Fa’alifu o se alagatupe lelei

By Aruna Lolani 27 May 2017, 12:00AM

O le olaga nei ua le toe fai i se galuega e te mauaina. O lenei olaga ua fa’atatau i le fa’aogaina tatau o se taleni ua e maua po o se tomai fo’i ua e maua, ma fai ai se galuega tatau.

O le fa’atalatalanoaga a le Fofoga o Samoa ma Esikia Uimaitua sa fa’aali ai lenei manatu.

“O le taimi nei, e le toe tatau ona e popole i le maua o sou galuega i se kamupani po’o se pisinisi, a e iloa a e oe fa’aoga lou tomai e fai ai ni galuega taua ma lelei mo lou aiga, ua lava ma totoe,” o lana tala lea.

“O a’u e fa’atau a’u fa’alifo talo i aso uma ma ou te ta’ua ai lenei mea o se galuega aua o lo’o gaioi ai o’u lima. 

“O le tupe e maua mai lenei galuega e totogi ai pili o le vai ma le eletise, ma e fesoasoani ai fo’i le aiga, le fanau fa’apea mea o le lotu ma mea fai a le nu’u.”

Sa ta’ua e Esikia o ia e leai iai se ma’umaga ma o le tulaga lea e fa’atau ai ana tautalo mai le maketi e fai ai ana fa’alifu talo.

“Ou te alu la fa’atau le ato talo lea e $20 le tau aua e tele a’u fa’alifu e fai mai ai.

“O le aso a ma le ato talo ae i lo’u a ia manatu e fetaui lava aua e tele lava la’u tupe e maua mai ai, $70 i le $80 le mea e maua i le fa’ai’uga o le aso.

“E $400 i le vaiaso le tupe maua mai fa’alifu ma e lava ma totoe mo le tausiina o le aiga aemaise le fanau.”

O Esikia e to’afa lana fanau ma e to’alua o lo’o a’o’oga nei i le a’oga a Afega.

“Ua atoa nei le ono tausaga o o’u faia lenei galuega ma e leai lava se mea e faigata iai, measili la e iai se mea e fesoasoani ai le aiga.

Sa fa’apea mai Esikia o se itu tatau lea ona fai e tagata uma o lo’o su’e galuega e fa’aoga o latou taleni e fausia ai lava ni a latou tama’i galuega e fai i le fale.

“O le measili e taua i le fa’ai’uga o le aso, o le faia o se feau lelei mo lou aiga aemaise lava mo oe.”

By Aruna Lolani 27 May 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>