Mana’omia se fale mautū

Tusia Deidre Fanene ,

51 Hits

Mana’omia lava e Fitufa se fale mautū.

Mana’omia lava e Fitufa se fale mautū.

I le ola ai i se olaga mativa ma le lē tagolima o lona uiga o le fesili lava i so’o se mea e lē fa’atuaoia.

I le mataupu e uiga ia Poufa Fitufa, mai le afioaga o Afega-uta o lo’o nofo i totonu o se fale toeititi lava pa’ū, o le fola e tele pū pū, ma se laulua e ta’atia lava i le palapala.

Ae peita’i talu ai ona o lenei aiga o se aiga finau o le ala lea e feola ai lava i mea o lo’o maua i o latou lima.

“O le a se mea e mafai ona fai pe afai e le lava le fa’asoa e fauina ai a se fale.

E na’o lo’u to’alua lava e faigaluega o le matou aiga,’ o lana tala lea i le Samoa Observer.

“E to’aono le mafanau ma o le totogi atoa o le tamā e fa’asoasoa i mea’ai ma mea’ai a le fanau.

“Ma o lea matou te ola lava mai le isi aso totogi se’ia o’p atu i le isi aso totogi, pau o le ituaiga olaga lea e maua.

O le afa o Gita sa fa’aleagaina uma le fale o lenei aiga.

“A e tagataga’i lelei lava i le matou fale, e pi’o i le itu taumatau, ua leva pou o le fale, e o’o fo’i i le taualuga sa leai se mea.

“O le itu e laki ai ona sa matou nonof o i le fale o le matou tuaoi i le taimi o le afā, I le mae’a ai o Gita sa toe kamuta lava e lo’u to’alua ma nisi o tama le taualuga o le fale.

“Ae o le tulaga o lo’o iai e le’o mau apa o le fale, ona e leai ni fao o tu’itu’ia ai, o ma’a ma isi meatotino mamafa o lo’o taotaomia ai apa.”

Sa ta’ua e Fitufa e to’alua nai ona tuaoi e leai ni fale le ta’ua o lona uiga o lona fale lea e fa’aogaina e nei aiga e lua.

“A e taga’i i fale o nai isi tuaoi, e talitonu e tea ta ai lava, ae o le fale lenei lea e fa’aaoga uma lava e matou.

“E leai se tane vai o le fale le ta’ua, ma e ui lava ina fa’aletonu ae matou te fa’aaogaina lava.”

Sa fa’ailoa mai e lea tinā o le iai o se fale lelei ma se fale le ta’ua mamae nonofo ma fa’aaoga e lana fanau o se miti lea o lo’o nofo ma ia.

“Afai o iai se tasi o lo’o tele ana tupe e mafai ona fesoasoani mai, fa’amaolemole ia maua le loto alofa i lou loto ina ia e fesoasoani mai i nei mafatiaga,” o lana saunoaga lea i le Samoa Observer.

“Pau lava lea o le filifiliga lea e i ai, o le aioi mo se fesoasoani, ona e talitonu le loto, e le gafatia ele totogi o le tamā o le aiga ona fauina se fale mo lo’u aiga.

“O lena ua e taga’i atu i le fale le ta’ua o lo’o fa’aaogaina, e le maua ai se soifua maloloina ae peita’i pau lea o se mea ua mafaia.”

Ae i le tulaga i meatoto sa ta’ua e lea tinā e le oge lava i talo ma fa’i fa’apea ai ma ulu.

“O le mea taua lava o le iai o le kofe po’o le laumoli e alu ai le fa’alifu talo po’o le fa’i o le itu taua lea, ona olo’o maua le mea’ai e a’ai ai e le’o oge i mea’ai.

“Ae pau lea o le itu lea e mafatia ai ona o le le lelei o le nofoaga o lo’o matou nonof ai.

“O la’u tatalo lea i le Atua i aso uma lava ina ia fesoasoani mai ma foa’i mai se fale lelei mo matou ma si a’u fanau.

Afai e te fia fesoasoani ia Fitufa vili le numera 772-4731.

© Samoa Observer 2016

Developed by Samoa Observer in Apia