Manatu o le Fa’atonu - Faagasolo tapenaga o le Siamupini

104 Hits

Tusia - Mata’afa Keni Lesa

Faaliliu e Seagaitumua Tupuola


O le manumalo i le tu’i-oti na fai sina taligā ae o le Fusuaga i le Parataiso  i le po o le Aso Toanai-e matua anoanoa’i lelei o Lupesoli’ai Joseph Parker na maua ai a’o ia faagasolo atu i ni mea tetele ma le sili ona lelei.  

Matou te fai ai o le le mafai ona toe faaauau le taaloga i le taamilosaga lona valu o se fusuaga lea sa matua mana’omia lava. 

O le mea moni e faapea afai o le a avea Parker ma tagata moni lava na te lu’iin le fusi o le paga mamafa o le lalolagi e pei ona matou iloa o lona faamoemoe lena- na te mana’omia ni tu’i mamafa e tofo ai lona ‘auvae atoa ma le mamafa o le faasalaga e mafai ona ia talia.

E o’o mai i le taimi nei o lona olaga fusu-ua uma ona tafi ese e Parker le toatele o ona fili i taamilosaga amata  ma ina ua sau o ia i Samoa-sa faigata lava ona tofotofoina o ia. E mafua lea ona o nisi o vaaiga. E fai le isi tagata ia i tatou o Parker o se tagata fusu uiga ese-e leai se tasi e o’o mai i le taimi nei ua na tofotofoina o ia. Atonu o le toalua o loo tapenaina o ia ua la togi atu le pepa o le faaeteete, ma tau’ai atu ia te ia ni fili faale-iloga i le taimi e faifai malie ai ona tapenapena o ia.

Poo le fea lava ala, o le mea ua tatou vaaia e o’o mai i le taimi nei –ua na o mea uiga ese lava. I fusuaga faa-polofesa e 18 a Parker i lona olaga fusu, o faailoilo uma lava ia e faasino i le siamupini o le lalolagi i le lumana’i lea e tatau lava ona faaauau ai pea i lona ala i le taimi nei. Ae peitai, o se itu e faanoanoa ai mo se tasi o atalii lauiloa o Samoa-e faasolo lava ina gaoa tele ma faigaata mai le taimi nei ma le faagasologa i luma. Ma ua leva ona amata i le fusuaga ma Bergman i le Nofoaga o Taaloga i Tuana’imato i le Aso To’ana’i. 

A toe tilotilo i tua i mea na tutupu o le vaiaso talu ai, a’o alo atu mo lea fusuaga, o le toatele lava o i tatou-pe afai e le o i tatou uma-sa tatou manatu e na ona savali atu lava o Parker i totonu aveese loa Bergman. Ae vagana ai Bergman lava ia ma lona faiaoga, o le vaega toatele o tagata sa latou valo’ia e faapea o lea fusuaga e le sili atu i lo le taamilosaga tolu. O le mea moni sa ia i la’ua se mafuaga tatau. E o’o mai i le taimi nei ma lona olaga fusu, o le vave o lima o Parker, sa’o ma le malosi –sa avea pea ma ana auupega autu tau osofaiga ia ua to’ilalo ai alii uma sa tutū atu i ona luma. 

O Bergman, e pei ona tatou iloa nei, o se fili talafeagai lea. O lea e felesi mai ana koleniga sipā ma le tagata maoa’e o Deontay Wilder, e le’i sau i Samoa nei Bergman mo sona aso malolo.I le po o le Aso To’ana’i ina ua ta le logo, na ia faailoa mai ona faamoemoega i se taimi vave ina ua tau lona agavale mamafa ia Parker lea e peiseai na faate’ia ai o ia. 

Sa le tatau ona faate’ia ai o ia. A’o faagasolo i luma lona olaga fusu, e tatau ona aoaoina Parker ia faafeagai ma nisi tu’i mamafa faapena –ia e sili atu ona malosi i lo o tu’i a Bergman. E o mai faatasi lava ma le teritori.  

I lenei taimi, atonu e talafeagai ona fai atu tatou te le’i vaaia se tofotofoga moni mo le auvae o Parker. E ui lava ina sa tau ni tu’i a a Bergman, ae sa mamao ma itiiti. O le a vave ona iloa e Parker e le maua lena laki i taimi uma lava.   

Ona o le faailoga mulimuli i totonu le vaega o le paga mamafa lea ua na vaaia , o le a vave ona feagai Parker ma tama fusu  ia e mamafa atu a latou tu’i ma o loo i ai le malosi e tali ai tu’i a Parker ma tali mai. E le o se itu e tatau ona matou faailoa atu, e manaomia e Parker ona tofotofoina o ia i taimi uma ma o le fusuaga i le po o le Aso Toana’i sa matua atoatoa mo lea faamoemoe.  Ioe, na matou vai ua lavea Parker i se tu’i, na matou vaaia o ia ua ita ae o le vaega e sili ona lelei  e faapea i lea taualumaga, na ia aoaoina ai le faamasani i le si’osi’omaga, toe foi i vaega e malosi ai ma o iina e afua mai ai lona o le faavae mo le manumalo. O se faailoilo lelei lea. 

Ma e faafetai atu foi ia Bergman ona o lona onosa’ia o ia tu’i talu ai o isi tagata fusu e pa’u ina ia amaa ai ona faitau upu.  

Poo le a lava, ua tatou vaaia se siamupini o le lalolagai i se taimi o i luma ia Parker. O faailoga uma e iloa ai tama fusu lelei o loo i ai. O le vaega e sili ona lelei e peiseai o loo aoaoina o ia i fusuaga uma. Ma a tuu atu i ai ma nisi taamilosaga, e atili ai ona faaleleia o ia.  O se aso ona toe tilotilo lea o ia i lenei fusuaga i Samoa ma fai mai o lea fusuaga e tele lona sao i le faatulagaina o lona lumana’i. O se lumana’i lea ua taligā mo i tatou. Ia outou maua Samoa se Aso Lua matagofie, ma ia faamanuia atu le Atua!  


© Samoa Observer 2016

Developed by Samoa Observer in Apia