O LA’U TALA FO’I

26 May 2016, 12:00AM

1.Matauina i Tala Fou se ulutala fai mai ua ofo mai e le ‘Hope for Cancer” mai fafo se faamoemoe mo le gasegase o le Kanesa. O lea la ‘Hope for Cancer’-o ni foma’i mai le Iunaite Setete o Amerika-ia o loo i Samoa nei-ma o le a latou togafitia ituaiga eseese uma o gasegase-aemaise ai lava le kanesa-e ala i le faaaogaina o ituaiga eseese uma o togafitiga -ae le o le tuuina atu o ia gasegase mo isi togafitiga ma le Faaata.”

Fai mai Tala Fou o lea ua tilotilo le Palemia o Tuilaepa i le faatuina o le ‘Hope 4 Cancer i lea nofoaga i le taimi nei-a’o tau saili se nofoaga tumau e latalata i le sami- e faatu ai lea falema’i.

O lea la tulaga ua mae’a ona faamaonia i le Aso Gafua- ina ua mae’a ona faailoa atu e lea vaega i le Palemia ma Minisita o le Kapeneta ma sui o le Soifua Maloloina- le uiga moni o le ‘Hope 4 Cancer’….

Ia-afai la e le o mafai e lo tatou Malo ma le Matagaluega o le Soifua Maloloina ona tuuina atu lenei auaunaga i le atunuu i le taimi nei-o lona uiga la-“o le vaa faaola lea ua aumai” e ia foma’i mai fafo mo le atunuu!

Ae o le fesili taua lava-faamata e mafai e le Matagaluega o le Soifua Maloloina ona faaauau pea lea auaunaga? A toe faamalamalama atili le fesili-o i ai ni fomai faapitoa a Samoa mo lea gasegase e mafai ona latou faatinoina lea faamoemoe lelei mo le atunuu?

Faamata o le a avea le “vaa faaola” ma ala e mafai ai e le Malo ona tuuina atu le faamuamua i le soifua maloloina o le atunuu? O le a sou taofi? 

2. Matauina foi i Tala Fou se ulutala fai mai o le “Puipuia ma le Faasaoina o le Aganuu ma le Tala Faasolopito….! Fai mai o le faamoemoe autu lea o se  galuega tele o loo faatupe e le Amapasa o Amerika mo le Nofoaga o Su’esu’ega Faa-Samoa-i le Iunivesite Aoao o Samoa…!

Fai mai la- o ananafi na potopoto ai le Amapasa o Amerika ma le Faauluuluga o le Iunivesite Aoao o Samoa ma le vaega e faatinoina lea galuega- i le Potu Fono o le Aoa-e tatala aloa’ia lea galuega tele.

O le igoa la o lea galuega tele-fai mai o le “Faaputugatupe a le Amapasa mo le Puipuia Malu o Faamaumauga o Su’esu’ega tau le Laueleele ma le fausia o nofoaga iloga ma le Galuega Tele tau le aganuu tautala.

O le faamoemoe atoa la-ia faavaeina ni faamaumauga faavae o nofoaga e fai ai suesuega ma nofoaga na fausia ma le puipuia o le tofi tau le aganuu. Ia o se tala umi lea tala-ae o le fesili taua lava-“O ai e tatau ona saili i ai talaaga auiliili o le aganuu ma le tofi faavae o Samoa?

Afai o le tele o faamaumauga na fai e Papalagi-faamata e le o le taimi tonu lenei e fai ai e tagata Samoa lava latou-talaaga o a latou aganuu ia ua avea ma o latou tofi tuufaasolo? O le uiga moni o le fesili-o i ai se faamoemoe o ia suesuega e fesiligia nuu uma o Samoa-aua o lea o le a lote le fatu o Samoa?

Ia-e ui lava ina fai mai le upu e ‘pule lava Sitafinē i le La o lona vaa-ae o tamalii ma failauga o loo afifio ma alala i o tatou nuu uma-I Upulu nei ma Savaii-o iina tonu lava-o loo I ai le ‘ato e teu mau’ e maua mai ai le fatu atoa ma le faamoemoe autu o le agaifanua a Samoa!

O le a la sou taofi?

3. Matauina i Tala Fou le matua teena e se alii sa avea ma fitafita se lipoti a le nusipepa e faasino ia te ia. O lana mau e faapea- e faatoa ona iloa na valaau lea mataupu i luma o le Faamasinoga i le Aso Gafua-ina ua faitau i le nusipepa.

Sa ‘ou le fiafia lava i le tala na aumai e le nusipepa-talu ai ou te le iloa le taimi na valaau ai lea mataupu i totonu o le Faamasioga.

O lea lava ou te i Samoa nei-ma o se lape lea o le Faamasinoga-aua o le taimi mulimuli na valaau ai lea mataupu-sa talosagaina e i latou sa gafa ma moliaga-ina ia toe tolopo le mataupu-ma fuafua ai loa e toe valaau i le Aso Lua o le vaiaso nei.

Ae ua ‘ou faanoanoa lava i le tala fou a le nusipepa-ma ua foliga mai ai- o a’u o se tagata leaga-ma e peiseai ua ‘ou sola ese ma le atunuu. E le’i logoina a’u e faapea o le a valaau lo’u faamasinoga afea! Ia –afai la e moni ma faamaoni Salamo e le’i logoina o ia-a faapefea la le ipu vai lea ua masa’a? O ai e tatau ona tuua’ia? O le a sou taofi? 

4. Matauina i Tala Fou fai mai ua teena le toe tatala i tua o se tamaitiiti a’oga o le Kolisi o Avele. O lea la tamaitiiti a’oga o Avele- o Setefano Taofia Toala-o loo feagai nei ma ni moliaga o le fai o ni faiga tau faamata’u i luga o fesootaiga televavave.

O ananafi la na tulai ai o ia i luma o le Faamasinoga Faa-Itumalo sa taiulu ai le Alii Faamasino o Vaepule Vaemoa Vaai. O lea la alii a’oga- na pu’e i le amataga o Me ina ua maua-o ia lea na tuuina atu ni faiga tau faamata’u i luga o fesootaiga televavave.

E iva moliaga o lea tama a’oga –ma e fa moliaga na ioe i ai-ae lē nofosala i isi moliaga e lima….! Ia –o le taunuuga lena o lea alii a’oga-ae talofa e i matua-o lea lava ua avatu faatasi ai ma i latou i totonu o le Faamasinoga!

Faamata la o lagona e nei tamaiti le taunuuga mata’utia o a latou mea e fai? Poo le a lava le leaga o amio a le fanau-e mulimuli atu ai ma le tina-ona o le uiga ese o le alofa o le tina! O le fesili la-faamata o aoga nei mea uma ua tutupu ia tatou fanau? Talosia ia aoga! O le a sou taofi?

26 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>