Tele le a’afiaga o le atunu’u i le Social Media

26 April 2018, 12:00AM

(OFISA SOOUPU A LE MALO) - E le’o na ma le laina le aoga ma le taua o auala o fesootaiga televavave lea ua tatou i ai i ona po nei.

I se faatalatalanoaga a le Palemia Afioga Tuilaepa Sailele Malielegaoi i le polokalame a le 2AP & Palemia i le Aso 29 o Mati 2018, lea na ia faapupula ai mafuaaga aoga ma le taua o le aumaia e le Malo o nei auala fou o fesootaiga ina ia manuia ona tagatanuu i le itu tau fesootaiga.

“O le taua ia o le auala na fai ai e le Malo mea ia, mae na ou aafia ai a mai le amataga ia le taumafaiga ia faalelei ia tatou fesootaiga. O le ala lena na ou nofo ai a ma tofi a’u i le 1999 e avea a’u ma Minisita o Fesootaiga, ona ua ou fiu e faatonu ia Minisita ia na i ai o Leafa faapea foi ia Gafa lea sa Minisita i o; O le a ea le tonu o le tatala faasaoloto o a tatou fesootaiga?”

“Ia aumai le tala e o’o a i Faauluuluga o le Matagaluega o Falemeli ma Uaealesi, e matuā tetee ai i suiga ia ua ou mana’o e fai i le tausaga lena. Ia ou vaai atu loa e oti le mea ia ou nofo loa ma aveese.”

“Ona o lo’u naunau ia mafai ona maua e Samoa ia telefoni nei feavea’i, e poo fea a le mea o Samoa e te i ai e faaoga , a o lea o tatou i le taimi lena i Telecom telefoni foi ie e te alu atu i ile i Fagalii ea e gapa mai ai.”

“Ia lea la na alai ai ona ou suia loa le tulafono ma ou amata loa ona faaulufale malie mai ia telefoni la ia ua i ai nei, telefoni alualu mamao soo se itu a o le lalolagi e te alu i ai”

“Ia lea foi la ua taoto nei ia fesootaiga ia e alu i lalo o le sami, uaea malolosi o fesootaiga, lea foi la ua matua televave ai fesootaiga ma fafo i le internet talu mai ona tatala le tatou uaea lea e alu i lalo o le sami, lea foi la ua tele vave ai fesootaiga ma taugofia ai fesootaiga a tatou i mea tau pisinisi, ia aemaise le tatou Iunivesite lea OUM mo fomai.

“Ua maoa’e ia le tulaga o le gasolo mai o turisi, ma olaola lelei ai lea foi atina’e ona mo mea o fesootaiga, fesootaiga nei televavave e faalagolago uma a i ai le tele o pisinisi ma o le tele o galuega ia o le a fananau mai i le lumana’i, fananau mai ina ua maualuga le mea lea ua tatou oo i ai ona o fesootaiga.”

“O le mafuaaga na na alai ona liliu le Malo e faaleleia ia fesootaina nei ma fafo e faaoga i ai, lea la ua faaoga e le facebook, ia fesootaiga nei televavave internet ma isi mea ona e taua tele mo tatou tagata.”

Ae ui i le tele o le aoga o nei ala o fesootaiga e i ai a foi ma itu e faalelei ai, e pei ona i ai tusitusiga ua salalau i luga o upega tafailaga (facebook) le faaleaga ai lea e le isi tagata o le isi tagata e oo foi i le Malo o loo faaali ai manatu faitio o ni, ae i se finagalo o le Palemia i lea tulaga.

“E le na’o Samoa o lea e tupu ai mea ia, na ua faafogafoga atu ua tupu i Malo tetele, ae le afaina a la Malo tetele latou, atonu e le afaina tele. Ia pei o Malo tetele e aofia ai ia tulaga o iuga foi ie mo le puipuiga o le Malo.”

