LAUGA - “O le loto maualalo, e sili lea i le malo o le lagi”

Tusia Rev. Petaia Setu ,

1124 Hits

(Mataio.18:04)

Maifea taua ma misa? Maifea le matau’a ma le fouvalega? O fea e sau ai le fia tagata ma le loto fefete?

E mafua i se a ona pulepuletutū ma le pule sauā? Pogai mai i fea le faufauleaga ma le lē vaai alofa i isi tagata? Fai mai Iakopo, “E le o lenei ea, mai o outou manao leaga o loo tau i o outou tino uma”? Mai lo outou tuinanau; mai lo outou losilosi; ae le mafai ona outou maua (Iakopo.5:1-2).

“Ua tatou iloa le upu e tasi e tali ai – o le faamaualuga. Se amio lea o a’oa’oina ai i tatou mai le Tusi Paia mo le malo o le lagi? E leai! Se olaga lea na tapenaina ai e Iesu lona au soo? E leai! “O lenei o sē faamaulalo o ia ia te ia… e sili lea i le malo o le lagi” O Iesu lea.

O le loto maulalo, o le loto lea ua ta’upologaina. O le loto ua puleesea (e pei o tama iti. f.4); e fifilemū; e agamalū (Isa.53:7). O le loto ua tali mălie i tigā (Lk.23:9-34); e maua iai malo (Ioane.19:30). O le loto lenā ua folafola mai ai e Iesu faamanuiaga – e sili lea i le malo o le lagi.

E lē leaga le ola saili ma le loto naunau. Ae e leaga le saili ma le naunau ua faufau (Mar.10:37). Lea foi la ua mana’o uma le au soo se i faatulaga mai le kama makua ma le kama laikiki; le mua mai ma le muli mai; le alaala i le matuā tala ma le see talā – luma; le suafa tāua ma le suafa pitovao; tofiga ta’ita’i ma le tinifu tau faataitai (f.1). O ai e ave iai le faamuamua? O ai e maualuga lona aloa’ia? O ai ea e sili? 

E le o tamaiti uma o loo faaaoga e Iesu i lana aoaoga nei. Peitai, o le vaega laiti latou te le i iloa le uiga o mea. Le fanau laiti latou te le i mafai ona tali mai pe teena le oona; le mū; le mageso; le ma’ini, ma nisi uiga uma faapena auā o loo mamā o latou olaga mai le faauigaina o mea, ae o loo puleesea i latou e nisi e mātutua.

O le mamao ia o le manatu o loo o mai ma le au soo ia Iesu, ma le ata manino ua faataoto atu e le Alii e faaagatonuina ai le ola tausili ma le ola faualuga. Manatu lava le au soo o le fai ma soo o Iesu o le sili lea i le malo o le lagi.

Ae leai! Ua fai ifo i latou i o latou manatu o a tatou pulega ma faiga masani o loo faamamapo nei e faitaulia i le lagi – e leai lava! ‘a le liua outou, ma avea ia pei o tama iti, tou te le sao lava i le malo o le lagi? Ioe; o le liua ia pei o tama iti, o lona uiga o le toe alu i lalo e a’e mai ai. Foi i tua e toe amata mai ai.

Silafia lelei e Iesu o loo taaloa le olaga o Nikotemo. Fai mai Iesu, ‘e le mafai ona iloa e oe le malo o le Atua vaganā ua toe fanau oe (Ioa.3:3).’ Ioe, o le faalavelave o tatou, e musu tele e toe foi i tua. Faigata tele ona toe alu i lalo.

O le loto maulalo, o le faavae lea o uiga tausaafia ma amioga lelei uma o le olaga faakerisiano. A o le foeuli lea o le ola pulea i la le agaga. O le upu mua lea na tatala ai le lauga a Iesu i luga o le mauga o Olive, e faailo mai ai faitotoa o le Malo o le lagi (Mat.5:3). A leai se loto maualalo, e le maua loto faamagalo. Afai e le maulalo le loto, e le mafai ona e saoloto. A o le faamalosiau e masani ai le faalogo, e maua i lalo mālō. Ioe, na iite Elifasa i le finau mālō o lana uo i ona tigā.

Ua faapea lana faamalosi, “Pe a faamaulaloina nisi ona e faapea atu lea, E faaeaina. Na te faaolaina foi le ua faamaulalo (Iopu.22:29). “E faapea foi le manatu o le fai Salamo, “E maualuga Ieova, ae silasila mai o ia i lē ua faamaulalo. (Sal.138:6).

