Fia fa’aleleia a matou auala galue
A lelei auala galue, e faigofie mea uma.
Na fa’ailoa e le tamā i a Leulu Faletoi, 49 le matua o le soifua o Faga Savai’i ananafi, i le Fofoga o Samoa le faigofie o le olaga i Savai ‘i.
Na maua le faatalatalanoaga a le Fofoga a Samoa ma Leulu ina ua ma’ea le fono a lo latou nu’ua’o lo’o aga’i atu le fale.
E fa’apefea le olaga i le nu’u o Leulu?
“O lo’o sologa lelei lava le olaga i lo matou nu’u,” o lana saunoaga mai lea.
“E saogalemu fo’i mo lo’u ia aiga.
“O le itu mautinoa, e leai a se faigata i le olaga i lo matou nu’u.
“E ‘ese’ese lava Savai’i ma Apia.
“E pei o lena itu o Samoa, e to’atele lava tagata e fiafia e tafafao i fale kalapu ma fiafia e o i isi fiafia ma e pei o vaega nei o lo’o tele ina tutupu mai ai fa’alavelave mai Apia.
“Aua e nofo a le tagata ia i lona ia lalolagi.
“O si o matou motu nei, ia e pei o le tele o le taimi e fa’aalu i a matou fanau ma o matou aiga.
“E amata mai lava i le Aso Sa se’ia pa’ia le Aso To’anai.
Ou te fiafia a la a’u ia i le olaga i Savai’i aua o fonotaga a le nu’u e fa’amalosia ma e matou te tausi fo’i i aganu’u, o lo’u talitonuga o se mea taua na o lo’o fesoasoani tele i le olaga filemu a le nu’u.
“ O lo’u a ia maitau i lenei vaitaimi, pe ua amata na mou atu aganu’u ma aga fa’aSamoa e mafua mai i le tele o suiga i le olaga ae peita’i matou te taumafai lava e tausi ma tu malosi i aganu’u a Samoa.
“Ou te fa’afetai lava i le Atua mo lenei atunu’u aulelei o Samoa.
Aepeita’i e pei o le fa’afitauli lava o lo’o ua feagai ai nei, o le fa’aleagaina lea o auala galue a le afio’aga ma ua mana’omia ai lava se fesoasoani.
“O Faga, Savai’i e tutusa ma le tele o isi nu’u i Samoa.
“E ala lea i le su’eina o se tupe maua mo mea’ai mai meamata mai fa’atoaga.
“A’o le itu e faigata ai i lenei tulaga, pe’a o’o la i taimi matou te aga’i atu a i Talaloa. O le matua leaga lava o auala galue.
“E fai o le vaiti ae toe leaga.
“ Ae pei o fa’ato’aga o se fesoasoani tele atu lea i mea fai a le nu’u, fa’apea foi mea e fai a le nu’u aemaise lava fa’alavelave.
“E le fa’apea la na’o le tasi a le nu’u mai Savai’i o lo’o tula’i mai ai lea fa’aletonu, ou te talitonu toeiti’iti a so’o uma nu’u i Savai’i e fa’apea ma ou te manao’mia lava se fesoasoani i lenei itu.
“O lo matou mana’oga o ni auala galue ia fa’alelei ..... aua a fa’apea e leaga a le tulaga o auala, ia e faigata fo’i ona fai a matou galuega i aso uma aua le su’ina o le seleni mo nai o matou aiga.
Na ia fa’ailoa mai i le Fofoga o Samoa le tele o taimi sa fa’apea na fa’aleleina ai o latou auala galue ae e le umi a ae toe fa’aleagaina.
“O se tala moni lava lea.” O lona ia lea manatua fa’aalia.
“E lagona a le fa’anoanoa ona o le tulaga lea e tele le tupe fa’aalu a le malo mo auala a Upolu ae misi atoa Savai’i.
“E tusa lava pe matou te o i se ta’avale i Talaloa, e uma ifo a ua malepe fo’i lena ta’avale i le leaga o le auala.
“E mamao le mea matou te o e fai a matou galuega i uta, a leaga la le ta’avale, ia matou te toe savavali i tai, ae aua o le tele o taimi ole matua vevela lava o le la.
“Matou te iloa o a lava mea e lelei mo Upolu, e tatau fo’i ona sili atu lona lelei mo Savai’i.
“Ia talosia ae toe silasila le malo e toe fa’alelei atili auala i lea itu o Samoa.
“I lo’u a ia manatu, e tatau a ona omai le malo e va’av’ai tagata faigaluega ia e faia auala ina ia mautinoa ai o lo’o lelei na fa’ataunu’uina a latou galuega.
E ui la i lea fa’afitauli ae na ia fa’ailoa o lo’o sologa lelei mea uma i totonu o lona aiga.
“E pei ona ou fa’ailoa muamua atu o lo’o sologa lelei mea uma ma o lo’o fiafia lava lo’u aiga i le olaga i nei i Savai’i.
“ Ou te fa’afetai a a’u ia mo mea uma.