O se miti ua taunu’u mo Tokelau

26 February 2016, 12:00AM

O lo’o i Apia nei le Minisita o le Va-i-fafo a Niu Sila, o Tupa’i Murray McCully e ‘auai i se sauniga e aloa’ia ai le taua’aoina o le va’a-fou a Tokelau, le MV Mataliki.

O ananafi na fa’atinoina ai lea sauniga i le Uafu i Matautu, Apia.

“O le Mataliki o se va’a-fa’apitoa na fuafuaina fa’apitoa lava mo le la’uina o pasese ma uta i le va o Samoa nei ma motu e tolu o le Atu Tokelau,” o le fa’aaliga lea a Tupa’i. 

“O Tokelau e pei ona silafia, e na o feso’ota’iga i le sami e mafai ona o’o iai ma o se fa’aola-totoga tele lenei va’a mo motu uma. O le a malaga le Matariki i le va o Samoa ma Tokelau, e ta’ilua vaiaso, mo faigamalaga saogalemu ma lelei i se ‘au’aunaga vave mo tagata Tokelau uma. 

 “E $12.5 miliona tala le tau atou o le tusia o le ata ma le fausia o le va’a nei, lea o le pule lava e Tokelau ma o le a amata fa’agaioia e le kamupani o femalagaa’iga i luga o le sami mai Niu Sila, le Transport & Marine Ltd.

“E naunau pea le Malo o Niu Sila e fa’atumauina ana so’otaga va-va-lalata fa’apitoa ma Tokelau ma o le tu’uina atu o le va’a o Mataliki i le aso, o se fa’ailoga o le fa’aleleia atili o feso’ota’iga a Tokelau ma le Itulagi o le Pasefika fa’apea le lalolagi aoao,” o le saunoaga lea a McCully.

A’o iai i Apia, na feiloa’i atu le Ali’i Minisita mai Niu Sila i le Palemia o Samoa, Tuila’epa Sa’ilele Malielegaoi, o ta’ita’i o le atunu’u fa’apea sui o le ‘Aufai-Pisinisi ma le Ta’ita’i o le Itu Agai, o Palusalue Fa’apo II. 

O le va’a o Mataliki, sa tusia le ata i Lonetona ae fausia i Bangladesh fa’atoa momoli mai a ii le amataga o le masina. 

Na fa’aalia e le Fa’atonu talu ai o le ‘Au’aunaga o Va’a a Tokelau, o Asofa Fereti, o le taunu’u mai o le va’a fou lea, o le tali lea o talanoaga ma feutaga’iga ua loa tausaga o fa’atino, a sui o le Matagaluega o le Va-i-fafo a Niu Sila ma le TALO. O to’atele nisi e iai tomai fa’apitoa sa ‘auai e tu’uina atu ni a latou fautuaga i le ulua’i ata ma isi vaega fa’aopoopo o le va’a.

“O se miti ua taunu’u mo Tokelau,” o le saunoaga lea a Fereti. “Ua tausagā o matou fa’atalitali pea mo se taimi fa’apenei; ae talosia ia aoga ma fetaui le ‘umi o tatali.” 

E tausaga atoa na tuai ai ona momoli mai le va’a mai Bangladesh talu ai, sa iai nai fa’afitauli i le ulua’i ata sa fuafuaina ai. Ua mae’a la ona toe fa’aleleia ma sa manuia ma sologa lelei le malaga mai Chittagong i Bangladesh sa fausia ai, i le Aso 29 o Tesema  

O le va’a fou lea a Tokelau ua suia ai va’a a le Fa’alapotopotoga o Va’a a Samoa sa fa’aaogaina fa’aTogipau: le Fasefulu ma le Lady Naomi sa malaga feauaua’i e suia le PV Matua, lea e masani ona malaga pe ta’i-lua vaiaso mo nai tausaga se’ia o’o ina fa’aletonu lona afi ia Iulai i le tausaga talu ai.

O malaga a le va’a fou lea, o le a fa’atonutonuina e le Matagaluega o Fela’ua’iga a Tokelau ma le kamupani o le Transport & Marine – lea sa fa’atasi ai le Ali’i Pule o Dick Mogridge mo le sainia o le va’a ina ua taunu’u mai i Apia. 

O le Va’a o le Mataliki e mafai ona ‘aveina ai le pasese e o’o atu i le 60 i so’o se taimi fa’atasi ma se uta laiititi mo motu e tolu o Tokelau o Atafu, Nukunonu ma Fakaofo. E mafai ona aveina ai tagata e 120 i le va o motu o Tokelau.

26 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>