E LE LEAGA LE TELEFONI FEAVEAI

542 Hits

author picture

Theresa Meaole

Ua pisapisao solo tagata,

I lenei masini ma ona aafiaga.

Ua lafo iai faitioga,

Faaali ai foi manatu ma lagona.

Tuuai uma iai leaga,

A le o le gaoi,pepelo poo le faitatala.

Fai mai ua ia taitai sese olaga o tupulaga,

Ua tele ai le mulilua ma le faitaaga.

Malepelepe ai le tele o aiga,

Talu ai lava si alii lea ma ana taiga.

Ua aafia ai le va fealoai,

Ao faamatalaga soona lafo ma fesopoai.

O lo’u taofi e leai,

O le tagata lava le faapogai.

O ia lea o loo faaaogaina,

O ia foi e iai le filifiliga.

E pule i taua i la ta omiomi,

Ae ia omiomi ma le faamaoni.

O le upu moni pea sese ona ta faaaogaina,

O iina la o lea iai ona vaivaiga.

Tupu ai loa le tele o faaosoosoga,

Talu ai le le faaaogaa se alofa.

Ua o ta soona fai,

Ae galo ia te i taua se mea o lea tupu mai.

E aoga tele mo fesootaiga,

E feasiasiai ai ma o tatou aiga.

Fefaasoaai ai i mea lelei,

Ae le o le sailiili masei.

O lo’u taofi e fia uunai,

E le leaga le telefoni feaveai.

© Samoa Observer 2016

Developed by Samoa Observer in Apia