Fa’aaoga Lou Tagata ma Avanoa (Vaega 1)

26 May 2016, 12:00AM

Toe mafaufau tasi lava…O le mafuaga e le-fia fe’a’ei ai tagata i le ‘apefa’i o fa’amanuiaga ona o lo’o fa’atalitali mo le lifi.” A o le fa’alavelave, e le-tatau lava na ona tatou fa’atalitali ia o’o i le tumutumu, ae ao ona finau maua’i ma afu ina ia ‘ausia le tumutumu o fa’ananau iai.

Pau lava lea, ia e mautinoa la’asaga tonu e taunu’u ai, ina ia ‘aua ne’i ma’umaua le taimi e fe’a’eia ai i se ‘apefa’i sese! O nei ma taeao, o le a va’ava’ai ai i nisi o ‘auala tonu e manuia ai.   

Muamua lava, ia aogā mea na tutupu muamua. Pei o tala a se tasi ali’i: “E leai se paga a le a’oga mai mea sese sa faia muamua ma mea fo’i sa ulua’i tigaina ai! E matua ma’umau le taimi o latou e le a’oa’ia mafaufau mai mea sese na faia muamua, aua e na o le ta’amilomilo solo le mea e maua ma saga fai ai pea lava pea mea sese sa faia muamua. 

Lona lua, o le “va’ai lelei” ma “fa’aaoga” tatau avanoa ua maua. “O se va’aiga mamao e le fa’atinoa, ua na o se miti e leai se taunu’uga.” O tagata e i’u manuia, e le na ona fa’alele o fuafuaga, ae naunau fo’i e fa’atino ma fa’ataunu’u. E va’aia loa se avanoa e manuia ai, pu’epu’e maua loa a’o le’i tuai. Latou te silafia lelei le taua o le taimi ma le avanoa ua maua, ne’i ma’umau. E fai lava si faigata o le vaega muamua ae fa’asolosolo lava ina faigofie pe a lata ina mae’a ma manuia. 

O le tagata e fa’atalitali mo se isi tagata ia maua ai se avanoa, e ‘umi lava se taimi e ono fa’atalitali ai! “O le mea taua, ‘aua le fa’atalitali se’ia o’o atu se avanoa – ae tatala le fa’alogo ma alu e sa’ili.” O avanoa lelei e pei lava o taimane i le laolao: e savavali ai lava ma soli i vae o tagata aua e le’i fa’ai’ila ma faia fa’alelei.

O le vaega lona tolu, o lou iloa lea o le nofoaga ma le taimi e le tele ai ni avanoa mo le aga’i i luma i le manuia. O nisi, e le ‘ilafia lava matau ma mata’itu fa’ailoilo e iloa ai, e le o se ‘auala manuia o lo’o ui ai, e ma’umau ai o latou taimi ma le maua ai se manuia. Fai mai se tasi tamali’i: ‘Aua le nofoa’i i le mea e tasi, ae sa’ili i le mea e manuia ai.” Sa’ili se galuega po’o se pisinisi e fetaui ia te ‘Oe, ma ono si’isi’i ai ma fa’asolo i luga i le mea e gata ai lou mafai.

Tatalo nei i Le e Silafia lelei ‘Oe ma ou malosi’aga uma ma avea o Ia ma au pa’aga fa’aleGaluega. E na o Le lava na faia ‘Oe e silafia lelei ‘auala tonu ma sa’e e te taunu’u manuia ai i le malosi sili e te ‘ausia, lea sa Ia fuafua lelei mo ‘Oe i le ola nei. Toe mafaufau tasi lava…           (Fa’aliliu e Maiava)

26 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>