Fuafua se Maota Tutotonu o le Malo - Palemia

146 Hits

Nofoaga o lo’o fuafua iai le Maota Tutotonu o le Malo.

Nofoaga o lo’o fuafua iai le Maota Tutotonu o le Malo.

Ripotia e Lanuola Tusani Tupufia 

Fa’aliliu e Maiava

 

O lo’o faia nei feutaga’iga a le malo ma le malo o Saina mo se maliega tau-seleni e silia i le selau miliona tala, e fausia ai se Maota Tutotonu o le Malo i Savalalo e sefululima fogafale, i le nofoaga tonu lea sa iai le Flea Maketi. 

O lea fuafuaga na fa’amaonia e le Ali’i Palemia, Tuila’epa Sa’ilele Malielegaoi i lana fonotaga-ta’i-vaiaso ma vaega fa’asalalau.

Na ta’ua e Tuila’epa, ua leva tausaga o fuafua e le malo le fausia o se fale-fogafale 15 i le nofoaga lea, a’o le’i fa’atama’ia le maketi e le mu i le lua vaiaso talu ai.  

 “Ua matou fuafua e fausia se fale fogafale-15 ma o lo’o fa’atalanoaina nei ma le malo o Saina,” o lana saunoaga lea. 

“Na logo mai a’u e le Amepasa talu ai o Saina e fa’apea, ua talia e Saina le mea lea… ma o lo’o fa’agasolo nei la talanoaga ma le malo o Saina.”

Na ta’ua fo’i e le Palemia, o le nofoaga tonu lava lea mo le fuafuaga lea.

 “E o’o mai lava i le taimi nei, o lo’o ta’ape solo nisi o matagaluega a le malo. O le mea lea e tilotilo iai, o se fale-tele e avea ma Fale Tutotonu o le Malo, o i, o le a iai le tele o matagaluega a le malo.

 “O le ‘autu lava, ina ia fa’afaigofie ai i tagata e malaga mai i nu’u i tua aga’i i Apia. Tatou te le manana’o e feoa’i solo e tau sa’ili mea o iai matagaluega a le malo. E taumafai ia fa’afaigofie mea uma mo latou, ia tasi lava se fale e iai uma matagaluega a le malo.” 

I nai tausaga ua mavae atu, na fa’ailoa ai e le malo le fale-fogafale 15 lea, e ono o’o lona tau i le 128 miliona tala. 

Na fesiligia pe o le a fa’atinoina nei loa le fuafuaga lea aua ua leai se flea maketi, ae saunoa Tuila’epa, e le o toe mamao, ae fa’ailoa mai loia se fa’ai’uga. 

Na ta’ua fo’i, o le ta’alaelae o le tulaga o le maketi le-tumau ua faia nei, ua iloa ai le tulaga tonu o le a fa’atu ai le Maota Tutotonu lea o le Malo.

O le tausaga e 2012 sa talanoaina le fausia o se Nofoaga ‘Autu i le nofoaga tonu lea. I le taimi lea, na fa’ailoa ai e le Minisita o Tupe i lena taimi, o Faumuina Liuga, e ‘silia i le selau kamupani tetele mai fafo sa fa’ailoa mai le fia resitalaina i a latou pisinisi i Samoa nei, pe a o’o ina tatala le fale tele lea. 

“O le a fa’agaioi e foliga o se nofoaga mo fefa’ataua’iga ma e tasi le kamupani fa’alotoifale o le a aofia ai pe a tino mai lea fa’amoemoe. O le a tele fo’i le sao o le SIFA (Samoa International Finance Authority) mo lea fuafua,” o le fa’aaliga lea a Faumuina i lena taimi.   

 “E le’i leva tele ona toe taliu mai i le atunu’u, mai se fa’aaliga sa faia i Singapore, o Hong Kong, Shanghi ma isi taulaga tetele i Saina. O se malaga sa’ili’ili e fa’amasani ai o tatou tagata i la’asaga e tatau ona uia a’o le’i fa’atinoina se nofoaga fa’apea.” 

O fa’amanuiaga mai lea nofoaga mo le tamaoa’iga lautele o le atunu’u, e aofia ai le fa’ateleina o  pisinisi ma teuga-tupe mai fafo, tele ai avanoa faigaluega, o le si’itia o tulaga tau-turisi ma fa’aleleia atili ai le atina’eina o fale ma galuega tetele i le atunu’u.

“O le a fa’ateleina avanoa faigaluega mo o tatou tupulaga talavou, o fa’amanuiaga masani ae maise tulaga tau-tagata mai fafo.

Na fa’ailoa fo’i e Faumuina i lena taimi, o lea Nofoaga Tutotonu, o le a fa’atupeina lava e “tagata faipisinisi ma latou mai atunu’u i fafo, e teu-fa’afaigaluegaina a latou tupe i Samoa nei.”

© Samoa Observer 2016

Developed by Samoa Observer in Apia