AGANUU MASANI PE A FANAU MAI SE TAMA POO SE TEINE

164 Hits

Mai le Tusi o le “Suaga a le Vaatele”- (faaauau mai ananafi.)

Talu ai na avaga le tama’ita’i-ua amata nei ona toe faasolo i tua mafaufauga o le aiga i le faagasologa o mea na tutupu i aso muamua e lua pe tolu-talu ona fanau mai, le tele o galuega na fai i lona tausiga ina ia saogalemu. E toe manatu i aso muamua e tolu ina ua faatoa fanau mai-ae faasusu i le suāniu-e pei ona faia ia Tuiaana Tamalelagi- ina ua faatoa gaoi mai e Failauga e to’alua o Tutuila ma Ape. E toe manatu foi i le aso muamua lea na alu ane ai le tama’ita’i faapitoa- e saili pe lelei pe leai le suāsusu o le tina- ona faatoa faasusu ai lea o le pepe.

O ai lava o le aiga sa i ai i lea taimi-o le ana manatua le tuuina atu o le suasusu itiiti o le tina i totonu o le ipu popo-faatasi ai ma sina suavai itiiti ma ma’a vevela e su’esu’e ai- pe lelei le suasusu pe leai. E faalua pe faatolu i le aso ona fai lea suesuega. Latou te toe manatua foi afai e potopotoi le suasusu-e le lelei pe a fafaga ai le pepe.

E faatoa faasusu le pepe i le suasusu o le tina- pe a lē potopotoi le suasusu. Peitai-afai e faaumiumi le su’esu’ega-o le a faasusu loa le pepe i le suāniu-poo le sua o le tolo- lea e masani ona malaia ai le toatele o pepe- i le manava tatā. O le fanau mai la o se tamaitiiti-e matua tele sauniga faamanatu e tupu mai ai.

E tusa ma le lima aso o sauniga faamanatu o loo mautinoa. O ia sauniga- e amata i lona tolu o aso, le aso lea e faapea e mafai ai ona tula’i ai i luga le tina ma fai ana galuega masani- ma auai i sauniga o le fanau mai o le pepe. E potopoto mai uo ma meaalofa o soo se ituaiga e masani ai. E aumai e le aiga o le tane le ‘Oloa’ lea e aofia ai pua’a, paopao ma isi lava ituaiga o oloa. O le taui o ia oloa- e avatu e le aiga o le Tina “Toga” e aofia ai ‘ietoga ma isi lava oloa tau-lima.

O le a tufa le oloa na aumai e le aiga o le tane- i tagata o le aiga o le tina-ae tufa toga a le aiga o le tina- i tagata o le aiga o le tane. Ona soso’o loa lea ma le sauniga lea e lua pe tolu aso e fai ai. O le taimi lea e nofo ai le pepe-tasi lea sauniga, a totolo o lona tolu lena o sauniga-o lona fa-pe a tu le pepe ma lona lima e sii i luga pe a savali.

E matua fai poula ma siva-ma afai e siva ma pese ai le pepe-ona tumu lea o matua i le olioli. Mo se tamaitai o le a na fanaua se pepe fou, o faiga nei ma upu sa fai. Afai o se tamaitai ua faaipoipo ma ua maua i le ma’itaga- ma o le a fanau i sana tama muamua, e lapata’ina e ona matua faapenei-“Suga-ia e matua faaeteete i lou ma’i (ma’itaga), ia e iloa lelei-o le fanaua o se tamaitiiti-e tua i le oti.”

A’o maua i le ma’itaga, e le toe ‘ai pe inu na o ia i se niu-vagana ai ua inu muamua ai se isi. Afai e te alu e fai alaala-e le alu to’atasi ae o faatasi ma se isi tagata. A fo’i mai le faigā-alaala-e le fafaina lana avega -ae afisi i lalo o le lima.

I le aso e fanau ai-o le a o ane ni tama’ita’i matutua se to’alua e nofo le tasi i ona ul ae nofo le isi i vae. Ona faapea atu lea o lē o loo nofo i vae-“Suga, ia e lototele ma fai mea uma e te mafaia ina ia ola ai lau pepe.”Ona fai ane foi lea o le tamaitai o loo nofo i ona ulu-“Suga, ia ‘aua e te faavaivai ina ne’i e oti. Ona toe oono ai lea o le tina ma ua fanau mai le pepe. Ona punou ifo lea o le tasi o tamaitai matutua- ma sasae le ‘afu’afu o loo i ai le pepe.

Ona toe punou ifo lea i le mimiti le isu o le pepe-ona tapa ane loa lea i le polo ‘ofe -e titipi ai le pute ma le fanua. Ona avane ai lea o se fasi siapo e noa ai le pito e tasi o le pute-ona fusi ai lea i le taafi. Ona avane ai lea o se fasi popo ua mama e se tasi o tamaitai matutua-ona tuu lea i luga o se lauu’a- ma tatau i le gutu o le pepe e faatali ai le taimi e mafai ai e le tina ona fafaga le pepe. Ona potopoto lea o le aiga se’ia o’o ina pa’ū le pute.

