Tatala le Western Union i Satitoa

By Ilia L. Likou 25 August 2016, 12:00AM

Ua fa’aopopoina pea le ‘au’aunaga a le Samoa Western Union, e pei ona iai le tatalaina o le lona 16 o ona lala i Upolu, lea ua fa’atuina nei i le Maota o Lemusu Mikaele i Satitoa i Aleipata. 

O lea fa’amoemoe, ua manino ai le amataga o nisi o atina’e tetele i totonu o le afio’aga ae maise le Atu-Aleipata atoa, lea  ua fa’afaigofieina ai lea tautua mo le mamalu o le atunu’u i lea itu.

Na ta’ita’ia le sauniga amata e Patele Maletino Victor a o le Susuga a Vaisa’ili Palale sa o’otiina le ripine.

“O se tala fiafia tele lea mo si o matou nu’u nei fa’apea o matou tua’oi,” o le fa’aaliga fiafia lea a Lemusu.

“O se miti ua leva o fa’ananau iai ma o le a tele taimi ma seleni o le a fa’asaoina mai le feoa’i atu i Apia.

“E momoli ai lava le fa’afetai tele i le faletua, le Afioga a Mulipola Anarosa Molio’o ma le Western Union, mo le fa’atuina o le lala lenei i lo matou nu’u.

O le i si ‘au’aunaga o le iai, o le totogiina lea o fa’amanuiaga tau-seleni mo tagata matutua o lo’o i lea itu o le atunu’u. 

 “O se tala fiafia tele mo nai tama ma tina matutua, ona o le a maua ai lava i’inei tupe o fa’amanuiaga mo tagata-matutua, e amata i le masina o Setema,” o le fa’aaliga lea a Leota Leota se tasi o toe-ulutaia o le afio’aga.

“O le totogiga o pili o le vai, o pili o moli ma telefoni, lea o le a na o le savalivali mai lava fa’atino i le maota lea o Lemusu, ua fa’asaoina atoa ai le tele o taimi ma tupe fa’aalu.

“Ioe, fa’afetai tele lava Western Union.” 

Na ta’ua e le Pule o le FEXCO Samoa, o Mulipola Anarosa Molio’o, o le a mafai fo’i i le lala lea i Satitoa ona tala tupe pe lafo atu fo’i i fafo ma isi itu o Samoa. 

“Ua fiafia Aleipata aua ua na o nai minute lava vava-mamao ai ma aiga ua malaga ‘ese atu ma Samoa mo sa’iliga manuia mo aiga ma nu’u ma ekalesia.

Na fa’ailoa fo’i e Mulipola, o se avanoa taua lea o le a mafai ai ona feso’ota’i matua ma fanau fa’apea aiga ma uo, ma ua mafai ai ona fa’afaigofieina mea uma ona o le fa’atuina ai o le lala lea i Satitoa. 

Ua silia i le 200 atunu’u o le lalolagi o lo’o iai ‘au’aunaga a le Western Union ma “e le o mamao ‘ese lava Samoa aua o lo’o feso’ota’i lava ma tagata o aiga, e fa’ailoa atu iai lo latou alolofa e ala i tupe fa’amomoli e lafo mai pe lafo atu fo’i aua le tautuaina o aiga ma nu’u.” 

O le FEXO (Samoa), o le vaega ‘autu lea a le Western Union i totonu o Samoa ma o le ‘au’aunaga aupito lauiloa lea ma fa’atuatuaina i le lalolagi aoao ma Samoa nei. Malo Lava!.

By Ilia L. Likou 25 August 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>