Le Afa o Amosa: Le atunu’u manuia

Tusia Deidre Fanene ,

208 Hits

Le tamaligi na pa’u i le maga-tolu i Vaitele, feagai ma le Kolisi o Fa’atuatua.

Le tamaligi na pa’u i le maga-tolu i Vaitele, feagai ma le Kolisi o Fa’atuatua.

Ui sa to’ulu ma fa’aleagaina togafa’i ma nisi o la’au aoga, a ua lagona le agaga fa’afetai o le lautele o le atunu’u, ona ua fa’asaoina le soifua o le atunu’u aoao mai le Afa o Amosa lea na mou malie ‘ese atu i le po o le Aso To’ona’i talu ai. 

Fa’afetai ona e leai se soifua na ma’umau vagana ai nai vaega laiti o ala-tetele sa fa’aleagaina fa’apea le mamafa o timuga na lolo-vaia ai nisi vaega maulalo o le atunu’u. A o le atunu’u atoa lava, na saogalemu uma.

Na fa’aalia e le tina o Foketi Matini e to’afa ona alo mai Le’auva’a, lagona o le to’atele o tagata na fa’aalia i le Aso Sa.   

 “O le Vi’iga lava ma le Fa’afetai,” o lana fa’aaliga lea.

“O le a se tatou tala e fai pe ana feala mai i lenei aso ua leai uma le aiga ma le fanau?

“E fa’apopole-tagata tele; e le’i lelei sa ta moe anapo ona e alu lava le mafaufau i si a’u fanau ma fa’apea ane, po’o fea a sulusulu iai pe a o’o ina malosi mai le afa ae sa iai lava o’u masaloga, atonu lava  e o’o ane i le taeao ua leai se afa, ma na sa’o lelei lo ta mafaufau,” o lana fa’amatalaga lea. 

“Na matou feala loa i le taeao, tapena loa si a’u fanu mo le lotu ma fai-lemu ane si a’u tatalo e fa’afetaia ai Le Alofa o Le Atua. 

“E na o nai fa’i lava i ‘autafa o le fale na gaui ma to’ulu, pau lea. O lo’o lelei lava le matou fale ma mea uma, o le aso la lenei, o le Aso o le Fa’afetai, fa’afo’i le Vi’iga o Le Atua ona o Lona Alofa ua fa’asaoina ai lenei aiga, ae maise si o tatou atunu’u atoa.”

Na ioeina fo’i e Fatu Afele o Fale’ulu lea lagona.

“O le a se isi tala a fai, na o le fa’afetaia lava o Le Atua i Lana puipuiga malu o tatou uma,” o lana fa’amatalaga lea.

“O le matua vavega lava le mea na tupu. Po’o a lava tala a isi tagata e fai, ‘ou te fai atu lava a’u, ua faia e Le Atua se vavega mo Samoa aua o Ia ua na ‘ave-‘esea le afa ma Samoa.”

I luga o upegaTafa’i-Lagi, e matua anoanoa’i mau tusitusiga ma fe’au fe’avea’i, o finagalo fa’aalia o tagata ua fiafia, ona ua fa’asaoina Samoa.

Pei o Peone Fuimaono na fa’apea: “O se matua vavega lava, ona o mea fa’apea e seasea tutupu, a’o lea ua tupu ia Samoa i le vaveao nei. O le taimi nei, tatou usu fa’atasi le pese lauiloa a Hemi “Le Atua ‘aumai se pese; ‘ou te pese ai i taimi uma o lo’u ola; O Iesu le ola, le Ola o le Lalolagi!”

E tele na’ua isi fea’u tusitusia ma finagalo fa’aalia ona o le Afa o Amosa. 

O le finagalo fa’aali lea o se tasi lauiloa o le atunu’u, o Vaimasanu’u Zita Martel i le taeao o le Aso Sa.

“O le totogo a’e o le taeao i pesega a manulele, ua matua leai se matagi,” o lana fa’aaliga lea. 

“E le uma lo’u maofa tele i le malosi o mea o le natura ma le ‘auala e fa’ailoa mai ai, o lo’o soifua pea.

“Na manino lava le olioli mai o mea uma i le aso ananafi a’o tatou tapenapena ma sauniuni mea-a’ai, o moli-ga’o, o vai, laupapa ma ‘apa, ma mea uma lava sa maua e punipuni ai fa’amalama ma puipuia o tatou fale. Na matua alu fa’asoloatoa le fa’atauina o afi-tiso ma afi-penisini i le SMI ma le Bluebird, o tapoleni fo’i na pei o le fa’atauina o panikeke-fai vevela.

 “Na matou taunu’u atu ma taumafai e puipui le matou fale. O le pa’o o fa’asoloatoa o le samala e mautinoa na fai ma fa’alavelave i o matou aiga-tua’oi i le aso atoa ma le afiafi-po o le Aso To’ona’i. 

“Sa vevesi lava tamaiti i a latou ta’aloga i le timu ona o se taimi fiafia lea mo latou a’o atu-popole ma tau fuafua ma fa’apena ai lava mafaufauga i le tele o taimi. 

 “Na suia atoa le pa’o o samala e le ma’ati’ati mai o le u-u o le matagi, a’o fa’atalitali pea ma tatalo ina ia fa’asaoina tatou e le malosi o le Ali’i o Amosa, lea na i’u ina mou malie atu lava i se vaitau o le lua i le vaveao. 

“O lo’o lelei pea la’u toga-fuafua i ‘autafa o le fale ui ina gaui nisi lala ae leai se la’au na mafuli pe pa’u, ona e  putuputu lava.

“O la’au lava o le togavao o ni tali-matagi lelei lea mo fale-ta’alaelae ma ua tele fo’i afa o lo’o sologa lelei lava. Pei fo’i o la’u tali-pupuni, ‘ou te Fa’afetai Tele atu ai lava i o’u aiga uma ma uo, mo talosaga, le alofa fa’aalia fa’apea le puipuiga mo matou uma i Samoa nei.”

O ia lagona e mautinoa, na o’o-o’o i finagalo o le afe ma afe o tagata Samoa i lo tatou atunu’u nei, lea na tumutumu mulimuli  anei i sauniga-lotu i le taeao ananafi, e momoli le fa’afetai i LAGĪ.

© Samoa Observer 2016

Developed by Samoa Observer in Apia