Fa’amuamua le Atua i mea uma

By Sarafina Sanerivi 25 September 2016, 12:00AM

E tusa lava po’o a le tele o fa’afitauli o le olaga nei, o le Atua lava e maua ai le tali. 

O le mau lea a le tinā ia Ali’itasi Taupa’u Esau mai le afioaga o Vaoala. 

Ina afea e le Fofoga o Samoa le tinā ia Ali’itasi i le aso ananafi ma fesiligia sona finagalo i le olaga o lo’o iai le olaga i Samoa i lenei vaitau, na ia fa’ailoa mai ai, o lo’o sologa lelei lava le olaga i Samoa i lana maitau. 

“E seki a le olaga i Samoa,” o lana tala lea. 

“O le olaga a ia o le Samoa, e fa’avae lava i le Atua. O le tatalo lava le tali o so’o se fa’afitauli e feagai ma tagata Samoa. 

“O la’u foi lea tala i la’u fanau mai lava i le laiti e o’o lava ina ua matutua ma fai aiga, ina fa’amuamua lava le Atua i so’o se mea ma ala uma lava. 

“O le fa’aupuga foi lea a le digicel fa’apea mai e ‘Fa’amuamua le aiga,’ e sese. O le Atua lava e muamua. 

“Auā o ai e ona le manuia ma aumaia le ola? O le Atua. E muamua lava le Atua i mea uma, soso’o ai lea o matua, aiga ia ma isi. 

“Ma o le fa’ata’atiaga tonu lava lenā o le olaga o le tagata Samoa.”

Na fa’ailoa mai e Ali’itasi, e ui lava ina iai foi ni fa’afitauli e feagai ma lona aiga i nisi o taimi, ae le avea lenā ma ala e muta ai lona fa’atuatua i le Atua ma lana tatalo ina ia manuia lona aiga ma lana fanau.  “Ua matou lē toe fa’atasi ai ma le tamā o le aiga; ua toe nei o a’u ma si a’u fanau. O le taimi la lenei, o lo’o o’u faia uma tiute fa’atamā ma fa’atinā i totonu o le matou aiga. 

“E moi lava e faigata, ae o la’u tatalo lava lea i le Atua, e fesoasoani mai ia te au ma la’u fanau.”

E lē gata i lea, na ta’ua foi e Ali’itasi, e le’o na’o lona aiga e na te talosia i ana tatalo. 

“O a’u ou te tatalo lava mo so’o se isi o lo’o fia maua se fesoasoani. O la’u lava lea mau, o le ola tatalo e manuia ai aiga. Ae le fa’apea la na’o le tatalo ma nofonofo. E o fa’atasi le tatalo ma le ola galue. Fa’aaoga tatau taleni ma agava’a mai le Atua e saili ai manuia o fanau ma aiga. 

“E leai lava se mea e faigata i le Atua. E a la ona tele fa’afitauli i fanau ma lē manuia fanau, ona ua sese le auala e ta’ita’i ai e matua. Manatua, o fanau o le tofi mai le Atua, e a’oa’o foi la ina ia iloa le Atua ma ofo o latou ola e auauna ai mo le Atua.”

Na ta’ua foi e Ali’itasi, e ese lona fiafia tele i le olaga i Samoa.

“Ua tele lava suiga mai atunu’u i fafo, ae ia te au lava ia, e talia lava na’o suiga e tatau mo i tatou ae aua tatou te so’ona faia fua ni mea tatou te le’i masani muamua a.  

“Ma po’o a foi lava fa’afitauli ma suiga fou e ofi mai totonu o le atunu’u ma aiga, o le tatalo lava le tali o mea uma. 

“O lea ala lava lenā na fa’ata’atia mai e o tatou tua’a tatou te savavali ai. Ae peita’i, ua ta va’ai foi ua iai suiga i amioga a tupulaga i lenei vaitau. Ua fiu nisi o matua e fa’atonu ae ua le fia fa’alogo i se upu mai matua. 

“O le fofo a o lea fa’afitauli, o le ta’ita’i lava o fanau i le Atua ma tatalo.”

By Sarafina Sanerivi 25 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>