Fa’ailoga va’aia o le alofa ma le faiga-uō ua mafana – Amepasa o Saina

Tusia Sarafina Sanerivi ma Faaliliu e Maiava ,

122 Hits

SE UA LE-‘OLE LEA, MALO AFUA AILAO UA MAUA: Le Amepasa o Saina, o Wang Xuefeng i le taimi na taua’aoina ai le piano ia Porofesa Asofou So’o mo le A’oga Fa’aMusika a le Iunivesete Aoao o Samoa.

SE UA LE-‘OLE LEA, MALO AFUA AILAO UA MAUA: Le Amepasa o Saina, o Wang Xuefeng i le taimi na taua’aoina ai le piano ia Porofesa Asofou So’o mo le A’oga Fa’aMusika a le Iunivesete Aoao o Samoa.

“I le tausaga talu ai, ina ua fa’atoa taunu’u mai e avea ma Amepasa o Saina i Samoa, sa vala’aulia fa’apitoa ai a’u i se koneseti sa faia i le fale lenei.” 

O le fale lea e saunoa iai, o le maota Samoa o le Iunivesete Aoao o Samoa i Vaivase.

A o le vaega na aupito maofa ai Lana Afioga, o le koneseti sa faia ai i le maota lea.

“E mata’utia le manaia o le koneseti ma na ‘ou matua fiafia ai lava,” o le fa’aaliga lea a le Ali’i Amepasa.

O le fiafia tele o Lana Afioga, “na fa’aauau ai lava ma fa’amalosia le faiga-uo a le Amepasa o Saina ma le Iunivesete Aoao o Samoa,” o lana saunoaga lea. 

O le mafana tele o lea so’otaga, na amataina ai e le Ali’i Amepasa le a’oa’oina o le gagana Saina i le Iunivesete, e a’oa’oina ai le fa’aSaina…” 

O le fa’amautuina o le fa’aauau pea o lea so’otaga, na mafua ai ona ofo-fuaina atu o le ‘au’aunaga a se faia’oga o le gagana-Saina e a’oa’oina le gagana i totonu o le Iunivesete. 

Na saunoa fo’i le Ali’i Amepasa: “Lua masina talu ai, na vala’aulia ai a’u i tufaga-fa’ailoga mo fanau-a’o’oga sa a’oa’oina le gagana Saina mo le kuata muamua.

“I le taimi o le sauniga, na ‘ou fa’atoa iloa ai, ua mafai e latou uma ia ona tautatala i le gagana Saina.” 

A o le Aso Lua o le vaiaso nei, na taua’aoina atu ai e le Ali’i Amepasa se fa’ailoga mo le A’oga Tau Musika a le Iunivesete, e ala i ni vaega fai-fa’aili se lua. 

O lea sauniga na faia lava i le Maota Samoa o le Iunivesete, lea na talia aloa’ia ai e le Tapa’au o le Iunivesete, o Porofesa Fiu Asofou So’o se foa’i mai Lana Afioga, a’o silamio faia’oga ma tamaiti-a’oga o le A’oga Tau Musika. 

O le foa’i e aofia ai se piano ma se piano-uila e tusa le tau ma le ono-afe tala Niu Sila (NZD$ 6,000.00).

I le taua’aoina atu o lea meaalofa, na saunoa fa’amanatu ai le Ali’i Amepasa i le fa’aauauina pea o le lagolago a le malo o Saina mo le atina’eina o a’oa’oga i Samoa ma atili fa’amautuina ai pea le so’otaga va-va-lalata a Saina ma le Iunivesete Aoao. 

Na saunoa: “Ua tatou potopoto fiafia i lenei taeao e molimauina lenei vaega fa’apitoa, e fa’ailoa ai le mafana o le mafutaga a o tatou atunu’u e lua.” 

 “O le tu’uina atu o nei meaalofa, o le tu’uina atu fo’i lea o o matou mo’omo’oga alofa ma le agaga fa’aleuo. O musika malie e maua mai nei mea-fai-fa’aili, o le fa’ailoga lea o le matagofie o le faigauo ua tatou ‘ausia nei.” 

Na talia fiafia e le Tapa’au o le Iunivesete lea meaalofa ma saunoa fa’afetai ai e fai ma sui o faia’oga, o tama’ita’i ma ali’i a’o’oga uma ma fa’afetaia ai le Ali’i Amepasa, le Malo ma tagata-nu’u o Saina, ona o le agalelei. 

 “Ua tele le agalelei o le Malo o Saina ua faia mo le Iunivesete o Samoa e ‘auala mai i Lau Afioga a le Ali’i Amepasa Wang Xuefeng ma le lou Ofisa i Samoa nei.” 

O le masina talu ai, na faimeaalofa ai le Amepasa o Saina, e ala i le ‘auina atu o tama ma teine a’oga e to’asefulu o le Iunivesete mo se malaga i Saina, ma ina ua toe taliu mai, sa fa’aalia lo latou fiafia tele i lea fa’amanuiaga ma vi’ia ai le alofa ma le fa’aaloalo maualuga ua a’ao iai le Ali’i Amepasa, le Malo ma tagata-nu’u o Saina. 

© Samoa Observer 2016

Developed by Samoa Observer in Apia