Galue malosi le tama e fesoasoani le fanau

By Fetalai Tuilulu’u 26 April 2017, 12:00AM

E tofu lava le tagata ia ma lana galuega po lana matafaioi na foai mai le Ali’i. 

Ae o le itu lenei tusa lava po le a le faigata po le a lava le tuaiga galuega ete faia, e ao lava ona aua le fiu gofie ae taumafai aua lava se ai mo aiga ae maise fanau. 

O lea le manatu o le tamā ia Anitele’a Tyrell, 57 tausaga le matua le soifua o Faleula. 

I le vevela le lā le aso ananafi sa maua ai le fa’atalatalanoaga ma le tamā a’o fai lana galuega i autafa le auala. I le fa’atalatalanoaga ma le Fofoga o Samoa o le talitonuga o le tamā o le tele o tagata e le’o fa’aoga tatau taleni ma le fa’aoga tatau le taimi. 

“E eseese lava tagata ia ma o latou uiga ae maise o latou taleni. O lana lea tala i le Fofoga o Samoa. 

“E eseese uma lava tatou fa’anaunauga i lenei olaga ae tasi lava le fautuaga i le galue malosi ma fa’aoga tatau ia vaega. 

O Anitele’a e faigaluega i se tasi o kamupani i Moamoa ma o lo’o faigaluega e fesoasoani i lana fanau faigaluega i tulaga uma si ona aiga. 

“E tasi lava le vaega ou te naunau ai lava ou te faigaluega, o le fesoasoan lea si a’u fanau aua lava mea fai si o matou aiga. 

“Ia o aso uma lava ou la’u matafaioi lava o le fai le meaai ae le’i alu ese atu e faigaluega. 

“Ou te faigaluega e fa’amama se tasi o kamupani i Moamoa ma e na’o le tolu foi o’u aso faigaluega. 

“O le totogi le aso e $50 o le tupe foi lea e ave e fesaosoani le fanau i mea fai ma le fa’atupeina o mea uma. 

Sa fa’ailoa mai foi e le tamā le tulaga tau olaga. 

“I totonu lava ia o Samoa, e ao lava ona fa’amalosia le galulue fa’atasi o tagata uma ona o le taugata lava o le soifuaga. 

“E ao lava ona saili tupe fa’atasi le aiga ona mama ai le ao le avega e amo. 

“I Samoa lava ia, a leai se galuega o lou lava ia galue fai o le tausi o aiga ma toto sina maumaga. 

“Amuia tatou o lo’o iai fanua ma eleele e galulue ai aua lava meaai mo aiga. 

Sa taua foi e Anitele’a ese mai lana galuega, e fesoasoani tele lava i feau le fale ma tulaga fa’apena. 

“Ese mai le galuega ou te faia foi le fatu aiga tausi. 

“Ou te iloa foi e le tatau ona ou toe faigaluega aua o lo’o faigaluega le fanau, ae peitai o lo’u lava ia naunau taiga ina ia ou fesoasoania atu i latou mea e fai. 

“O le galuega foi e mafai ona maua ai se fa’amalosi tino ma aua ai le maua i ma’i. 

“Ma le mulimuli ou te fiafia lava iai, o le maua o le fesoasoani i le fanau i galuega fita o lo’o fai i aso uma.

By Fetalai Tuilulu’u 26 April 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>