Fa’afefe e le Pagota se Aiga

240 Hits

MATUA LE-FIAFIA: Sauaumaga Seiuli Mauga

MATUA LE-FIAFIA: Sauaumaga Seiuli Mauga

Ripotia e Deidre Fanene

Fa’aliliu e Maiava

 

Ua sa’ili fesoasoani nei Saoaumaga Seiuli Mauga o Vaiusu, i vaega fa’asalalau e fa’ailoa ai lona le-fiafia tele i nisi o leoleo e to’alua o le vaega o Leoleo i Faleata, ona o le leaga o le ‘au’aunaga sa tu’uina atu, e uiga i se mata’ua na tupu i le lua vaiaso ua tuana’i. 

O lea fa’afitauli, e a’afia ai se pagota sa tatala i tua mo le fa’ai’uga o le vaiaso. 

 “So’o se taimi lava e sau ai i tua i le fa’ai’uga o le vaiaso le pagota lea, e iai lava le mea e tupu ai,” o le fa’aaliga lea a Saoaumaga. “A le gaoia se fale o se aiga ma gaoia ni mea, e ‘ona’ona solo ma fa’atupu vevesi i aiga o le nu’u.

“O le Aso To’ona’i talu ai, na o ai fanau-teine e to’alua a lenei aiga i le faleoloa ae aga’i ane le pagota lea, fa’afefe. 

“Na fo’i mai teine ma fa’amatala mai, alu loa iai le solo a fanau-tama i le ali’i lea ma fesili iai pe iai se mea ua tupu. 

 “Ae liliu ane fa’afefe tamaiti ma fai iai, na te susunuina le matou fale.” 

Ae le na o le pau lea. Na ta’ua e Saoaumaga, na tau’ai fo’i e le pagota lea lo latou fale.

“Na matou telefoni i leoleo ma o-mai ai i le po lea peita’i ua sola le ali’i-pogota.

Fai mai Leoleo e to’alua, ia matou o’o atu i le aso e soso’o ai e fai ni fa’amatalaga a o le a aga’i e su’e le pagota i lo latou aiga.”

O le aso na soso’o ai, na aga’i ai Saoaumaga ma nai ona tei tama i le ofisa o leoleo i Faleata e tusia ni fa’amatalaga.

Ae o’o atu, e le’i maua lava e leoleo le pagota.

 “Na lagona lo’u le-fiafia ina ua fa’alogo atu iai aua, sa tatau ona toe fo’i atu leoleo e fa’amatala atu ia matou, a mea e le’i maua le pagota,” o lana fa’aaliga lea.

“E fa’afefea pe ana alu atu i le pogisa fa’atupu se fa’alavelave i le matou aiga a’o matou momoe?

“Sa tatau lava i leoleo ona faia ma le mautinoa, o lo’o saogalemu tagata pe a o’o i tulaga fa’apea peita’i, e foliga e le popole iai ae maise, e le’i maua le pagota lea. 

“E fai lava si fa’anoanoa tele ona e le o le taimi muamua lea ua tupu ai se mea fa’apea.” 

Ina ua feso’ota’i atu i le Ofisa o Leoleo i Faleata mo se fa’amatalaga, ae fa’ailoa mai fa’apea, o le leoleo sa faia le mata’upu lea, e le fa’atagaina e talanoa mai i vaega fa’asalalau, ma te’ena ai fo’i lea fa’aletonu. 

“E o’o mai lava i le taimi nei, e le’i o’o mai lava e fai se fa’amatalaga o le mea na tupu,” o le fa’aaliga lea na tu’uina mai. “E sa’o na matou o’o i le aiga i le po lea ma sa fa’ailoa ai, e tatau ona o’o atu i le ofisa, peita’i, e le’i tupu lena mea.

“Na matou aga’i fo’i e sa’ili le pagota lea i lona aiga i le po lava lea peita’i, e le’i maua atu iai, na sola ‘ese ma sa matou fa’ailoa loa i ona matua le mata’upu lea ma malamalama ai loa.

“Ae matou te le’i maua le pagota lea ma sa matou fa’atalitali fo’i i le aiga lea e o’o mai i le Aso Sa e fai se fa’amatalaga, peita’i e le’i o’o mai.” 

Na ta’ua e le So’o’Upu a le Falepuipui ma le Ola Toe Fuata’ina, o Sagaga Galu Frost, o lo’o i le falepuipui le pagota lea.

“Na fa’amaonia fo’i e Leoleo le mata’upu a le aiga lea ma ua tu’u iai aso e sefulu e fa’asala ai i le pa-sima ma e le toe fa’atagaina fo’i i tua i fa’ai’uga o vaiaso,” o le fa’aaliga lea a Sagaga.

© Samoa Observer 2016

Developed by Samoa Observer in Apia