“A’o tatou la i le mea lea e tupu nei, ua faaoga e faaleaga ai tagata, ua fananau ia ia ai, ua fanau le fanau a ai i lo latou tama, e leai ni faamaoniga ma e le mafai ona faia ia mea e oo a i ta’itoalua o isi ua fai mai ua faiaiga ma ai ma ai o mea ia e feoai ai sapelu, ua vaai la i ai i ituaiga mea ia, a’o o lea e mumusu e faaali o latou igoa aua e iloa ia le tala pepelo.”

“O tagata ia e aafia ai o taitai o Malo, o tagata la ia e faia mea nei o tagata foi lele e tiapoloa mafaufau, o loto e fula i mafaufauga leaga, ailoga e momoe; ailoga e momoe e mafaufau ia mea leaga ma ia mea leaga e faaleaga ai lea tagata.” 

“E oo a i faifeau, ia vaai i le le popoi, e oo a i faifeau ua toso mai faifeau i ituaiga tuuaiga ia ae lalafi i tua mo mea o le facebook e le faalia o latou igoa.”

“Ana faapea e mo’i mea ia, o le a le mea e taofia ai le omai e faalauaitele mai i le Observer ona avanoa ai lea o tagata na e molia loa i le tulafono ma o i luma o le tulafono e saili le sa’o, aua na’o tagata ai ate, na’o tagata e leai ni ate e latou te faia mea faapea, ma nonofo ma fai  i tala faapea, ai foi e fai e o latou matua, o latou tina ia ni mea faapea.”

“E fiafia ae nofo ma fai ni upu faapea ua toe feusua’i o latou matua ma o latou tuafafine, ia se’i vaai i ai i le mataga o nei mea. A e su’ea nei tagata ia o lea ou te iloa o lea foi latou te faia mea faapea.”

“O le mea lena o lea ou te popole ai i lo latou saogalemu, o la e manatu i le isi itu a o la e i ai auala e taumasui ai tagata ua afaina. O le mea lea ou te fautuaina latou soso ese, aua tou te taalo i afi, a? aua le taalo i afi, o mea na tou te omai ai o le lavelave o tulafono, a o lea a ua uma ona iloa outou. E tou te fiu e lalafi a’o lea a ua uma ona iloa outou.”

Na ia saunoa ai foi i le tulaga o le a agai i ai le Malo pe a fai e taofia ai loa ma le vevesi.

“Ua iloa foi a oo loa a i le suega o le mea moni e le toe taofiofi loa le malo.”

“Lea foi la ua ou faatonua nei ia le Attorney General pe oo i le fia miliona, fai le mea lea, aua ne’i toe tuua o le a liliu loa le Malo e tagofia mea ia, pe oo a ina tipi loa ma le facebook ia ona le toe faaogaina loa lea e o tatou tagata.”

“Mea na ua oo i ai le tele o Malo, a lea sa taofiofi a le Malo ona o tulaga aoga, e to’alaitiiti latou ia uiga leaga, o loo ia ai mo mea o tuaiga mafaufau leaga ia ae lalafi i tua, o la e faapea o la e malu, ua leva ona ou iloa ina.”

“E ono oo a i ai le faaiuga a le Malo pe a fai pea fai pea uiga ia faavalevalea ia e aliali mai, aemaise foi o lea e faaoga e le toatele o tagata ia e o mai mai fafo, a’o Samoa la e nonofo i fafo o lea e ta’ita’iseseina e tagata ia o loo nonofo i inei.

Tusa la o inei ia e aluatu ai uiga leaga ia, ae te su’esu’e atu a o nisi o latou ia sa nonofo i fafo, ia na omai lea ia a e vaai foi i o latou aiga, latou te faavevesia ia o latou aiga.

O lona uiga o ituaiga tagata nei e lolo tele ia le tiapolo, e faaoga e le tiapolo tagata nei, tagata tonu a nei o loo faoga e le tiapolo aua e amio foi faatiapolo ina ia vevesi ai le atunuu nei, e pei foi ona vevesi atunuu na i le faaoga sese o mea nei.”

26 April 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>