Galulue pea

Tusia Ilia L. Likou ,

95 Hits

Aleni Aleni.

Aleni Aleni. (Photo: Ilia L Likou)

O le aso ananafi na maua ai le fa’atalatalanoaga a le Fofoga o Samoa ma Aleni Aleni o le afio’aga o Faleasi’u.

Na ia fa’ailoa ai o le fa’ato’aga o se tasi lea o vaega ua fa’alagolago tele i ai le aiga aua le tausiga i aso uma.

 “Ia o le fa’ato’aga o lo’o ua fesoasoani tele mo le aiga i aso uma, ia ae pei e tele  mai loa nai fa’alavelave ia ona la’u lea e fa’atau i  tafāala ia po’o o le maketi fo’i ae pei o le mea’ai lava a si a’u fanau e fa’amuamua i aso  uma,” o lana saunoaga lea.

 “Ia e pei o le ola lava  le ma’umaga,” o lana tala mai lea i le Fofoga o Samoa.

 “O tupe o lo’o ua mafai ona maua mai i aso uma ia  o lo’o fesoasoani tele i le aiga.

 “O a’u e to’alima le fanau, e to’atolu o lo’o a’o’oga e pei o le ma’umaga lava o lo’o  fa’alagolago ai aso uma.

“Ia e le faigofie le feagai ai ma le tausiga o aiga, ona e moni lava e leai se isi e tele ai pea ni ana tupe i aso uma.

 “E pei o lea lava le una’i malosi i aso uma, ina ia alu i le ma’umaga aua a leai, ia o lona uiga e fia’a’ai si a’u fanau.

Na ia fa’ailoa le faigofie o le olaga pe a galulue malosi.

 “A le galue ia e leiloa pe fa’afefea le fanau.

 “O lona uiga, a mana’o e manuia le fanau i le lumana’i e tatau lava ona galue malosi.

 “Aua e tatau lava ona fa’amuamua aiga i aso ma taimi uma o le olaga.

Na ia ta’ua e i ai lava fa’afitauli.

 ‘E pei o le itu fa’anoanoa ai lava i ituaiga pisinisi nei, ia o le leai o se ta’avale e feave’ai ai fua o  fa’ato’aga pe ā fia fa’atau i le mamalu o le atunu’u.

“Aua a o’o le taimi e ave ai talo e fa’atau ia e fa’aaoga lava ta’avale laiti ,ia ae ua le toe taugofie fo’i.

“Ia o le isi fa’afitauli ia o le galue to’atasi le aso atoa aua e alu le lo’omatua e ave tamaiti i le aoga i aso uma.

Na ia ta’ua o le tau o le soifuaga o lo’o ua i ai nei, ua faigata lava.

“Ia e fai o le taugata o oloa, ma nisi o ‘au’aunaga ae o le si’itia i luga o le tele o vaega o lo’o ua tatou maitauina i nei  vaitau.

“O lea e ao ai lava ona o tatou mata’ala ma aua le fa’alogologotigā ae to’aga e galulue.

© Samoa Observer 2016

Developed by Samoa Observer in Apia