O le alu i totonu e fai se eseesega

184 Hits

SUI FAATU MO GAGAEMAUGA NU.2 - Seuoti Alofipo Sheryl Muagututi’a.

SUI FAATU MO GAGAEMAUGA NU.2 - Seuoti Alofipo Sheryl Muagututi’a.

Tusia - Sarafina Sanerivi 

Faaliliu e Seagaitumua Tupuola

 

O Seuoti Alofipo Muagututi’a o le a ulufale atu i le malae o polokiki e fai se eseesea. O le a tauva o ia mo le taimi muamua mo le nofoa faa-Palemene o le itumalo o Gaga’emauga Nu.2 lea e aofia ai nuu o Sale’aula ma Salamumu. O lenei tamaitai na fanau ma soifua i Niu Sila, fai mai Seuoti o le taliu mai i Samoa ma lona aiga o se faaiuga faigata lea ma le lavelave na ia faia. Ae ui o lea, ua tonu nei ia te ia e mulimuli atu i le mea e talitonu o lona valaauina lea mai le Atua. “O a’u o se tamaititi a le Atua ma ou te iloa o le mea o loo o’u faia o se faaaliga lea ua na totō i totonu ia te a’u mai ia te ia,” o le faaaliga lea a Seuoti.

“Ou te iloa tatou te le sa’o atoatoa o a’u o se tasi e fia faaloga i Ana upu ma faapea fo’i ona mulimuli i Ana faatonuga. Ou te talitonu e tatau ona ou sau iinei ma faailoa atu foi i o tatou tamaitai ua ala ona tatou iinei ina ia fai se eseesega.”Ae mo ana fuafuaga afai e filifiliga e avea ma fofoga o le itumalo, fai mai Seuoti e anoano galuega e ao ona fai  “Ua ‘ou vaaia se mana’oga tele mo le atiina a’e i totonu  e itumalo.” Ae ui o lea, o loo faasilisili lava i lana lisi le atiina a’e tau aoaoga i totonu o le itumalo. “O la’u vaaiga tausili o aoaoga,” o lana faaaliga lea. “O le aoaoina o se auupega lea e sili ona malosi e fesoasoani ai e fai se suiga i le lalolati, ma ou te iloa e faapea afai tatou te aoaoina lelei a tatou fanau, o le a tutupu a’e e avea ma ta’ita’i malolosi ma atamamai mo le lumana’i.” O le una’ia o a’oa’oga tau a’oga amata ma le maua o tagata talafeagai mo komiti a a’oga o nisi ia o fuafuaga na faaalia e Seuoti  ina ia mafai ai ona faaleleia le tulaga o a tatou a’oga i totonu o le itumalo. “O le maua o tagata talafeagai ma tagata ua i ai se naunautaiga faapena e galulue faatasi, e mafai ona latou fesoasonai e fai se suiga i totonu o tatou nuu. “Ua ‘ou iloa afai e le tutusa le maualuga o a’oga i nuu i tua ma le maualuga o a’oga i Apia, o le mea tonu lena ou te e taofi.  Ou te mana’o ia faigofie ona maua e tamaiti o lo matou itumalo le avanoa uma latou te manaomia e tusa ai ma a’oa’oga.”Sa silasila foi e Seuoti i le mataupu tau galuega mo le autalavou ma tuuina atu i ai ni mafaufauga loloto. .

 Ae ui o lea, e talitonu le tamaitai e faapea  “a maua le  aoaoina tonu ona maua lea o galuega lelei mo a tatou tupulaga o lalovaoa.” Fai mai a le Tamaitai o le atiina a’e o le alamanuia tau turisi i totonu o le itumalo e taua tele foi. Ae ui o lea, o lona talitonuga e faapea ina ia mafai ona amata le atiina a’e o turisi, o auala ma galuega tetele i totonu o le itumalo e tatau foi ona ati a’e. E matua talitonu lea tamaitai ua 42 tausaga lona matua –e manumalo i le palota.“Peitai, e le o se mataupu e faasino i le manumalo poo le faia’ina. O le mataupu e faasino i le tulaga o loo o’u i ai ma le mea e ave a’u e le Atua i ai.”Fai mai a ia o ana fuafuaga e fesoasoni ai i lona itumalo ma ati a’e aoaoga e le gata lea tusa lava pe manumalo o ia pe leai. “Afai ou te le sao i totonu o le palemene o le a amata pea ona tauaveina la’u fe’au  ia ati a’e ma faaleleia le faiga tau aoaoga i totonu o lo matou itumalo mo se manuia e sili atu ona leloei o a matou fanau,” o lana faaaliga lea. “E pei lava ona ‘ou fai atu, ou te matua fia faamamafaina i tagata e faapea afai ou te tulai mai, o le a ‘ou faia mea uma lava i le tulaga lelei ou te mafaiai ina ia mautinoa ai ai o le a maua avanoa mo a matou fanau  i a’oa’oga lelei.  “Ma afai ou te le sao i le palemene, o le a le tuua ai lou faia o mea ou te talitonu e sili ona lelei mo tamaita o lo matou itumalo talu ai-o le tupulaga manuia lea a o matou aiga, nuu, itumalo ae o le mea e sili-o le atunuu. 

“O ia mea uma e faasino i le naunau ina iafai se eseesega. Afai o i totonu o lou loto le faatino o lea tulaga-o lona uiga la, matua faasaga loa e fai.” Talu ai ona ua latalata mai le Asoo le Faiga-Palota, sa faaalia e Seuoti e faapea o ana tapenaga sa “lelei lona faagasologa”.  “Ua ‘ou matua faafetaia lava le i ai o se to’alua  e 250% lona lagolagoina o a’u ma o ia lea na una’ia a’u i taimi uma ina ia avea ma tagata e sili ona lelei. 

 “Ma e faapea foi i la’u fanau ia na ioe ou te tauva mo le faiga-palota ma fai se eseesega. Ua mau lo’u loto pe a na ona ‘ou talanoa atu ae i le fale, o lo’u to’alua e tumau lava ona avea ma ulu o lo matou aiga ma e pule o ia i mea uma lava matou te faia.

 “Ou te talitonu o le valaau lenei a le Atua mo a’u ma o se mea lenei na ia tuu maia i totonu o lo’u loto. Ma e faapea foi i o’u matua, aua ana le seanoa i la’ua ou te le sau iinei i le taimi nei ma ua ‘ou fiafia lava e avea ma tama’ita’i  Samoa moni tusa lava pe o fea na ‘ou fanau mai ai.”

Sa mana’o foi le tamaitai e faamanatu atu i tupulaga talavou o Samoa aemaise ai lava tamaitai, e faapea “ e mafai ona avea i tatou uma lava ma ta’ita’i tusa lava poo a o tatou tupu’aga ma le olaga aoaoina, ae o taimi uma lava tatou te maua ai le alofa i se mea, ona pau lava le mea tatou te faia o le galulue lea ma le faamalosi ina ia tino mai a tatou miti.” O Seuoti ua 42 tausaga lona matua. Ua faaipoipo o ia ia Alofipo Lusi Muagututi’a ma e toatolu o la alo. O nuu o le Tamaitai o Sale’aula, Safune, Neiafu, Matavai, Falealili, Malaemalu, Tafatafa, Sapunaoa, Poutasi ma Salamumu. Na soifua mai ma soifua o ia i totonu o Niu Sila ae na se’e mai iinei ma lona aiga ina ia mafai ai ona tofo lana fanau i le olaga faa-Samoa ma le aganuu. 

© Samoa Observer 2016

Developed by Samoa Observer in Apia