O LA’U TALA FO’I

133 Hits

1. Matauina pea i aso uma le matua leai lava o ni tagata faigaluega o le Malo mai Matagaluega ma Faalapotopotoga ia e gafa ma feoa’iga i luga o ala tetele.

O le pogai la o le ta’ua so’o o lenei mataupu-leaga e le avanea le faatalale o matagaluega poo faalapotopotoga ia e gafa ma femalagaiga i luga o ala tetele -e totogi ai se soifua o se tasi pe a afaina fua talu ai le soona saoasaoa ma le le mafaufau o isi avetaavale i luga o ala tetele.

O le fesili la ua tula’I mai-o le a le aoga o le fai o le tulafono mo feoa’iga i luga o ala tetele-toe totogi ma tagata faigaluega e faatinoina lea galuega- ae le o mafai ona latou faafoeina o latou tiute i aso uma? 

Afai la o le tulaga lea o le a tatou alu ai-o lona uiga- e na o le maumau ai o tupe o le afu maligi o le atunuu i o latou totogi- ae le o faatinoina o latou tiute! O ai la e tatau ona tuua’ia mo lenei faaletonu?

O le tulaga la ua aliali mai-ua faifai malie taavale a le atunuu-ae sa’oloto taavale a le Malo ma matagaluega e faafoeina femalagaiga i luga o ala tetele! O le taeao la ananafi-fai mai le isi toeaina na o mai ai ma lona atalii ma lona atalii e momoli o ia i le galuega.

Fai mai toeitiiti lava a lavea le latou taavale i Vailoa- i le taavale a Leoleo!

O lea taavale a Leoleo-o le taavale mo le laiseneina o ta’ifau ma o le avetaavale o le alii Leoleo ma le isi alii Leoleo! O le faalavelave la lenei- toeitiiti lava a tupu i le patupatu lea e i Vailoa-talu ai le alu atu saoasaoa o le taavale a Leoleo-tau tipi le latou taavale  i luga o lea patupatu!

Afai la o le Leoleo lea na aveina atu lea taavale-sa le tatau ona avetaavale-leaga o lea ua faamaonia i lea faalavelave semanu e tupu- e le malamalama foi lea Leoleo ia i tulafono o Ala Tetele.

Afai la e le malamalama i tulafono o ala tetele-sa le tatau foi ona tago e ave le taavale leaga e afaina ai fua isi tagata. Ae peitai-ana faapea e i ai se aufaigaluega e mata’ituina feoaiga i ala tetele-ailoga e tutupu mai ni faalavelave?

Afai la e le o toe aoaoina avetaavale i Samoa i tulafono o ala tetele-ua tatau loa ona ‘aua nei toe faia ni laisene avetaavale-talu ai- e le taua le maua ai o tupe a le malo-ae taua le soifua o tagata! O le a sou taofi? 

 

2. Matauina i Tala Fou le maoa’e o le tomai o le Palemia i mea tau tinei mu-ma ana faapea la o le Pule lea o le Vaega Tinei Mu-e matua mafai lava ona titina le afi lea na sasao i le maketi! Ae o le faalavelave-e leai sona poto tau tinei mu-vagana ai polokiki. Tusa lava pe e le o i tatou o ni tinei –mu poto faapitoa- ae afai e fiu tagata e lipoti atu le afi ae leai se gaoioiga e faia-e faapefea la ona titina le afi? 

Ua ao Samoa ma ua tatou iloa uma- lava afai e sasao loa le afi titina loa- e 99 pasene le mafai ona tineia le mu-ae afai na alu atu le valaau anapo ae faatoa o mai nei i le taeao-e faapefea la ona faatali mai le afi sei o atu loli tinei-mu?

O le upu moni lava ia-ana faapea e sasao le afi telefoni atu loa pe lipoti atu loa o mai loa le Ofisa Tinei Mu-e moni lava e mu nisi mea-ae mautinoa lava le mafai ona faasaoina o isi mea. Ae afai e na o le lipoti atu-lipoti atu le afi ae le tali mai- a faapefea la ona faasaoina meatotino a tagata?

