Tinou aua se lumana’i manuia

By Sarafina Sanerivi 25 September 2016, 12:00AM

O Peter Salanoa e 18 ona tausaga mai le afioaga o Malololelei. 

O lo’o aoga nei Peter i le aoga a Martin Hautus i Malololelei, ma o lana matātā  o le Polokalame i le turisi. 

Na fa’ailoa mai e Peter i le Fofoga o Samoa, e ese le faigata o le olaga i Samoa nei. 

“Mai lava i lo’u la’ititi, sa va’aia lava le tigaina o matua e galulue e tau saili ni auala e maua ai ni tupe aua i matou le fanau.

“O le ala foi lenā ua ou tinoū ai lava ina fai fa’alelei pea la’u aoga iai i’u lelei ona maua loa lea o se galuega e toe taui ai le galuega a nai matua na fai aemaise foi o le fa’aaoogaina o matou nei le fanau. 

“O la’u lava ia na mau, ae le tutusa ma manatu o nisi o uso ma tuafafine auā e eseese lava tagata ma o latou manatu.”

Na ta’ua e Peter e tele ni fa’anaunauta’iga o lo’o ia mafaufau ai mo le lumana’i. Peita’i na fa’ailoa mai e Peter, o lona fa’anaunauta’iga lava ina ia maua sana galuega lelei e tausi ai ona matua ma lona aiga. 

“Pau a le mea lea ei lo’u mafaufau ia maua se lumana’i manuia e totogi ai le alofa o matua ma atia’e ai le aiga. 

“Ou te talitonu lava a’u ia o le galue malosi lava e o le a’upega malosi lenā e maua ai le manuia ma fa’ataunu’uina ai la’u miti. 

“O le upu lava a matua, e leai se mea e maua ma se filemū. O lona uiga, e leai se mea e faigofie; po’o le a lava le ituaiga galuega e maua, e leai ma se mea e faigata. E faigofie uma mea uma. 

“O le taimi nei, o lea ou te tau’aveina le polokalame o le fa’aturisi ma faletalimalō. Ua uma ona fa’atinoina ni polokalame fa’ata’ita’i i le faletalimalo ale Aggie Grey i Mulifanua, ma o lea ua fa’atalitali nei i le taimi e faigaluega moi ai loa.”

Na fesiligia foi Peter mo sona finagalo i le tulaga o lo’o femisaa’i ai aoga ma fa’atupu vevesi ai i le taulaga.  Ae na ta’ua e Peter, e mafua uma mai nei mea ona o le lē loto gatasi o le tupulaga. 

“O le fa’afitauli lava lea o lo’o tupu pea i Samoa, o le tulaga lea o le femisa’ai o aoga. 

“Ia ae amata mai lava lea tulaga i le tamaititi lava ia. Ou te iloa foi e le’o aoga e mafua ai, e mafua mai lava i le tamaititi ia.  “E leai ni vevesi fa’apea i le matou aoga. Ae ou te iloa e a’u ia o le loto gatasi o tamaiti e mafua ai ona tupu vevesi.”

By Sarafina Sanerivi 25 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>