Malosi’aga o le tinā

By Ilia L. Likou 26 February 2017, 12:00AM

O Fanaafi Maiava o se tinā 57 tausaga le mātua le soifua mai le afioaga o Salelavalu i Savai’i.

O le maua ai o le fa’atalatalanoaga ma le Fofoga o Samoa i le aso ananafi sa fa’aalia ai e le tinā le ola galue aua lava le tausiga o aiga ma ia iloa ai le faigata i le olaga i le tausiga o si ana fanau to’asefululua.

“E fai lava sina faigata le olaga,”  O lana saunoaga lea.

“Ma e lē taufa’amatalatala foi le tele o le pologa sa iai i le tau fa’aao’ogaina o le fanau ae pau lava le mea sili ona fa’afetai ai i le Ali’i o le poto ma le mālosi.

O le alofa fa’amāoni o le tinā i lana fanau sa le fa’avaivai ai lava i lana galuega fai. 

“A leai se alofa o le tinā i lana fanau e maimau lava le taimi e ola ai i lenei olaga. 

 “O le tupe maua lava a si o matou aiga e fa’alagolago lava i le maumaga pei lava ona fai atu muamua o le su’e auala lava auā le manuia o le fanau o se ala tatau ma talafeagai lea i so’o se tinā.

“Mo le silafia foi e o’o lava i feau fa’aletamā e faia lava ia mea uma ona o le moni le alofa i le aiga. 

“Ou te ta’utino atu foi, po le ā lava le matua i fea, o le lēlāva, e taumafai lava ou te galua i le maumaga aua lava le tupe maua mo le aiga, mea fai le ekalesia. 

“O le galulue fa’atasi foi o si o matou aiga e māmā ia lava le avega i aso uma. 

Sa tāua foi e le tinā ia Fanaafi o le tofi fa’atinā o se la’asaga lava e fa’aauau pea se ia o’o le gata’aga.

“O le avea ai o oe ma tinā o le mafai ai foi lea ona iloa le tuaiga tinā o lo’o e iai nei. O lana lea saunoaga.

 “O le tele lava o taimi o le malosi o se tasi o mea’alofa sili atu i le lalolagi atoa ma e o lua lava le mālosi ma le alofa. O le alofa foi o se tasi o mea’alofa taua lava e maua e so’o se tagata soifua tusa lava po oe se tamā, o se tinā, o se matai po se faifeau foi. 

“Ou te ta’u atu foi po le ā lava le faigata le olaga ma ona fa’afitauli e foia lava pe iai fa’atasi tatou ma le alofa.

“A leai se alofa e leai lava se malosi ia te oe e fa’aauau ai galuega fai. 

I le isi o ona manatu sa ia fa’ailoa ia foi tiute fa’aletamā o le ta’aita’i le aiga ma tiute o tinā o le lagolago sua ma le fa’amālosi au.

“O le tamā lava ia e pule a lātou i latou tiute e fai ae o le tinā e naunua va’ai tamaiti ma le aiga.  

“E iai lava upu a le atunu’u a leai ai se tinā e leai se tofo lelei i le lalolagi. 

O le matafaioi a le tinā o le tausi le aiga ma va’ai lelei le fānau. I totonu o Samoa o le tofi o le tinā o le tausi tamaiti, fafaga le fanau, faia mea uma e manana’o ai ma fa’atonu le tama e tusa ma ona ala uma. Ioe o le tele lava o matafaio o le tinā e ao ona fai ae ia ave lava le fa’amuamua i le fanau.

“O le galuega foi lea a le tinā o le va’aia le saogalēmū o le fanau ma aua nei o’o ai ni fa’afitauli. 

“Ou  te fautuaina foi mātua ina ia va’ai ma le toto’a le fānau ma ā moni le alofa  o le mātua e fautua ma a’oa’o le tama e tusa ma ona ala ā matua e le toe te’a ese ai lava. 

Sa tāua foi le tinā e ese mai lava tinā i totonu o Samoa mai isi tinā i isi atunu’u aua o tinā lava ma le aganu’u o le fefa’asoaa’i lea o fanau ma matua ae maise lava le tinā I latou fanau teine. 

By Ilia L. Likou 26 February 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>