Amata le Ta’amilosaga Ta’ito’afitu o le Sisigafu’a

Tusia Vatapuia Maiava ma Fa’aliliu e Maiava ,

121 Hits

O LE LAKAPI A O LE LAKAPI: Fetauiga a Afega ma Vaimoso na manino ai le tulaga ua o’o iai le malamalama o fanau i le ta’aloga.

O LE LAKAPI A O LE LAKAPI: Fetauiga a Afega ma Vaimoso na manino ai le tulaga ua o’o iai le malamalama o fanau i le ta’aloga.

 Susulu malosi la ma manaia le tau sa iai le aso ananafi, ma sa fa’apea le vevela o finauga a ‘au lakapi a tamaiti-a’o’oga, – i le fa’aaliga o tomai ma taleni a ali’i-talavou o lo’o ‘auai i le Ta’amilosaga Lakapi Ta’ito’afitu o le Sisigafu’a lea e fa’apapalagiina o le SI’I Sevens.

Na amata ananafi lea ta’amilosaga i le malae o Malisi i Lotopa, i ta’aloga a fanau-a’oga i lalo o le 14 tausaga.

Na va’aia le finau o fanau – ui i le vevela o le la, ina ia manumalo a latou a’oga ma fa’ailoa atu ai fo’i le maualuga o le lakapi ua iai le atunu’u i lenei vaitaimi.

E 10 a’oga o lo’o ‘auai a latou ‘au-ta’a’alo – o fetu-pupula sa fili mai a’oga ta’itasi – mo le ta’amilosaga lenei, lea na ta’ua e Shalom Senara, le Fa’atonu o le Ta’amilosaga, o le mea taua lava i lenei tauvaga, o le maua o le fiafia. 

“O le ta’amilosaga lenei e fa’amanatu ai le Tuto’atasi o Samoa ma o lea ua iai a’oga tulagalua e amata ai le ta’amilosaga,” o le saunoaga lea a Shalom i talanoaga ma sui o le Samoa Observer.

“O le agaga lava lea, ua maua le fiafia mo fanau i lalo o le 14 tausaga. A ‘uma ona soso’o lea ma le ta’amilosaga a tama-a’oga i lalo o le 18 tausaga, fa’apea ta’aloga a ali’i ma tama’itai matutua e amata i le Aso Faraile ma le Aso To’ona’i i le Apia Park. 

“Ia a’u lava ia, o lo talotalo ia matua tele o ni tamaiti lelei, tamaiti talenia a’o le mea taua lava o le maua o le fiafia.

“O le ‘autu lava lena o le ta’amilosaga lenei, ae maise lava mo fanau i lalo o le 14 ma le 18 tausaga.

“E manana’o ia fiafia fanau e ta’a’alo lakapi; aua o le tulaga lea o tatou o Samoa, e fiafia tele i le lakapi ma e te iloa lava le fiafia o fanau nei i taimi uma e ta’a’alo ai i luga o le malae.”  

O le taimi muamua lenei ua ‘auai fa’atasi ma le Iuni Lakapi a Samoa i le Ta’amilosaga lea ma ta’ua ai e Shalom, ua fiafia lava ona ua mafai ona latou galulue fa’atasi. 

“Ua tolu nei tausaga o fa’agasolo le ta’amilosaga lenei ae sa amata lava e Su’a Stephen Schuster ma lana Vaega,” o lana fa’aaliga lea.

“Lea ua auai mai le Iuni Lakapi a le atunu’u i le tausaga nei ma ua fesoasoani tele mo le tapenaina o le ta’amilosaga, aua o le tele lava o ta’aloga e ‘auai ai fanau, o le lelei fo’i lena o le atina’eina o le lakapi i Samoa nei ma atili fa’asolo ai lava ina si’isi’i le tulaga o le ta’aloga i le atunu’u. 

E lua fa’amoemoe o le ta’amilosaga lenei mo le Iuni Lakapi a Samoa, e sa’ili ai tama-ta’a’alo mo ‘au a le atunu’u.

“O le ta’amilosaga e faia i tausaga ta’itasi peita’i mo le aga’i i luma, o le a iai nisi ta’amilosaga e fia fa’atino, e le gata mo ‘au a le atunu’u a’o ‘au fo’i mai fafo.

“O fuafuaga na mo le fa’ai’uga o le tausaga nei ma le amataga o le tausaga fou.” 

E le gata ina maua o le fiafia i ta’aloga nei, a o le a iai fo’i nisi o fa’ailoga o le a saunia e tauva iai ma atiliu si’itia ai lava le tulaga o le lakapi. 

 “O le mea taua lava mo fanau, o ‘au a tama’ita’i fa’apea fo’i ali’i, o le maua o le fiafia ma fiafia fo’i e ta’a’alo i le ta’aloga.”

© Samoa Observer 2016

Developed by Samoa Observer in Apia