Ia alofa ma le fa’amaoni i matua.

O lea le manatu fa’aalia o Matalena Tafi, 20 tuasaga le matua o le afio’aga o Fusi, Savai’i.O Matalena o lo’o feagai ma le fatu aiga tausi aemaise le tausiaina o ona matua.

I le fa’atalatalanoaga ma le Fofoga o Samoa, na ia fa’ailoa ai e sili atu ona taua le ave o lana fa’amuamua I tausia o matua aua e na te maua ai fa’amanuiaga.

O Matalena e lona ono o le fanau a ona matua ma na ia fa’ai’uina ana a’oa’oga i le lua tausaga talu ai.

“I a te a’u lava ia e leai se isi manuia e maua atu nai lo le nofo e va’ai lelei matua ma alu lelei ai le malosi.

 “Ma o lo’u talitonu foi o le fiafia sili o le nofo e tausi mātua ma ālofa lelei iai o le auga lava lea o le olaga.

“O le ala tonu foi lea o le nofo ai e tausi le matua aua o le mafai ona toe tu’ulafoai i le matua o lo’o iai o la soifua. 

“E le tau fesiligia lava le tali o  fa’amanuiaga le Ali’i i le tagata e tausi ma alofa lelei i ona matua.“O le galuega foi e fai ma va’ava’ai lava i le aga’i atu ai o le olaga i le lumana’i.

Sa tāua e Matalena e taua lava i  fanau le usiusita’i ma fa’aaloalo i matua. “Aua o le tele lava o tagata e tautino e alofa i mātua i upu  ma tala ae leai lava se fa’atinoga o iai. 

“Ou te faia ia tala aua o olaga lava e pei ona tatou iai e fa’apenā, tele o le fanau e gutu oso ma gutuā ma leiloa le vā mā mātua, ae le mafaufau lava tele lava o le olaga o mātua sa tausi ai le fānau.“Ia te a’u lava ia e le mafai ona ou totogia le fia o tausaga o gafa ma le tausiga o a’u ae na’o le pau lea o le galuega ou te faia e tau ane ai.

O le talitonuga foi o  Matalena e mulimuli lava galuega lelei i le tagata lava ia. “Mo le fanau, o lo tatou matafaioi lava o le tausi i mātua ma le alofa i mea uma e mana’omia ai le tatou fesoasoani. O le alofa foi lea.

“E ao foi ona tatou iloa lelei sa tausi  mai lava i tatou a’o tatou laiti, ma e malamalama lelei o tatou matua i a tatou gaioiga uma e fai, gagana i taimi e otegia ai tatou le fanau ae le suia ai lava le alofa fa’alematua.

“E tele foi ina tatou fa’alogotātā, fa’aali uiga le mafaufau, ma uiga e lē fa’aaloalo ma o se tulaga fa’anoanoa foi pe a tatou toe mafaufau iai.

“Ou te le fa’apea atu ona o a’u ua lelei ma atoatoa mea uma, ae pau o lea ia tatou iloa o mātua o le mea’alofa sili lea i le puipui’ina o matou le fanau.

“E ao ai lava ona tatou fa’aaloalo ma alofa mānū o maua le taimi.

O le talitonuga foi o Matalena o le fiafia e maua mai i le loto gatasi o aiga. 

O le faifai foi e ave ma taunu’uga lelei o le tele lava o aiga. 

“Ioe o le tausi matua , o le lumana’i manuia lea o so’o se olaga o se tagata soifua.