Itu mafatia ona o timuga

Tusia Aruna Lolani ma Fetalai Tuilulu’u ,

85 Hits

Popolega mo taimi timuga: Iafeta Tenari mai Eva.

Popolega mo taimi timuga: Iafeta Tenari mai Eva.

Ua to’atele aiga o Samoa ua avea ma se latou popolega tele le leaga o le tau, po o taimi fo’i e mamafa ai timuga aua e tele lava fa’afitauli e tutupu mai ai, aemaise lava mo nai aiga o lo’o nonofo lata i le sami fa’apea nofoaga maualalo o le atunu’u.

Ma o le tulaga tonu lava lea o lo’o iai se tama 62 le matua o lona soifua ma lona aiga, o lona suafa o Iafeta Tenari.

O Iafeta Tenari mai le nu’u o Eva, na ia ta’ua i le Fofoga o Samoa, o lo’o fai se galuega la’u ma’a a lona aiga aua le fausiaina o le latou maota fou.

Sa fa’apea Iafeta o lo’o lelei lava mea uma i totonu o lona aiga ae pau lava se itu e popole ai, o taimi e pa ai le vai pe a malolosi ma tetele ai timuga.

O le fale o Iafeta ma lona aiga, e latalata ane lava i se tasi o vaitafe a le nu’u ma e tele lava o taimi e timuga ai, latou te tapenapena ai lava aua mea e ono tutupu.

“O taimi o timuga malolosi matou te popole ai lava aua e tele ona pa le vai,” o lana tala lea.

“O taimi uma fa’apenei matou te popole ai le vai, fa’apea la’au ina ne i pa’u’u mai luga o le fale.

“O se tasi lea o tulaga o lo’o matou mafatia ai ma matou popole ai aemaise lava mo le fanau.

“Ae o lenei taimi, ua lagona lava le fiafia aua o lea e tapenapena atu le matou fale fou ma ou te fa’afetai lava a’u ia i si a’u fanau o lo’o faigaluega i atunu’u i fafo aua ua mafai ona fa’ataunu’u ai lenei tulaga.

“Ua le gata o se itu lea ua atina’e ai le matou aiga ae fa’apea fo’i o se auala lea matou te alo mai ai i le vai pe a pa, o le a la e tau fausia atu lenei fale fou ma se va’aiga lea e fa’amaualuga lona fa’avae ina ia matou mapu ai fo’i i taimi e lolo vaia ai lenei itu nu’u.”

© Samoa Observer 2016

Developed by Samoa Observer in Apia