E sauni e le Aiga o le tane le “si’isi’i” ma le “popo” (oloa eseese) ma avatu i le aiga o le tina. E avatu e le aiga o le tina “toga” e taui a’i le aiga o le tane. O ituaiga nei o toga e aumai “toga o le suavai”, “toga o le ‘si’isi’i,” “toga o le popo”, “toga o le ulumoega”, o le “Laufau, ” ‘ie evaeva,” “ie faa-Tupu,” “iea o le taaga o le uso,”  “ie o le po,” “ie o le vaisalo,” “ie o le mavaega,” ma le “ie o le malae.”

E pei lava ona faamatalaina i luga-afai o se pepe tama, e tipi lona pute i luga o le ‘uatogi’ ina ia tupu a’e avea ma Toa. Afai e fanau mai o se atalii o se Alii Sili poo se Tupu, ona faailo lea o le fanau mai  i le faaumu (ususū) a tulafale. O le aso e fanau ai, e potopoto uma ai le aiga se’i faalogo poo le a se tuleiga a le Alii e uiga i le pepe. Afai ua malomaloā le gasegase o le Alii, ona potopoto lea o failauga e faalogo i le Mavaega a le Alii.

Afai e soso’o le tama pepe ma le Alii o le a tuua le malo, ona tala’i lea i le nuu o tamaita’i poo le itumalo ina ia amata loa ona lalaga le ‘Ie o le Malo mo lona faafotu-Tupu. Afai foi e finagalo le Alii o le a tuua le malo e fai se Lagi malofia (ta se tatau)  a lona atalii- e ao foi i tamaitai o le nuu ona fai ia lava toga mo ia lava faamoemoe. O le a faatonuina foi tamaitai ina ia aga atu i le vao e tufi ni lama ia fau ma soloi.

E sali le aano o le lama na faa-la, ona susunu lea ina ia maua ai le lama susunu lea e palu i le suavai. A uma ona susunu le lama, ona tuu lea i totonu o le “pūpū lama” ma sisi i totonu o le fale. Afai e toe sui lona mafaufau-ua musu e ta sana tatau-o le a tautau ai pea le “pūpū lama” E mafai e soo se tasi e tau i le aiga o le alii ua sui lona mafaufau, ona faaaoga lea pūpū lama-e ta ai le tatau a se tasi lava o lo latou aiga.

O LE VAEG-TAMA: 

O se tasi lenei o aganuu e masani ai Samoa i aso ua mavae. O le tulafono masani a tane-e masani ona tuuina atu o latou atalii i o latou tuafafine poo tuafafine i tuagane. E leai se tapulaa i le filifilia o matua e vaetamaina- ae masani lava ona tuuina atu le faamuamua i vaegā-tama i totonu lava o le aiga. Mo se faata’ita’iga-o Fuiavailili le ulua’i Tupua- na vaetama i ai le Tupu o Muagututi’a mai ia Fuimaono lona tama, i Salani Falealili.

O vaega-tama e aafia ai le faafesuiaiga o meaalofa pe afai e tuuina atu e le tane lona atalii poo le afafine i lona tuafafine, e tuuina mai foi e le tuafafine ma lana tane ni meaalofa o oloa mo le atalii poo le afafine ua vaetama i ai- e peiseai ua tuuina atu ia i la’ua ni toga ma ni siapo se tele.

E faapea se manatu o le tamaitiiti-o le toga-talu ai-ua avea o ia ma faamau faailoga i le va o lona aiga ma le aiga o le to’alua o le tuagane o lona tina. I le aiga na vaetama i lea tamaitiiti, ua avea o ia ma ala e tafe atu ai oloa e tele i le aiga ua vaetamaina mai matua o le tamaitiiti.

I matua o le tamaitiiti-o ia o se punavai e maua mai ai le oloa mai le aiga na vaetamaina o ia-e le gata i le taimi o le vaegā-tama ia te ia-e le gata foi i le taimi o le vaegā-tama-ae i taimi uma lava e ola ai lea tamaitiiti. Poo le fea lava itu e te vaai ai i le vaegā-tama faa-Samoa, ae o lea aganuu-e le’i una’ia e le alofa moni poo le mana’o ina ia maua se tamaitiiti-ae o le matape’ape’a –ina ia tele ni punavai e maua ai le tamaoaiga faale-aganuu poo oloa. i taimi o le fetulituaa’i –o le aganuu tau vaega-tama e foliga mai sa talafeagai lelei. O se tamaitiiti e vavae mai se aiga ua ta’usalaina poo se nuu-ua lava lea e fai ma vaaiga i alii o le a va-tau ma mafai ai ona feiloa’i ma talanoa.

O le taua la o tama vavae mai isi aiga ona o le toatele o i latou na avea ma Tupu i le tele o auga-tupulaga ua mavae. Mo se faata’ita’iga, sa ta’ua muamua e faapea o lē na mua’i umia le suafa Tupua o Fuiavailili, o le atalii o Fuimaono i Salani-ae na vaetama i ai le Tupu o Muagututi’a.

© Samoa Observer 2016

Developed by Samoa Observer in Apia