oga ae maise lava fanau a le ‘aufaifa’ato’aga. Latou te mataua galuega ma fa’atinoga a o latou matua ma fesoasoani atu fo’i i galuega fa’atino, ma o se tulaga lelei tele lea aua o latou nei e avea ma lumana’i o le tatou atunu’u.

 “O le fa’amoemoe ‘autu lava o le Asosi a Faifa’ato’aga Samoa, o le a’oa’oina lea fanau a faifa’ato’aga fa’apea tupulaga mo le lumana’i. O le a’oa’o atu i fanau, ina ia mafai e latou lava ona tausia i latou ae maise ia iloa ola i afio’aga ma alalafaga i tua ae maise le agaga moni o le a’oa’oina lelei.” 

Na ta’ua fo’i e Mere, o le faifa’atoa’ga, o se galuega mo so’o se tasi.

“O le avea ma faifa’ato’aga, e le na o se galuega a ali’i, so’o se tasi lava e mafai ona avea ma faifa’ato’aga,” o lana fa’aaliga lea.

“Pau lava lea o le naunau ma fa’amaoni iai, ma galue malosi. E te selesele lava fua sa e lulu.

“O le faifa’ato’aga lelei, e matua fa’amaoni lava ma naunau e fa’atino lana galuega. E le gata mo le atina’eina o aiga, o ekalesia ma nu’u, ae fesoasoani tele fo’i mo le atina’eina o le tamaoaiga lautele o le atunu’u. Tele le sao o faifa’ato’aga mo aiga, ae maise fo’i le fa’asaoina o le palapala, o le suavai, o lo’o iai fo’i lo latou sao i le fa’asaoina o le vao ma la’au fa’apea meaola aoga uma e fa’atumauaina ai pea le tamaoaiga ma le matagofie o va’aiga lanulau’ava o Samoa.  

 “O lenei la Aso o le Maketi, e tumutumu mai ai i masina ta’itasi, e ‘aumai fua o fa’a’ele’elega ua iai. O la’au fai-teu e o’o i fua’alau, o taro ma niu ma le anoanoa’i o taumafa-Samoa.”

O seleni uma e maua i lea aso, e fo’i lava i taga a faifa’ato’aga ta’ito’atasi.

“Sa tapena lenei fa’amoemoe e le Asosi a Faifa’atoa’ga Samoa ma o latou fo’i na saunia fale’Ie nei a’o le Kamupani a Lemalu Chan Mow na agalelei mai e fa’aavanoa le nofoaga lea mo le Maketi.

“E le tau-totogia e faifa’atoaga se tupe. Pau lava lea o le ‘aumai o a latou fua o fa’a’ele’elega ma taumafa e fa’atau ai i’inei. O lava tupe e maua, o tupe lava na a le faifa’ato’aga ia e alu ma ia i le fale,” o le fa’aaliga lea a Mere. 

“Manaia lava nai fa’atauga na maua i lenei aso, e sili ai nai lo maketi sa faia muamua fo’i.”  

I le molimau a Mere na ta’ua ai, e isi se faifa’ato’aga sa fa’atau atu ana la’au-toto ma la’au-teuteu fale ma maua ai lana sefulu-afe tala ($10,000.00) i le aso e tasi. 

“I le Kerisimasi talu ai, na fai ai fo’i le matou maketi lea mo aso e lua ma sa tele ai lava tupe a matou faifa’ato’aga na maua. E fuafua lava i mea e a’umai mo le maketi, a tele lava e ‘aumai, e tele fo’i a latou tupe e fo’i ma latou i aiga. 

“O le to’atele lava ua silafia lelei le aofa’i o tupe e fo’i ma latou aua ua leva o ‘auai i maketi fa’apenei ma ua masani fo’i aua o lea e fa’atino i masina ta’itasi uma. O isi lava aso e silia i le lua-afe tupe e maua i le aso e tasi mai le fa’atauina atu o le taumafa o le “pisua”.

By Sarafina Sanerivi 26 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>