O soifuaga atoa lea o lo tatou  Alii Faaola na pu’ea mai le fale o manu, ae mapuea i le laau mataga ma molimauina e le lagi ma le lalolagi lona faaeaina mai lona loto maulalo. O le ata lea sa ta’utino e Paulo i le ekalesia i Filipi. ‘Aua ne’i faia se mea e tasi ma le finau vale; a ia taitasi outou ma manatu ma le loto maulalo, ua sili nisi uma ia te ia (Fil.2:3)

Samoa, e foai mai e le Atua lona alofa tunoa i e faamaulalo (Iako.4:6).

Aisea tatou te fetaua’i ai? Ua saga fai finauga i se ā? Fai mai foi e iloa le tamalii o Samoa i lana tū ma lana aga? Fai mai foi e malu Samoa i lana ‘tōfā paia’ ma lana ‘faautaga mau’? O fea? O le pule? Poo suafa? O le tofi? Poo mamalu? O mea a ai? Pe le o mea uma foi ia sa ia Iopu? Na tofotofoina e le Atua e ana mea uma lava. Tagi Iopu ma tautino ina ua aveesea o mea uma, E leai lava sa’u mea; o mea uma a le Atua (Iop.1:21). E aumā le pule ma tofi ae fetaua’i ma felaulaua’i ai?

Se a le uiga o Suafa ma mamalu faale atunuu ae malepelepe ma lē fealofani ai aiga ma nuu? E le o le suafa e malo ai! E le o le tofi foi poo mamalu ua tā’ua! Uso e, o lalo. “Faamaulalo ia i luma o le Alii, ona faamaualugaina lea o outou e ia” (Iako.4:16); “Auā o sē e faamaualuga o ia ia te ia, e faamaulaloina lea; a o sē faamaulalo o ia ia te ia, e faamaualugaina lea” (Mat.23:12). Sē e iai lava le faa-toeaina’ a le atunuu – Tatou fai i fanua! Se i o tatou fale le susuga ma le saunoaga i le tupua ma le la’oai o aiga ma afioaga!

O iinā e auau ai le ato ponapona. Samoa e, o ou mamalu ma au measina e le faatasinaina i le alatele, ina ne’i faitauina se faamaualuga ma se loto fefete. A o le soalaupule mai le loto gatasitasi ma le agaga maulalo; O se Samoa fiafia lea i le amanaia o lana tuualalo. Fai mai lava outou, ‘a sala uta ia tonu tai’.

I le, o iinā tonu lava e iloa ai le matai. E mafai ona ia faaleleia lona aiga; faamaopoopo lona nuu; tausia le nofo fealofani o tagata uma. Soo se tautua lava faa Samoa i lo’u manatu, e faavae mai le loto maulalo. O la Iesu, ‘a o sē fia sili ia te outou, ia fai o ia ma a outou auauna. A fia muamua, mulimuli. A fia oo i luma, pa’ō mai tua. A fia pale i luga, onosai mai lalo. Auā foi o le loto maulalo, ua sili lea i le malo o le lagi (Mat.26:27)

Samoa e, o le loto maulalo o lo tatou Alii, na ia onosai ai i ona tigā, ae ofo atoa mai lona lava soifua paia, e ala i lona tino paia ma lona toto paia, ina ia faaolaina oe ma a’u i lona manumalo. A lē maua e oe le loto maulalo, e te lē maua foi se loto faamagalo. A leai sou loto faamagalo, e lē mafai foi ona faamagaloina oe e le Atua. (Mat.6:14-15). I le, e lē tatau foi ona e ’ai ma inu ma le faaletatau i le faatusa o le tino ma le loto o Iesu. (I Kori.11:29).

A pule le loto maulalo i o tatou olaga, ona le maua lea o ni taua ma misa; ona lē toe tusitusilima lea ma fefaamasinoa’i; ona le toe felamata’i lea ma fe’aina’i. Ae ola tagata uma i le fealofani ma le fetausia’i; I le feavata’i ma le fefaamagaloa’i. Amuia e loto maulalo, auā e sili lea i le malo o le lagi.

Amene

7783782/7737063

© Samoa Observer 2016

Developed by Samoa Observer in Apia