Ia galue punoua’i

Tusia Ulimasao Fata ,

51 Hits

Filiva’a Faleiva

Filiva’a Faleiva

E talitonu le taule’ale’a ia Filiva’a Faleiva, 21 tausaga mai le afioaga o Faleasiu o lou galue punoua’i e mafai tele lava ona e taliaina faafitauli ma faigata ua molimauina e le toatele o le atunuu I lenei vaitau.

Na maua atu e le Fofoga o Samoa Filiva’a a’o agai atu ai i le fale i le maea ai o ana galuega sa faatinoina i lona ma’umaga i le taeao ananafi.

“O le mafuaaga o lou lē faavaivai ai ona o lenei vaitaimi ua maitauina ai le faigata o le soifuaga mo au ma lou aiga.”

“Ou te iloa foi afai ae leai sau galuega e te galue ai ma maua ai se seleni o le a o loo lou aiga i se tulaga faigata ma o le a fia aai foi lou aiga.”

“O le faafitauli pito lava ona telē o le itu tau le tupe maua.”

“I totonu o lou aiga e na’o le toalua lava tagata o lou aiga e faigaluega ma o a’u o loo ou faigaluega nei I le faletalimalo o le Aggies Resort I Mulifanua. Ae o lea ou te malolo I lenei aso ( Aso Faraile) o le ala lea ua ou agai mai ai I le faatoaga.”

“O nai ou matua ua maua I gasegase o le tino ua lē toe tutusa lava le malosi latou ia ma o le ala lea, e lē mafai ai ona faavaivai lou nei tagata ma lou uso matua i galuega ua ma galulue ai.

O le ala foi lea o le naunau ai ina ia maua le seleni e faatau ai talavai a nai ou matua.”

“O le tele o le seleni e faaaluina lea I le faatauina o taumafa mo lo matou aiga ma le totogiina lea o pili. Faatasi ai ma le auina atu o nai ou matua I le falemai pe a manaomia.”

“Ou te iloa foi e matua’I faigata lava le olaga pe ana na’o le nofonofo ae lē galue.”

© Samoa Observer 2016

Developed by Samoa Observer in Apia