Mafatiaga o se tinā i aso uma

By Deidre Fanene 26 February 2018, 12:00AM

O le leai o se tupe ma le lelei o le nofoaga e nofo ai o se olaga faigata lea mo le tina ia Saini Leasi.

O lenei tina ua 55 le matua o le soifua ma e to’avalu lana fanau, ma fanau a lana fanau e to’aiva.

Sa ia ta’ua o se olaga faigata tele mo ia le tausiga o le aiga ma o le tama o le aiga ua tu’umalo.

“Talu ona maliu le tama o le aiga, o a’u lava le fa’amoemoega o le fanau, aemaise lava i fanau a la’u fanau.

“E le o se mea faigofie le tauave uma o mafatiaga ale aiga atoa i lima e lua, o le mafuaaga lea na fai ai le fesoasoani ina ia fesoasoani i le tauaveina o mafatiaga o le aiga ae peitai o lenei ua tu’ua na’o a’u.

“O le tele o taimi e leai ai se tupe, ma ua leiloa poo fea a alu e sue mai ai se tupe. O isi taimi e ai lava na o le talo ma le ti i taimi o taumafataga o le afiafi.”

Ua tofotofoina lenei tina i tulaga tau tupe.

Ua tolu nei tausaga talu ona nonofo lenei aiga i se fale e le’i taitai uma, e o’o fo’i i le latou vai o le a tipi talu ai e le’i totogia lava le latou pili o le suavai.

“O le itu e fa’anoanoa ai ona o le to’atele o tamaiti, ae o le tulaga o le fale lea matou te nonofo ai e fai lava si fa’aletonu.

“Tele o fa’afitauli olo’o feagai ma matou.

“E mana’omia ni tapoleni e tali ai le timu mai le sao mai i totonu o le fale.

“O le matou fale e le’i taitai mae’a ona fai, sa matou nonofo i Savaii ae ua matou omai iinei ina ua aliu lo’u to’alua ma sa ou mana’o e fai sesi fale fou mo la’u fanau ma ola ise olaga lelei.

“E uma loa le masina lenei le toe iai loa ma se matou vai ona e tatau ona totogi le aitalafu o le vai.”

O le isi ana fanau e to’alua ua fai to’alua uma ma e latou te nonof fa’atasi uma lava.

E to’aiva fanau a lana fanau.

O le to’alua o lana tama teine e faigaluega ma e $150 le totogi e maua i le vaiaso ae peitai sa ta’ua e lenei tina e le taitai lava lea tupe i le tausiga o le aiga atoa.

“Ua ou manaomia lava se olaga filemu mo la’u fanau, ma se olaga fa’amanuiaina mo latou ae le o se olaga pologa.

“E leai se tupe maua, ae to’alua tamaiti o lo’o aooga, e le mafai e la’u tama teine ona alu e sue sana galuega ona ou te manaomia ii le fale e fesoasoani mai i le tausiga o le fanau.

“Manaomia lava le fesoasoani i le itu tau seleni ina ia mafai ona tausi le fanau.”

O le tulaga i le fale o lo’o iai e fai si laititi, ae o le toatele o le fanau a le tina e laiti ma e manaomia e latou se latou lava avanoa e fai ai lava latou taaloga.

“O le fale le ta’ua o lo’o latou fa’aaogaina sa fai e nisi o lona aiga, ona o loo malamalama e le gafatia ona faia se fale.

“E lelei pe ana faapea o loo iai se tane vai e fesoasoani tele lea mo matou ma e le tau moomia ai foi se vai, ona o loo iai le tane vai.

“O loo iai le fa’atoaga e tua iai ae o le tele lava o taimi e fesoasoani e fai ai meaai a le fanau, am a oo ina leai se tupe e faatau atu ina ia maua mai ai se seleni.

“E ui lava ina ou mativa, ae faafetai lava mo le fanua o loo maua ai meaai.

“O lea e tulei lava le fanau i le aoga ina ia maua se latou lumanai manuia ae aua nei ola i le olaga lenei ou te ola ai na o le pologa ma le le tagolima ma ele maua ai se fiafia.”

Afai e te fia fesoasoani i lenei tina faafesootai le numera o le 7270478.

By Deidre Fanene 26 February 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>