Aloa’ia e Samoa le Aso mo Fitafita sa i Taua

Tusia Deidre Fanene ,

208 Hits

Lana Afioga le Ao Mamalo o le Malo, Tui Atua Tupua Tamasese Efi

Lana Afioga le Ao Mamalo o le Malo, Tui Atua Tupua Tamasese Efi

Moni e leai se aso-malolo i Samoa e aloa’ia ai ma fa’amamalu le Aso Fa’apitoa mo Fitafita sa i Taua, peita’i, e le’i tu’u-mamaina ai le ‘autu o le aso, e le to’atele o le atunu’u sa ‘auai i sauniga fa’amanatu na faia i le taeao ananafi, i le taulaga i Apia. 

O anoanoa’i aiga, o uo ma ‘aumea-mamae a fitafita sa tau ma le Malo o Ottoman i Gallipoli i le Taua Muamua a le Lalolagi, sa ‘auai i le Solo a Fitafita o Taua ma le Sauniga Fa’amanatu i le vaveao ananafi. Na aloa’ia ai fo’i i lea aso fa’amanatu, ali’i-totoa o Samoa sa tautua ai ma maliliu ai fo’i nisi, i taua uma nei, o fe’ese’esea’iga ae maise o fa’atinoga ma galuega o le tausia o le filemu.    

Sa ‘auai ai le Ao Mamalu o le Malo, le Afioga a Tui Atua Tupua Tamasese ‘Efi ma le Masiofo, fa’apea le Sui Palemia, Lautafi Fio Purcell mo le taua’aoina o pale mo lea fa’amoemoe. 

Saunoa Lautafi, o le savali ma le sauniga atoa, ona pau lava lea o le sao o Samoa e amana’ia ai ma manatua ali’i ma tama’ita’i ua tele so latou sao mo tupulaga uma.

“O le to’atele o lato nei, sa ositaulaga ma tu’uina atu lo latou soifua, aua le puipuia o le sa’olotoga ma soifuaga manuia ua tatou ‘ae’ae ai nei,” o lana saunoaga lea. 

“O le taimi e toe fa’amanatu mai ai ia tatou, le fa’amoemoe maualuga sa ofoina atu ai o latou soifua, ma o le a manatua pea e o’o mai i lenei aso ma una’ia ai pea galuega ma sauniga a tupulaga fai-mai, aua lava le fa’amautuina o le soifua filemu ma saogalemu o lo tatou atunu’u ma le lalolagi aoao.  

 “A’o tatou fa’amanatu Fitafita o Taua i lenei tausaga, tatou te manatua ai le tele o vaega o le lalolagi o lo’o fa’apea lava ona afaina ona o lo’o va-tau pea a’afia i fetaua’iga i totonu lava o o latou lotoifale.

“O nisi lava o nei fe‘ese’esea’iga, e ono afaina ai lava le saogalemu lautele o le lalolagi aoao.

“Lona uiga, o lo’o iai pea le sao tu’u-fa’atasi a le lalolagi, e taumafai ai e fo’ia nei fe’ese’esea’iga ma fevaevaea’iga, a ia ‘ausia se filemu mo tagata uma o lo’o afaina ona o nei fa’afitauli. 

 “O lo’o iai lava nisi o lo’o fa’apea ane, o le fa’amanatuga o Fitafita o le Taua, o vi’iga lava ia ma le fa’amanatuina o taua, a ‘ou te iloa, o latou tonu nei sa ‘auai i taua, e muamua lava fa’apea mai, pau lea o o latou mo’omo’oga ma tatalo, ia ‘aua nei va’ai  a latou fanau ma o latou atunu’u, i le ogaoga ma le mata’utia o nei mea o taua. 

 “O atunu’u uma o lo’o ‘auai i lenei taeao, ua tofu-sao uma ma ‘auai i taumafaiga, a le o lalo o le fu’a a Malo ‘Aufa’atasi, po o le lagolagoina lava o taumafaiga mo le fo’ia o fetaua’iga ma le tausisia o le filemu i le lalolagi.” 

Na saunoa fo’i Lautafi, ua ‘auai fo’i Samoa i le vaega-‘au a atunu’u ‘ese’ese i nisi o vaega vevesi ma o le a manatua pea ma le agaga fa’afetai, le tautua ma le galuega ua ositaulaga ai mo le atunu’u ma le lalolagi.

“O lo’o fa’aauau pea ona ‘auai atu Leoleo Samoa e tautua i nisi o fa’atinoga-mata’utia i nisi vaega o le lalolagi e aofia ai le Pasefika ma o le a fa’apena lava ona fai lo tatou sao mo ia galuega lelei i le lumana’i,” o lana saunoaga lea. 

“Avea fo’i o lenei aso fa’amanatu o Fitafita o Taua, e momoli atu ai le fa’amalo ma le fa’afetai tele i le Fua-Va’a o le puipuiga a Ausetalia ma Niu Sila, ona o la latou tali vave mai e fesoasoani ia Samoa i le tele o taimi e afaina ai i fa’afitalu i totonu lava o le lotoifale pe a o’o mai le ma’ema’e o fa’afitauli fa’aleNatura. 

“I aso e lua ua te’a atu nei, sa tatou tapenapena ai lava mo le o’o mai o le isi afa o Amosa ae fa’afetaia ai, ona o se vavega ua fa’asaoina ai tatou uma mai nisi o fa’afitauli ogaoga e ono aliali mai.

 “E toe momoli atu ai le agaga fa’afetai tele i Vaega’Au a Ausetalia ma Niu Sila fa’apea fo’i sui o vaegta mai isi malo sa fesoasoani mai ia Samoa i aso ua mavae.

“E mulia’i  i se fa’amatalaga e fa’apea atu ai, o le fa’amanatuina o le Aso o Fitafita o Taua, tau ia ia le na o se aso fa’amanatu, a ia toe una’ia ai pea i a tatou tatalo ma mo’omo’oga, ta’ita’i o le lalolagi, ina ia fa’aaoga lelei meaalofa foa’i-fua a Le Atua Soifua, e fesoasoani ai mo le sa’ilia ma le tausisia pea o le filemu o tagata uma i le lalolagi ma ia tumau ai pea i le filemu ma fealofani.” 

© Samoa Observer 2016

Developed by Samoa Observer in Apia