O LA’U TALA FO’I

26 July 2016, 12:00AM

1. Matauina i Tala Fou se Ulutala fai mai-“E faitau miliona ma miliona le tau o le faatupeina o le Malo-ma o le saunoga lea a le Faipule o Salega Sasa’e  o Olo Fiti Afoa Vaai….! “E tusa ma le 60 pasene o a tatou tupe maua-e mai le ‘aufai-pisinisi-ma  o iina la e tatau ona faatūtū i ai le vaai a le malo. Fai mai  la Olo Fiti Afoa Vaai-ma o le pogai lea ua tauivi ai faalapotopotoga e totogi a latou tupe-ona o le faateleina pea o atiina a’e.

E tusa ai la ma se talanoaga a lea Faipule  ma le Sunday Samoan-fai mai Olo-o le fausaga i le taimi nei o matagaluega a le Malo-ua matua taugata lava-ma ua le gafatia e le atunuu. O le faatulagaina la o ia matagaluega- ua faitau miliona ma miliona ai tupe alu a le atunuu. O le pine o lea tulaga-ua sili atu i le lima poo le ono sui ofisa sili o pulega i totonu o le matagaluega e tasi.

Fai mai la le Faipule- o ia Sui Ofisa Sili o Pulega-o loo latou faia galuega e mafai e le tagata e to’atasi ona fai….!Ia-o se tala umi lenei tala-ae afai e moni lea tulaga e pei ona faaalia e le Faipule-o fesili taua la nei:-“O le a le pogai o le faamaumau e le faigamalo o tupe a le atunuu”?  O le tali-leaga o le mea lava lea ua masani ai le faigamalo! O le a?

E faalu lava e latou tupe a le atunuu e pei o ni a latou lava tupe! O le a le pine o lea mau? Ia silasila i le faitau miliona ma miliona o tupe a le atunuu ua maumau i faiga pi’opi’o a le Malo ma tagata faigaluega o le Malo e pei ona lipotia ma faamaonia e le Pule ma Su’etusi Sili-ae leai se mea o faia i ai?

O ai la e falepuipui pe a gaoi ae o ai e le mafai ona falepuipui tusa lava pe faitau miliona ma miliona tupe a le atunuu na pule ai? Afai na amata mai lava lenei faigamalo i faiga pi’opi’o- ma o lea ua savalia le 40 tausaga talu ona ia pulea le malo o Samoa-o le fesili la-“O le a se mea e tatau ona fai e le atunuu atoa i lea mala? Afai e le mafai ona fai e le atunuu atoa-o le a le pogai? O fea o i ai le PSA ma tagata faigaluega uma o le malo- ia e gapatia i le tausiga o fanau ma o latou aiga-ona o le taugata o le soifuaga?

A toe faamalamalama atili la se manatu-o lea ua toe sii i luga le Tau o le Soifuaga-ae faamata o silafia e le atunuu- na tulai mai loa le HRPP fai loa ma le lafoga o Oloa poo le VAGST-lea o loo tumau pea- toe faaopoopo i ai ma le siitaga fou o le Tau o le Soifuaga?

O se mea tatau lea Samoa? O se mea tatau le su’e o manuia o ta’ita’i o le malo i le afu maligi o le atunuu ma toe totogi le anoano o aitalafu ma faaunegatupe a le Malo? O le a sou taofi? 

2. Matauina foi i Tala se tasi o Tina ma lona atugaluga e uiga i le tulaga ua i ai nei Samoa-ma e mafua finagalo faaalia o lea tamaitai- pe a mafaufau i faalavelave na tutupu talu ai nei i totonu o Samoa. E ui lava la ina moni ma faamaoni atugaluga o lea tina-ae peiseai o le fesili tele lava=’O le a le pogai ua faapenei ai Samoa? O se Samoa lenei na manana’o o tatou matua ua tofafā mai Tia-ia fai ma o tatou tofi? O le tali –‘e leai.’

Ae o le a le pogai ua faapenei ai? O le a se manuia o le atunuu ma ona tagata e maua mai nei tulaga mata’utia e le masani ai Samoa? Na fai e ta’ita’i muamua o Samoa ni faiga faapenei i le atunuu? Afai la ua atu matagi le finagalo o lenei tina i mea o loo tupu-ia ‘aua tatou te tio! Aisea? Leaga ua tatou iloa lelei ma faamaonia- e na o le tama teine lava poo le tamaitai-e moni ma faamaoni lona alofa i lona aiga. nu’u ma le atunuu atoa!

O le pine o la matou mau-silasila ia Nafanua ma Salamasina ma le isi anoano o tamatai-sa tau ma finau mo le latou atunuu ma ona tagata! O lona uiga la-o le taimi lava e tulai mai ai soo se tamaitai e faailoa mai lona popole ma le atuatuvale ona o le tulaga faaletonu o lona atunuu-e mafua ona o le alofa moni-e leaga o ia o le Tama-Sa-o le Feagaiga-o le ‘Auga Faapae! O le a la sou taofi? 

3. Matauina foi i Tala Fou-le mafui’e e faapea na afua mai Saute Sisifo o Samoa-ma e leai se mea e tasi na lamatia ai si o tatou atunuu-ae aoga tele lea faamanatu mo lo tatou atunuu ma i tatou uma lava! Aisea?

E mafaufau ai Ta’ita’i o le Malo pe o paleni ana faiga i le atunuu ma le finagalo o le Atua; e maufau ai foi Ta’ita’i o Ekalesia uma-Taitai o Nuu ma Afioga uma-poo faapefea ona faatino le galuega e tusa ai ma le finagalo o le Atua-ae poo faapefea foi ona faafoe le pulega a matai i nuu ma afioaga ta’itasi! Fai mai la isi –e manaia lava pe a faapea uma mafui’e i le lumana’i-o lona uiga-ia ‘aua nei soona saua-ae ia fapalepale mai ia Samoa ma ona sese! O le a la sou taofi?

26 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>