Afai la ua lape le Ofisa Tinei Mu-o le a le pogai e tau punipuni ai? A ua le faatuatuina e tusa ai mo latou tiute ma le mafaia ona faaleleia atili le auaunaga- saili se isi na te mafai ona faatinoina na matafaioi mo le saogalemu lautele o le atunuu ma latou meatotino-aemaise ai o le faasaoina o meatotino a le atunuu! ! O le a sou taofi?

 

3. Matauina foi i Tala Fou se ulutala-:” Ua leai se faamoemoe” ma o le faaupuga lea a se teineitiiti e sefulu ma le fa tausaga le matua mai Vaitele-fou o loo faatauina atu oloa i luga o ala tetele-ma na amata ona ia faia lea galuega a’o laititi lava.

O ia e alu e faatau atu niu ma salu i aso uma;o lo latou aiga e to’afa-o ona matua, o ia ma lona tuagane matua…!O lona tamā e faigaluega i se konekarate i Apia ae o lona tina e nofo i le fale i aso uma.

E le lava le totogi o lona tama e tausi ai lo latou aiga i aso uma ma o le pogai lea ua tonu ai ia te ia e alu e faatau atu nei oloa i luga o ala tetele. E le au i se $100 le totogi o si ona tamā e tausi ai i latou i le vaiaso…..! Ia atonu ua lava ma totoe le faamatalaga a si nei teineitiiti, ae o le fesili-ua mafua i se a lea tulaga? O le tali- ua matitiva tagata o le atunuu! Afai la ua matitiva faapenei le atunuu-o ai la e tatau ona tula’i mai e fesoasoani i ai?

Afai la o le Malo-o le mea moni-o le taimi lenei o le HRPP e faia sea fuafuaga ma se fesoasoani pe afai e toe fia o mai e faafoe le atunuu!

O tagata nei sa fai o latou sao i le tamaoaiga o le atunuu, ma o le taimi la lenei-ua tatau ai ma onomea se fesoasoani i le atunuu mo ona tagata e pei o lea aiga. Ae afai e le aloa’ia e le Malo le tagi talatala a lenei ‘alu’alutoto- a faapefea la ona mautali atu i le atunuu !

Poo le a fo’I le fai mai o le Palemia e leai se mativa i Samoa-ae o le upu moni-e le o se upu moni lena-se’ia vagana ai ua le toe vaaia tamaiti laiti o faatau atu oloa i luga o alatetele ma tu’u le aisi solo i tagata! O le a sou taofi? 

 

4. Matauina foi i Tala Fou se tasi o tamaita’i-le Fetalaiga a Semau Levi-o le a sauni e avea ma sui faatu mo le Itumalo o Gaga’emauga-i le faiga-palota o loo loma nei!

O le lelei la ma le talafeagai o le tulai mai o Semau Faamau Levi-atonu o le a toe manatua ai se tasi o Toa Magumagu o le Palemene ua usufono-o Semau Peleseuma.

O se sui usufono e le mafai ona galo e tusa ai ma lona taimi i le Palemene-ma o i latou uma sa galulue i le Palemene i lea taimi- e le mafai ona galo le toeaina pe a fetalai-aua e ui ina maotua lana gagana ma lana faautaga-ae sa avea o ia ma lu’itau i soo se faamatalaupu o le Palemene i lena taimi.

A o’o foi ina malaga faataamilo Komiti a le Palemene i soo se vaega o le atunuu-e fia faafofoga uma alalafaga ma afioaga e afea e ia malaga-pe a fetalai! O le mea lea e lagona ai le taua tele o le tulai mai o Semau Faamau Levi-na te toe faaolaola taimi o le toeaina i totonu o le Palemene! O le a sou taofi?

© Samoa Observer 2016

Developed by Samoa Observer in Apia