Ia fa’aaoga tatau le malosi

Tusia Ilia L. Likou ,

118 Hits

Ioane Seumanufagai o Vaito’omuli Palauli.

Ioane Seumanufagai o Vaito’omuli Palauli. (Photo: Ilia L Likou)

O le aso ananafi na maua ai le fa’atalatalanoaga a le Fofoga o Samoa ma Ioane Seumanufagai o Vaito’omuli Palauli.

Na maua le fa’atalatalanoaga ma Ioane o lo’o fa’atinoina galuega o le aso e pei ona i tapenaina ai lea o nisi o vaega.

“Ia e pei o a’u ia ou te sau mai Savai’i ia ae o lo’o o’u nofo i se tasi o o’u tuafafine  iinei ma faigaluega ai.

“Ou te  iloa lava e a’u ia o le olaga o lo’o ua i ai nei,ua fai lava sina faigata ma o lo’o taumafai lava i le mafai e atia’e.

“O se itu out e matua’i lagona lava a’u ia e ao lava ona ou fa’atinoina mo le lelei o si o’u aiga aemaise o matua o lo’o fa’atali mai aiga.

 “Ia e le’o fa’atinoina lava ni galuega ona o se isi itu, ia o le mea masani lava – o le tausiaina lava o aiga.

 “E le fa’aitiitia le taua o vaega nei aua lava le tausiaina o aiga aua e pei o lea le tulaga o lo’o ua tatou i ai nei le to’atele o nai o tatou tagata.

“Ma o se tulaga lelei tele.

 ‘E ui lava ina ua o tatou molimauina le faigata o le tulaga e pei ona ua i ai nei, a u’u le selau tala na’o sina lua minute lava uma, ae ao lava ona fai ma le poto mea uma.

 “O le taumafaiga ai e atia’e aiga o lea le tulaga e pito sili ona lelei ma e ao fo’i ona fa’amuamua i taimi uma.

Na ia fa’ailoa o le nofo ese mai ai aiga ona o galuega e i ai lava ona itu faigata.

 “Ia e misia lava aiga aemaise o matua, ae leai se isi mea e mafai ai ona ou lagolago a’u i lo’u aiga, nai lo le sau i Upolu nei ma taumafai e su’e se galuega ma faigaluega ai.

 “O le uiga o la’u tala o le a le lelava ma le faigata ia e taumafai lava e galue.

“Ia e pei fo’i la ona outou pasi mai ai luma , ia o lo’o o’u galue lava.

 “O le itu mautinoa a le mafai ona e alu e te faigaluega  e leiloa le mea e i’u i ai le olaga.

 “Ia ua ese la aso ma aso nei, o aso nei ua tupe mea uma – o le itu lea e ao ai lava ona fa’aaoga tatau le malosi.

© Samoa Observer 2016

Developed by Samoa Observer in Apia