Fia miliona ua fa’aalu i le fa’atulagana o le ‘aufaigaluega a le Malo

By Lanuola Tusani Tupufia 25 July 2016, 12:00AM

O le so’ona to’atele na’ua o le ‘aufaigaluega a le malo o lo’o fa’aalu ai le miliona ma miliona o tupe a’o lea lava e ta’afifili ona itutino nei e tau totogi o latou sao e fa’aauau ai mau atina’e ua fa’ateleina pea. O le finagalo fa’aalia lea o le Faipule Tuto’atasi a le Palemene mai le Itumalo o Salega i Sasa’e, o ‘Olo Fiti Afoa Va’ai. 

I se fa’atalanoaga ma le Sunday Samoan, na fa’aalia ai e ‘Ola, o le fa’atulagana o le ‘aufaigaluega i totonu o matagaluega a le malo, e matua taugata lava i le taimi, e le taitai gafatia e le atunu’u ona fa’atupe.

“O le fa’atulagana o matagaluega o iai nei, e miliona ma miliona tupe o lo’o fa’aalu ai,” o lana fa’aaliga lea.    

 “Le tulaga lea e ta’i-lima i le ono Sui Ofisa Sili i totonu o se matagaluega e tasi. O le mea lea ua ‘ou matauinaa, e iai loa se polokalame fou e fa’aofi mai, ona fa’atu loa lea o se vaega fou, a’o lea lava e iai isi ofisa e mafai ona latou faia le galuega lea e tasi…o le tele o Sui Ofisa Sili i le taimi nei, o lo’o fa’atinoa galuega lava ia e fa’atino fo’i e isi Sui Ofisa Sili.”

“E leai se ‘ese’ega ma le faiga o le pe’epe’e,” o lana fa’atusa lea.

“A  fa’atusa lava i le mea lea e tupu nei, e ‘ese le tagata e valua le popo, ‘ese le tagata e tataua le niu…e le talafeagai aua, e to’atasi lava le tagata e faia uma mea na e lua.” 

Na fa’ailoa mai fo’i e ‘Olo, i aso ua mavae, sa iai lava matagaluega na matua to’agaogao lava tagata faigaluega ae sa mafai ona fa’atino ma le vave a latou galuega.

“A o le fa’ato’ateleina o le ‘aufaigaluega, o le tuai fo’i lena o le fa’atinoga o galuega ma tele ai tupe fa’aalu a le malo.” 

A o le to’atele lea o tagata faigaluega a le malo, e le o atagia ai se tele o tupe maua.

E talitonu ‘Olo, e sese tele le tulaga ua ‘ave iai le fa’amuamua a le malo ma e matua leaga lava fuafuaga mo le fa’ateleina o avanoa faigaluega.

“E le o le ‘auala lea e fa’ateleina ai galuega, le fa’ato’atele o Sui Ofisa Sili,” o lana saunoaga lea. 

“Afai e manana’o e fa’ateleina avanoa faigaluega, e tatau ona tilotilo i galuega i fale-gaosi mea e to’atele ai tagata e fa’afaigaluega ai ma fa’aalu ai tupe i le vaega tuma’oti. 

“E latalata i le 60 pasene o a tatou tupe-maua e mai le vaega tuma’oti ma o ‘ina tonu e tatau ona silasila toto’a iai le malo.”

Na fa’aopoopo mai fo’i le Faipule o Salega i Sasa’e, e tele atu isi mea e mo’omia  ona fa’aleleia peita’i o le fa’anoanoaga lea, ua fai le finagalo o le atunu’u ma palota ai mo le malo o iai nei. 

E ‘ese fo’i la le finagalo o le Faipule matua mai Falealupo, o ‘A’e’au Peniamina Leavaise’eta  lea na saunoa, e moni na te ioeina le matua to’atele o Sui Ofisa Sili i matagaluega a le malo, ae talitonu lava ia, e ‘ese’ese uma lava vaega e iai tomai ma agava’a fa’apitoa o latou o i tofiga uma nei. 

By Lanuola Tusani Tupufia 25 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>