O FAANAUNAUGA I NAI TOE TANE MAMALU

169 Hits

Tatou te faafetaia pea le alofa ma le agalelelei o Atua-ua tatou aulia mai ai lenei Aso Sa i le Lagi e Mama ma le Soifua Manuia. E ui foi ina tatou feagai pea ma faalavelave e tutupu faafuase’i, aemaise ai o le maliu ma le oti, ae tatou te faafetaia pea le Atua, talu ai- na te le o tuulafoa’ina lava  i tatou i aso uma lava, aemaise ai o lana faamafanafanaga lilo i o tatou tiga ma faanoanoaga!

Ae alo maia- o le tatou talanoaga masani foi lenei mo Aso Sa taitasi uma. Ae pei lava ona faailoa atu pea Samoa- e leai se agaga o lenei tusitusiga e tu’ua’ina se tasi pe faaleaga i ai, se’ia vagana ai le fia faailoa atu o mea o loo tutupu i lo tatou atunuu- e tusa ai ma le auaunaga a nusipepa uma, ma faailoa atu le pogai ua mafua ai-ona faaali mai lea o outou finagalo tatou te faasoa faatasi i ai, ina ia mafai ai ona fo’ia.

O le ulutala la o le tatou Talanoaga i lenei Aso Sa-o lena ua tusia i luga; ma e i ai le talitonuga- o loo manino lelei le atunuu i lona uiga; ae afai lava e moomia sa’u fesoasoani, ona ‘ou faapea atu lea:- O le talaaga o le ulutala o le tatou talanoaga-o “nisi ia o upu o le Lagisolo poo Vi’i- sa faatino e le atunuu pe a tuumalo sona ta’ita’i iloga.

O le Lagi la o sea Ta’ita’i- e auai Samoa atoa! Fai mai- e pepese ma savavali uma i le malae, fetagisi, lauē, tagitu’i, ma tatu’i o latou ulu i ma’a se’ ia tafetotoi; e faailoa atu ai- lo latou matua faanoanoa lava- ona o le tuumalo o se ta’ita’I, ae sa tau ma finau mo le manuia o ona tagata.

O nei la sauniga fai mai e faitau aso o faatino, talu ai le faagalo-gatā o sea ta’ita’i, ma ana mea lelei na fai mo lona itumalo ma le atunuu atoa. Fai mai la- o le itu mata’ina o ia sauniga- o tamaitai! Fai mai e a isi e fetagisi ma tatu’i o latou ulu I ma’a ina ia tafetotoi, ae a isi tamaitai e tau faanofo i luga sea tamalii ma fai i ai-“Ua e sola ae tia’i matou, ai tafefe poo ai o le a matou tua i ai?

Ona latou alalaga lea ma le leotele: “O nai o matou toe manatunatuga na mo Oe le toe Tane Mamalu! O le fesili la-o tatou toe vaaia i nei aso ni sauniga faapena?  O le tali-Ioe: ae mo na o nai toe tane mamalu!

O lona uiga- e na o taitai lelei! A tatou toe tilotilo la i tua ma le afua mai o le Malo o Samoa- o le fesili-sa i ai ni nai toe tane mamalu? Pule lava oe i lau tali- ae o la’u tali-ioe-sa i ai! O le fesili-Aisea? Leaga e leai ni faiga-malo faa-Vaega; ae sa na o le tasi lava le pulega o le Malo!

O lona uiga-sa pulea faatasi e sui uma lava o le atunuu, ae le na o se vaega faa-Upufai- e pei ona i ai nei! Afai la tatou te tilotilo i mea uma na latou faia-ona faatusatusa lea i mea o loo fai ma ua uma ona fai- e taitai o loo i ai nei, o ai la e toe fia tagi ma tatu’i lona ulu ia tafetotoi?

E leai ma se ta’ita’i o Samoa e amata mai lona Tutoatasi na faia se mea leaga e tasi- e pei o mea o loo fai e le faiga-malo i le taimi nei. O lona uiga- e leai se mea leaga e tasi na fai i le taimi o Fiame Mataafa Faumuina Mulinuu II, Tupua Tamasese Lealofi IV, leai foi ma se mea leaga na fai e Tupuola Efi! Aisea?

Leaga o nai toe tane mamalu ia o le atunuu- e tatau ona maligi ai le toto o le atunuu! E le masino mea mata’utia ua aafia ai Samoa! A tu’u i le faiga-malo o loo i ai nei-e matua mata’utia ma uiga ese taupulepulega leaga a tagata faigaluega na fai- e faaaoga sese ai tupe o le afu maligi o tagata totogi lafoga!

A tuu ane i faiga pi’opi’o a le faiga-malo; e faitau miliona ma miliona tupe a le atunuu- ua maumau ai- ae matua musu lava le Malo e fai le ‘faamasinoga ma le amiotonu’. E tiga lava ona o’o le aitalafu a le atunuu i fafo i le $1 piliona, ae o lea lava e nono mai tupe!

O le fesili la- e totogi e le Malo pe o le atunuu?  A avatu le fautuaga a le atunuu e faaeteete le nono mai o tupe-ae fai mai e le o se pisinisi lena a le atunuu. E pule lava le malo i le nonoina mai o le anoano o tupe mo le atiina a’e?

E mafai la ona e tagi ma tatu’i lou ulu ia tafetotoi e faamanatu ai ni faiga faatautala faapenei? Faamata la o le a le pogai o lenei uiga le popoi ma le faatautala? E mafua ona o le fiapule; ma o le faalavelave lea o taitai e leai ni mea e pule ai!

O le mea ua mautinoa- e matua le fiafia lava le faiga-malo pe a fesiligia e se tasi a latou faiga, ae o le faalavelave- e le o ni a latou mea ia e faatautala i ai? O mea faitele a le atunuu! O le upu foi i eleele faale-aganuu,  ia o lea ua o’o i ai ana fuafuaga; e tiga ona sese, ae leaga ua punitia le faalogo ma le vaai i le fiapule to’atasi!

Afai la ua malosi le fiapule-aisea e le avane ai eleele o lona itumalo e lisi i Papalagi, ae ‘aua le fiapule fua i eleele o le atunuu? O upu lava a le atunuu-E manatua Pule ae le manatua Faalaeō; o lona uiga- e leai se tasi o Samoa na te fia manatua se tagata amioleaga; aemaise ai o mea leaga e fai i tagata na tofia i latou e faafoeina le atunuu.

Pule la oe pe e te fia manatua ni taitai leaga pe na o taitai lelei e putiputi ma faapelepele i le tofi o lona atunuu? Ia manuia tele le Aso Sa Samoa ma ia faamanuia atu le Atua.

© Samoa Observer 2016

Developed by Samoa Observer in Apia